༄༅། །འདི་གར་བྱང་ཨ་རི་སྐུ་ཚབ་དོན་ཁང་གི་བོད་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་ཀྱིས་བཏང་གནས་ནང་འཁོད་དོན། ཉེ་ཆར་བྱང་ཨ་རིའི་ཁྱབ་ཁོངས་བོད་རིགས་སྤྱི་མཐུན་ཚོགས་པ་ཁག་གཅིག་གི་རྒྱུན་ལས་འཕོ་འགྱུར་ཕྱིན་ཡོད།  མང་ཆེ་བས་མཁྱེན་གསལ་ལྟར།  ལོ་རབས་ ༩༠ ཙམ་ནས་བཟུང་རྒྱ་བལ་འབྲུག་གསུམ་དུ་གནས་སྡོད་བོད་མིའི་ཁྲོད་ནས་ཨ་རིས་གཙོས་ཕྱི་རྒྱལ་ཡུལ་གྲུ་ཁག་ཏུ་གཞིས་སྤོས་བྱེད་མཁན་མང་དུ་སོང་བ་དང་ཆབས་ཅིག  བོད་རིགས་སྤྱི་མཐུན་ཚོགས་པ་ཡང་རིམ་བཞིན་དར་ཁྱབ་བྱུང་ཞིང་།  བྱང་ཨ་རིར་མཚོན་ན།  དེང་སང་བོད་རིགས་སྤྱི་མཐུན་ཚོགས་པ་ཆེ་འབྲིང་ཆུང་གསུམ་བསྡོམས་ ༣༠ ཙམ་ཡོད་པ་དང་།  ལས་དོན་འགན་ཁུར་བྱེད་མཁན་ཚོགས་པའི་རྒྱུན་ལས་ནི་ས་གནས་མང་ཚོགས་ཀྱིས་འོས་འདེམས་བྱེད་ཀྱི་ཡོད།  རྒྱུན་ལས་ཚོས་ལོ་གཉིས་སམ་གསུམ་གྱི་ལས་ཡུན་རིང་གླ་འབབ་གང་ཡང་མེད་པར།  སྒེར་གྱི་དུས་ཚོད་བཏང་སྟེ་དང་བླངས་ཁོ་ནའི་ངོ་བོའི་ཐོག་ནས་ཞབས་ཞུ་སྒྲུབ་བཞིན་ཡོད་པས་བསྔགས་བརྗོད་འོས་པ་ཞིག་ཡིན།  

ཕྱི་ལོ་ ༢༠༢༢ ལོ་རྫོགས་ནས་ལོ་གསར་པ་ཤར་བའི་མཚམས་འདིར་ཨ་རིའི་ནང་ཡོད་པའི་སན་ཏ་ཕི་བོད་རིགས་སྤྱི་མཐུན་ཚོགས་པ་ (Santa Fe) དང་།  ཤར་ལྷོ་བསུ་དཔལ་ (Charlottesville) བོད་རིགས་སྤྱི་མཐུན་ཚོགས་པ།  མེ་ས་ཆུ་སེཌ་བོད་རིགས་སྤྱི་མཐུན་ཚོགས་པ། (Massachusetts) ཨི་ཐ་ཁ་བོད་རིགས་སྤྱི་མཐུན་ཚོགས་པ། (Ithaca) ཁེ་ན་ཌ་ཁྱིའུ་སྦིག་ (Quecbec, Montreal) བོད་རིགས་སྤྱི་མཐུན་ཚོགས་པ་བཅས་བོད་རིགས་སྤྱི་མཐུན་ཚོགས་པ་ཁག་གཅིག་གི་རྒྱུན་ལས་ཀྱི་ལས་ཡུན་རྫོགས་ཏེ་ས་གནས་མང་ཚོགས་ཀྱིས་མང་གཙོའི་ལམ་ནས་རྒྱུན་ལས་གསར་པ་འོས་འདེམས་བྱས་ཡོད།   

བྱང་ཨ་རི་སྐུ་ཚབ་དོན་གཅོད་ཁང་གི་ངོས་ནས།  སན་ཏ་ཕི་ཚོགས་གཙོ་སྤེན་པ་ཚེ་རིང་ལགས་དང་།  ཤར་ལྷོ་བསུ་དཔལ་ཚོགས་གཙོ་འཇམ་དབྱངས་ཉི་མ་ལགས།  མེ་ས་ཆུ་སེཌ་ཚོགས་པའི་ཚོགས་གཙོ་ཚེ་རིང་དོན་གྲུབ་ལགས།  དེ་བཞིན་ཨི་ཐ་ཁའི་ཚོགས་གཙོ་དཔལ་ལྡན་ལགས་དང་།  ཁེ་ན་ཌ་ཁྱིའུ་སྦིག་ཚོགས་གཙོ་བསྟན་འཛིན་རྡོ་རྗེ་ལགས་ཀྱིས་སྣེ་འཁྲིད་པའི་སྤྱི་མཐུན་ཚོགས་པ་ལྔ་པོའི་རྒྱུན་ལས་རྣམས་ཀྱིས་སོ་སོའི་ལས་ཡུན་རིང་སྐུ་ཚབ་དོན་གཅོད་ཁང་གིས་རེ་སྐུལ་ཞུས་པ་ལྟར།  བོད་མིའི་སྒྲིག་འཛུགས་ལ་དབུ་འོག་དཔུང་འདེགས་དང་།  སྤྱི་ནོར་༧གོང་ས་༧སྐྱབས་མགོན་ཆེན་པོའི་བཀའ་སློབ་ལམ་སྟོན་གཞི་རྩར་བཞག་ནས་ལྷག་བསམ་རྣམ་དག་གིས་སྤྱི་པའི་ཞབས་ཞུ་བསྒྲུབས་པར་གོ་སྐབས་འདི་བརྒྱུད་ཐུགས་རྗེ་ཆེ་ཞུ་རྒྱུ་ཡིན།  

དེ་བཞིན་ཚོགས་གཙོ་གསར་པ་འཇམ་དབྱངས་བསྟན་འཛིན་ལགས་ (Santa Fe) དང་།  ཤཀྱ་ཐུབ་པ་ལགས། (Charlottesville)  ཚུལ་ཁྲིམས་ཀུན་བཟང་ལགས། (Massachusetts)  བསྟན་འཛིན་ཕུན་ཚོགས་ལགས། (Ithaca)  སྐལ་བཟང་དགྲ་འདུལ་ལགས་ (Quecbec, Montreal) ཀྱིས་གཙོས་རྒྱུན་ལས་གསར་པ་རྣམས་ཀྱིས་ས་གནས་བོད་རིགས་སྤྱི་མཐུན་ཚོགས་པའི་རྒྱུན་ལས་ཀྱི་ལས་འགན་བླངས་ནས་སྤྱི་པའི་ཞབས་ཞུ་སྒྲུབ་འགོ་བཙུགས་ཟིན་པར་བཀྲ་ཤིས་བདེ་ལེགས་ཀྱི་འཚམས་འདྲི་ཞུ་རྒྱུ་ཡིན།  

བོད་རིགས་སྤྱི་མཐུན་ཚོགས་པ་ཁག་གིས།  ལོ་གསར་དང་འཁྲུངས་སྐར། གསུམ་བཅུའི་དུས་དྲན་དང་ཞི་བདེའི་གཟེངས་རྟགས།  མང་གཙོའི་དུས་ཆེན་དང་གསེར་གྱི་གཟེངས་རྟགས་བཅས་འཆར་ཅན་གྱི་མཛད་སྒོ་ཁག་སྲུང་བརྩིའི་ཐོག  བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་སྐད་ཡིག་སྲུང་སྐྱོབ་དང་།  སྐུ་ཚབ་དོན་གཅོད་ཁང་གི་རེ་སྐུལ་ལ་བརྡ་ལན་གྱིས་སྤྱི་པའི་ཞབས་ཞུ་བསྒྲུབ་རྒྱུ།  གཟའ་མཇུག་སློབ་གྲྭ་ཡོད་མཁན་ཚོས་གཟའ་མཇུག་སློབ་གྲྭར་ལྟ་རྟོགས་བྱ་རྒྱུ་བཅས་ནི་བོད་རིགས་སྤྱི་མཐུན་ཚོགས་པ་ཁག་གི་ལས་ཀ་གཙོ་བོ་ཡིན་པའི་ཐོག  སྐུ་ཚབ་དོན་གཅོད་ཀྱིས་འདུ་བསྐོང་གཙོ་སྐྱོང་གནང་གི་ཡོད་པའི་བོད་རིགས་སྤྱི་མཐུན་ཚོགས་པའི་ཚོགས་ཆེན་གྱི་གྲོས་ཆོད་ཁག་ལག་བསྟར་དོན་འཁྱོལ་བྱེད་རྒྱུ་དེ་ཡང་སྤྱི་མཐུན་ཚོགས་པའི་ལས་དོན་གཙོ་བོ་ཞིག་ཆགས་ཡོད།  

བོད་རིགས་སྤྱི་མཐུན་ཚོགས་པའི་རྒྱུན་ལས་རྣམས་ཀྱི་ལས་ཡུན་རྫོགས་རྗེས།  སྐུ་ཚབ་དོན་གཅོད་ལས་ཁུངས་ནས་རྒྱུན་ལས་ཚོར་ལེགས་གསོའི་ཕྱག་འཁྱེར་ཞིག་གནང་གི་ཡོད་པ་དེ་ནི།  རྒྱུན་ལས་ཚོས་སོ་སོའི་ལས་ཡུན་རིང་ལྷག་བསམ་ཁུར་བསྐྱེད་ཆེན་པོས་སྤྱི་པའི་ཞབས་ཞུ་བསྒྲུབས་པར་ངོས་འཛིན་མཚོན་པའི་ཆེད་དུ་ཡིན་པ་དང་།  རྒྱུན་ལས་ཟུར་པ་ཚོས་ལེགས་གསོའི་ཕྱག་འཁྱེར་དེ་ལ་རིན་ཐང་ཆེན་པོ་བརྩི་གི་ཡོད་པའི་གནས་ཚུལ་ཤེས་རྟོགས་ཡོང་གི་འདུག

ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བོད་རིགས་སྤྱི་མཐུན་ཚོགས་པའམ་བོད་རིགས་ཚོགས་པའི་གནས་ཚུལ་ཞིབ་ཙམ་མཁྱེན་འདོད་ཡོད་ཚེ།  བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་དྲྭ་བརྙན་ཚན་པས་དེ་སྔ་ཆེད་དུ་འབྲེལ་ཡོད་སོ་སོར་བཅར་འདྲི་གནང་སྟེ།  བཟོ་སྒྲིག་གནང་བའི་བརྙན་འཕྲིན་ལེ་ཚན་ལ་གཟིགས་ན་གནས་ཚུལ་ཞིབ་ཙམ་མཁྱེན་རྟོགས་ཐུབ་ངེས་ཡིན།  ལེ་ཚན་རྣམས་ངོ་དེབ་ཐོག་ཡོད་ལ།  ཡུ་ཁྲུབ་དྲྭ་སྟེང་དུའང་བཞག་ཡོད།  །