༄༅། །ཕྱི་ལོ་ ༢༠༢༣ ཟླ་ ༡ ཚེས་ ༥ ཉིན་རྡ་ས་ས་གནས་འགོ་འཛིན་དཀོན་མཆོག་མིག་དམར་ལགས་ཀྱིས་མགྲོན་འབོད་ཞུས་གནང་བ་ལྟར་ཧི་མཱ་ཅལ་མངའ་སྡེའི་ཀངྒ་རཱ་རྫོང་གི་རྫོང་དཔོན་གཞོན་པ་རོ་ཧི་ཐི་རཱ་ཐོར་(Rohit Rathour) ལགས་དང་། ཧི་མཱ་ཅལ་མངའ་སྡེ་གཞུང་གི་ཞིང་ལས་དང་། སྐད་ཡིག སྒྱུ་རྩལ། རིག་གཞུང་བཅས་ཀྱི་ལྷན་ཁང་གི་དྲུང་ཆེ་རཱ་ཀེ་ཞི་ཀན་ཝར་ (Rakesh Kanwar) ལགས་རྣམ་གཉིས་བོད་ཀྱི་འགྲེམས་སྟོན་ཁང་དུ་གཟིགས་སྐོར་ཕེབས་ཡོད་པ་དང་། སྐབས་དེར་བོད་ཀྱི་འགྲེམས་སྟོན་ཁང་གི་འབྲེལ་ཡོད་ལས་བྱེད་བསྟན་འཛིན་སྦྱིན་པ་ལགས་ཀྱིས་ཁོང་རྣམ་པར་བོད་ཀྱི་འགྲེམས་སྟོན་ཁང་གི་སྐོར་འགྲེལ་བཤད་ཞུས་གནང་ཡོད། དེ་རྗེས་སྐུ་མགྲོན་རྣམ་པ་དང་། རྡ་ས་ས་གནས་འགོ་འཛིན་དཀོན་མཆོག་མིག་དམར་ལགས་བཅས་ནང་སྲིད་ལས་ཁུངས་ཀྱི་དྲུང་ཆེ་དཔལ་ལྡན་དོན་གྲུབ་ལགས་དང་ཐུག་འཕྲད་ཀྱིས་བཞུགས་སྒར་རྡ་སར་འདུས་སྡོད་བོད་མི་རྣམས་ལ་འཕྲད་བཞིན་པའི་དཀའ་ངལ་ཁག་གཅིག་དང་དཀའ་ངལ་དེ་དག་སེལ་ཐབས་སོགས་ཀྱི་སྐོར་གོ་བསྡུར་གནང་ཡོད་པ་བཅས།།