༄༅། ། འདི་གར་འཕྲོད་བསྟེན་ལས་ཁུངས་ནས་བཏང་གནས་ནང་འཁོད་དོན། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་ཀྱི་འགྲེལ་པའི་བཀའ་ཆོས་དང་། སྒྲོལ་མ་ཉེར་གཅིག་གི་རྗེས་གནང་བཀའ་དྲིན་སྩལ་སྐབས་དང་། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དཔལ་མཉམ་མེད་རི་བོ་དགེ་ལྡན་པ་སྤྱི་ནས་ཇི་ལྟར་གསོལ་བ་བཏབ་པ་བཞིན་བླ་མ་མཆོད་པའི་སྒོ་ནས་བརྟན་བཞུགས་བསྟར་འབུལ་ཞུས་པའི་སྐབས་དང་སྟབས་བསྟུན། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་ཕྱི་ལོ་ ༢༠༢༢ ཟླ་ ༡༢ ཚེས ༢༥ ནས་ ༢༠༢༣ ཟླ་ ༡ ཚེས་ ༣ བར་གནས་མཆོག་རྡོ་རྗེ་གདན་དུ་དད་ལྡན་ཆོས་ཞུ་བ་རྣམས་ཀྱི་གཞི་རིམ་འཕྲོད་བསྟེན་མཐུན་འགྱུར་ཆེད་རིན་མེད་སྨན་སྒར་གོ་སྒྲིག་གནང་བ་ལྟར། གོང་གསལ་དུས་ཡུན་རིང་རང་རིགས་བོད་མི་དང་། ཧི་མ་ལ་ཡའི་མི་རིགས། གནས་ཡུལ་མི་མང་། གཞན་ཡང་འཛམ་གླིང་ས་ཕྱོགས་གང་ས་ནས་ཕེབས་པའི་ཆོས་ཞུ་བ་ཁྱོན་བསྡོམས་ ༤༧༥༤། ཙམ་ལ་རིན་མེད་སྨན་པ་བསྟེན་གཏུགས་དང་ཕྱི་བཅོས་གསོ་ཐབས། སྨན་བཅོས། སྨན་བགོ་འགྲེམས། དེ་བཞིན་ཛ་དྲག་ནད་པ་འོར་འདྲེན་སོགས་ཀྱི་མཐུན་འགྱུར་གང་འོས་སྦྱར་ཐུབ་པ་བྱུང་ཡོད་པ་མ་ཟད། ཏོག་དབྱིབས་སྔོན་འགོག་སླད་ཁ་རས་ཁྱོན་བསྡོམས་ ༦༠,༠༠༠། བགོ་འགྲེམས་ཞུས་ཡོད། ཏཱ་ལའི་བླ་མའི་དགེ་རྩ་ཚོགས་པ་དང། ཨ་རི་བོད་ཀྱི་ཐེབས་རྩ། ཇར་མན་བོད་མིའི་རོགས་ཚོགས་བཅས་ནས་རོགས་དངུལ་མཐུན་འགྱུར་གནང་ཡོད་པ་བཅས།།