༄༅། །ཕྱི་ལོ་ ༢༠༢༣ ཟླ་བ་ ༠༡ ཚེས་ ༠༧ ཉིན་ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཉི་འོང་བོད་རིགས་ཚོགས་པའི་ཚོགས་མི་གསར་རྙིང་བར་གྱི་རྩིས་སྤྲོད་རྩིས་ལེན་དུ་གཙོ་ཞུགས་གནང་ཡོད།
སྐབས་དེར་ལས་ཁྱུར་བོད་རིགས་ཚོགས་པའི་ཚོགས་གཙོ་སྐལ་ལྡན་ལགས་ཀྱིས་བོད་རིགས་ཚོགས་པར་ཡོད་པའི་དངུལ་རྐྱང་དང་། ཅ་དངོས། མཇུག་སྐྱོང་ཞུ་རྒྱུའི་ལས་དོན་ཁག་གཅིག་སྐོར་སྙན་སེང་ཞུས་པ་དང་འབྲེལ། ཁོང་གི་ལས་ཡུན་རིང་སྐུ་ཚབ་དོན་ཁང་ནས་ལམ་སྟོན་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་མ་ཟད་འབྱུང་འགྱུར་མུ་མཐུད་ཞབས་ཕྱི་ཞུ་རྒྱུའི་འདུན་པ་ཡོད་སྐོར་གསུངས། གསར་འདེམས་ཚོགས་གཙོ་བསྟན་འཛིན་ཤེས་རབ་ལགས་ཀྱིས་འཚམས་འདྲི་དང་བཅས་ཚོགས་མི་གསར་པ་རྣམས་ངོ་སྤྲོད་དང་། ཁོང་རྣམས་ནས་དུས་སྟོན་སོགས་ལས་འགུལ་འདྲ་མིན་གོ་སྒྲིག་ཞུས་ཏེ་བོད་མི་རྣམས་ཆིག་སྒྲིལ་བཟོ་ཐབས་ལ་འབད་རྩོལ་ཞུ་རྒྱུ་ཡིན་ཞེས་སོགས་ལས་འཆར་དམིགས་ཡུལ་ཁག་ངོ་སྤྲོད་གནང་ཡོད་པ་རེད།
ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ལས་ཁྱུར་བོད་རིགས་ཚོགས་པའི་ཚོགས་མི་རྣམས་ནས་སྐུ་ཚབ་དོན་ཁང་དང་འབྲེལ་ཐག་ཉེ་པོའི་ཐོག་བོད་དོན་དང་འབྲེལ་བའི་ལས་འགུལ་སྣ་ཚོགས་སྤེལ་ཏེ་སྤྱི་ཚོགས་ཞབས་ཞུ་སྒྲུབ་པར་ཐུགས་རྗེ་ལེགས་འབུལ་ཞུས་པ་དང་ཆབས་ཅིག་གསར་འདེམས་ཚོགས་མི་རྣམས་ལ་འཚམས་འདྲི་གནང་སྟེ་ཡོང་འགྱུར་མཉམ་ལས་གནང་རྒྱུའི་དམིགས་ཡུལ་ཡོད་སྐོར་གསུངས། དེ་དང་ཕྱོགས་མཚུངས་སྐུ་ཚབ་དོན་གཅོད་ནས་བོད་དོན་ལས་འགུལ་སྤེལ་བ་ས་གནས་བོད་མི་དང་བོད་དོན་རྒྱབ་སྐྱོར་ཚོགས་པ་ཁག་དང་ལྷན་མཉམ་ལས་གནང་རྒྱུ་གལ་ཆེན་པོ་ཡིན་པ་འགྲེལ་བརྗོད་གནང་ཡོད།
མཐར་སྐུ་ཚབ་དོན་ཁང་གི་དྲུང་ཆེ་བཀྲ་ཤིས་དབྱངས་འཛོམས་ལགས་ཀྱིས་མཇུག་སྡོམ་གསུང་བཤད་དུ་ཕྱི་ལོ་ ༢༠༢༣ ཟླ་བ་ ༠༣ ནང་བོད་མིའི་སྒྲིག་འཛུགས་ངོས་ནས་བོད་མི་ཡོངས་ཀྱི་ཚབ་ཞུས་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་གནང་གཏན་ཁེལ་བའི་གསལ་བསྒྲགས་གནང་ཡོད་པ་རེད།
གསར་དུ་བདམས་ཐོན་བྱུང་བའི་སྐབས་བཅུ་གཉིས་པའི་ཉི་འོང་བོད་རིགས་ཚོགས་པའི་ཚོགས་མི་ཁོངས་ནས་ཚོགས་གཙོར་བསྟན་འཛིན་ཤེས་རབ་ལགས་དང་། ཚོགས་གཞོན་དུ་བསྟན་འཛིན་ཀུན་དགའ་ལགས་བདམས་ཐོན་བྱུང་ཡོད་པ་བཅས།།
