༄༅། །ཕྱི་ལོ་ ༢༠༢༣ ཟླ་བ་ ༠༡ ཚེས་ ༠༩ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གྲོས་ཚོགས་འཐུས་མི་སྐུ་ཞབས་ཀེ་ཝིན་མེག་ཀར་ཐི་(Kevin McCarthy) མཆོག་གྲོས་ཚོགས་འོག་མའི་ཚོགས་གཙོར་བདམས་ཐོན་བྱུང་བར་དགའ་བསུའི་འཚམས་འདྲི་གནང་ཡོད།

དེ་ཡང་མཚམས་འཕྲིན་ནང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས། ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་སྐུ་ཉིད་ཨ་རིའི་གྲོས་ཚོགས་འོག་མའི་ཚོགས་གཙོར་བདམས་ཐོན་བྱུང་བར་དགའ་བསུའི་འཚམས་འདྲི་ཞུ་རྒྱུ་ཡིན།

ཨ་རིའི་གྲོས་ཚོགས་སྤྱི་དང་ཡང་སྒོས་ལས་ཁྱུར་ཚོགས་གཙོ་ལྕམ་སྐུ་ནན་སི་པི་ལོ་སི་མཆོག་གི་དབུ་ཁྲིད་འོག་སྲིད་དོན་ཚོགས་པ་ཟུང་འབྲེལ་གྱི་གྲོས་ཚོགས་གོང་འོག་གཉིས་ནས་ལོ་ངོ་བཅུ་ཕྲག་དུ་མའི་རིང་བོད་དོན་ལ་རྒྱབ་སྐྱོར་གནང་བར་བཀའ་དྲིན་ཆེན་པོ་ཡིན།

བོད་ནང་གི་གནས་སྟངས་ཛ་དྲག་ཏུ་འགྲོ་བཞིན་པའི་སྐབས་སུ་ཨ་རིའི་གྲོས་ཚོགས་ཀྱིས་བོད་མིའི་རང་དབང་གི་མངོན་འདོད་སྒྲུབ་ཆེད་རྒྱབ་སྐྱོར་ཤུགས་ཆེ་གནང་བ་དེས་བོད་མི་རྣམས་ལ་རེ་བ་དང་སེམས་ཤུགས་ཆེན་པོ་སྦྱིན་ཡོད་ཅིང་། སྐུ་ཉིད་ཀྱི་དབུ་ཁྲིད་འོག་ཏུའང་བོད་དོན་ལ་དོ་སྣང་དང་རྒྱབ་སྐྱོར་མུ་མཐུད་འཐོབ་པའི་རེ་བ་བཅོལ་གྱི་ཡོད། ཅེས་དང་།

མཐར་དཔལ་ལྡན་སྲིད་སྐྱོང་མཆོག་གིས་སླད་མར་གང་མྱུར་སྐུ་ཞབས་ཀེ་ཝིན་མེག་ཀར་ཐི་མཆོག་དང་དངོས་སུ་མཇལ་འཕྲད་ཞུས་ཏེ་འཚམས་འདྲི་ཞུ་རྒྱུའི་གོ་སྐབས་ཡོང་བའི་རེ་བ་ཡོད་ཅེས་གསུངས་ཡོད་པ་བཅས།།