༄༅། །འདི་གའི་ཆེད་གཉེར་གསར་འགོད་པ་བསྟན་འཛིན་བསྟན་སྐྱོང་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་བ་ ༠༡ ཚེས་ ༠༣ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་༸གོང་ས་ཏཱ་ལའི་བླ་མ་བོད་དང་རྒྱ་གར་གནའ་བོའི་རིག་གཞུང་ལྟེ་གནས་ཁང་གི་རྨང་གཞི་འདིང་འཇོག་གནང་ཡོད་པ་རེད། 

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཙམ་ལ་མགོན་པོ་གང་ཉིད་མཆོག་དགའ་ལྡན་འཕེལ་རྒྱས་གླིང་ནས་༸གོང་ས་ཏཱ་ལའི་བླ་མ་བོད་དང་རྒྱ་གར་གནའ་བོའི་རིག་གཞུང་ལྟེ་གནས་ཁང་གི་ས་ཚིགས་སུ་ཞབས་སོར་བདེ་བར་འཁོད་མཚམས་སྐུ་བཅར་རྣམ་རྒྱལ་གྲྭ་ཚང་གི་དགེ་འདུན་པ་ཁག་གཅིག་ནས་ཤིས་བརྗོད་གསུང་འདོན་དང་འབྲེལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྟེ་གནས་ཁང་གི་རྩིག་རྨང་འཇོག་གནང་མཛད་དེ་བཞུགས་སྟེགས་སུ་འཁོད་གནང་ཡོད།དེ་རྗེས་བཀའ་ཟུར་བསྟན་པ་ཚེ་རིང་མཆོག་གིས་ཕེབས་བསུའི་གསུང་བཤད་དང་། བཀའ་བློན་ཁྲི་ཟུར་༸སྐྱབས་རྗེ་ཟམ་གདོང་རིན་པོ་ཆེ་མཆོག་གིས་མཛད་སྒོའི་ངོ་སྤྲོད་གསུང་བཤད། བྷི་ཧར་མངའ་སྡེ་གཞུང་གི་སོ་ནམ་ཞིང་ལས་བློན་ཆེན་སྐུ་ཞབས་ཀུ་མཱར་སརྦ་ཇིཏ་མཆོག་གིས་བྷི་ཧར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ནི་ཏིཤ་ཀུ་མཱར་མཆོག་གི་གསུང་འཕྲིན་ལྗགས་ཀློག དམིགས་བསལ་སྐུ་མགྲོན་རྒྱ་གར་དབུས་གཞུང་གི་ཁྲིམས་དང་དྲང་བདེན་བློན་ཆེན་སྐུ་ཞབས་ཀི་རན་རི་ཇི་ཇུ་མཆོག་གིས་གསུང་བཤད་གནང་གྲུབ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། གནས་མཆོག་ཁྱད་པར་ཅན་རྡོ་རྗེ་གདན་གྱི་གནས་འདིར་ཆོས་དད་ཡོད་མེད་ལ་མ་ལྟོས་པར་སངས་རྒྱས་ལ་དགའ་མོས་བྱེད་མཁན་དང་། གཙོ་བོ་སངས་རྒྱས་ཀྱི་གསུང་ལས་བྱམས་བརྩེ་ཟེར་བ་དེ་དངོས་གནས་དྲང་གནས་འཛམ་གླིང་ལ་ཕན་ཐོགས་ཡོད་པ་ཞིག་ཡིན་པས་ཚང་མས་གལ་ཆེན་པོ་བརྩི་གི་ཡོད། རྡོ་རྗེ་གདན་ཞེས་པའི་གནས་འདིར་སངས་རྒྱས་བཅོམ་ལྡན་འདས་ཀྱིས་བྱམས་བརྩེ་རྩ་བར་གྱུར་པའི་སངས་རྒྱས་ཀྱི་སྤྱོད་ཚུལ་གསར་དུ་བཙུགས་ཤིང་། འདི་ནས་ཡར་རྒྱས་ཕྱིན་པ་ཞིག་ཡིན་པས། དེ་ལ་ཚང་མས་དམིགས་བསལ་ཐུགས་སྣང་གནང་བར་ཐུགས་རྗེ་ཆེ་ཞེས་ཞུ་རྒྱུ་ཡིན།སངས་རྒྱས་པའི་ཆོས་ཞེས་པ་དེ་རང་རང་སོ་སོའི་ལྟ་གྲུབ་ལྟ་བུ་ཁྱེར་བ་ཙམ་མ་ཡིན་པར་སེམས་ཅན་ཐམས་ཅད་སྡུག་བསྔལ་མི་འདོད་པ་དང་། བདེ་བ་འདོད་པ་ཤ་སྟག་ཡིན་སྟབས་ཐམས་ཅད་ལ་བདེ་བ་འཐོབ་པ་ཞིག་དང་། སྡུག་བསྔལ་མ་བྱུང་ན་སྙམ་པའི་ཡིད་སྨོན་བྱེད་པ་ཙམ་མ་ཡིན་པར་སྡུག་བསྔལ་གྱི་རྩ་བ་དེ་སེམས་ཀྱི་ཞེ་སྡང་དང་། རང་གཅེས་འཛིན་གྱིས་བྱེད་ཀྱི་ཡོད་ཅིང་། བདེ་སྐྱིད་ཅེས་པ་དེ་གཞན་གཅེས་འཛིན་གྱི་ཐོག་ནས་ཡོང་གི་ཡོད་པ་དེ་ངེས་དགོས། དེ་དངོས་ཡོད་གནས་ཚུལ་རེད། ཆོས་ཀྱི་སྐད་ཆ་མ་རེད། དེང་སང་འཛམ་གླིང་གི་ཚན་རིག་མཁས་པ་མང་པོ་ཞིག་གིས་སེམས་ལ་ཞི་བདེ་ཡོད་ན་ལུས་ངག་གི་བྱ་བ་ཚང་མ་འཚེ་བ་མེད་པའི་ཞི་བདེ་ཡོང་ཐུབ་པ་དང་། སེམས་ལ་ཞི་བདེ་མེད་ན་ཕྱི་རྟགས་སུ་འདྲ་ཆགས་པོ་དང་ཡིད་དུ་འོང་བ་གང་འདྲ་ཞིག་ཡོད་ནའང་སྦུག་ཏུ་ཞེ་སྡང་གིས་ཀུན་ནས་སླངས་ཡོད་ན་གང་བྱས་ཀྱང་སྡུག་བསྔལ་ཡོང་རྒྱུ་ཡིན།དེས་ན་ཞི་བ་ལྷས། འཇིག་རྟེན་བདེ་བ་ཇི་སྙེད་པ། །དེ་ཀུན་གཞན་བདེ་འདོད་ལས་བྱུང༌། །འཇིག་རྟེན་སྡུག་བསྔལ་ཇི་སྙེད་པ། །དེ་ཀུན་རང་བདེ་འདོད་ལས་བྱུང༌། །མང་དུ་བཤད་ལྟ་ཅི་ཞིག་དགོས། །བྱིས་པ་རང་གི་དོན་བྱེད་དང༌། །ཐུབ་པ་གཞན་གྱི་དོན་མཛད་པ། །འདི་གཉིས་ཀྱི་ནི་ཁྱད་པར་ལྟོས། ། དེ་བས་སྐྱོ་ངལ་ཀུན་སེལ་བའི། །བྱང་ཆུབ་སེམས་ཀྱི་རྟར་ཞོན་ནས། །བདེ་ནས་བདེ་བར་འགྲོ་བ་ལ། །སེམས་ཤེས་སུ་ཞིག་སྒྱིད་ལུག་འགྱུར། །ཞེས་གསུངས་པ་ལྟར་རེད། ཆོས་ཁས་བླངས་ནའང་རེད། མ་བླངས་ནའང་མེད། གང་ལྟར་སེམས་པ་བཟང་པོ་བྱེད་ན་ཆོས་དང་ཞི་བདེའི་རྩ་བ་ཆགས་ཡོད། དེ་འདྲ་ཡིན་དུས་སེམས་པ་བཟང་པོ་བྱ་རྒྱུ་དེ་ང་ཚོ་ཚང་མའི་ལས་འགན་རེད་ལ་འབད་རྩོལ་བྱེད་འོས་པ་ཞིག་རེད། གཞན་དོན་དོན་གཉེར་གྱི་བློ་དེ་ཡག་པོ་ཡོད་ན་ཞི་བདེའི་ལྡོག་ཕྱོགས་ཁོང་ཁྲོ་དང་། ང་རྒྱལ། ཕྲག་དོག་སོགས་རང་བཞིན་གྱིས་འཇོམས་འགྲོ གཞན་དོན་དོན་གཉེར་གྱི་བློ་དགའ་རབ་ཡོད་ན་རང་ལ་སྐུར་བ་འདེབས་མཁན་དང་ཕྲག་དོག་བྱེད་མཁན་ཚོ་ལ་ཡིན་ནའང་སོ་སོའི་ཁམས་དང་མོས་པ་རེད། དེ་དག་གིས་ཀྱང་སེམས་པ་བཟང་པོ་ཁྱེར་གྱི་ཡོད། ཡག་པོ་རེད་བསམ་པ་ཡོང་རྒྱུ་འདུག རྒྱ་གར་ལུང་པ་འདི་ཆོས་དད་དམིགས་བསལ་ཡོད་ནའང་རེད་མེད་ནའང་རེད། འཚེ་བ་མི་བྱེད་པ་ཞེས་པའི་མིག་ལྟོས་ཡག་པོ་ཞིག་ཡོད། ད་དུང་ང་ཚོའི་འཛམ་གླིང་ལ་ཞི་བདེ་དགོས་ན་རྒྱ་གར་གྱི་འཚེ་བ་མེད་པའི་ལྟ་བ་དང་སྤྱོད་པ་རྒྱ་སྐྱེད་གཏོང་ཐུབ་དགོས། ཆོས་ལ་དད་པ་བྱེད་མ་བྱེད་སོ་སོ་སྒེར་གྱི་དོན་དག་རེད། འཚེ་བ་མི་བྱེད་པའི་རྒྱུ་མཚན་ཆོས་ལ་བརྟེན་ནས་བསམ་བློ་གཏང་བ་ཡིན་ནའང་ཧ་ཅང་ཡག་པོ་རེད། གལ་སྲིད་ཆོས་མེད་ནའང་འཚེ་བ་མི་བྱེད་པ་དེ་གཙོ་བོ་ཕྱིན་པ་ཡིན་ན་ཧ་ཅང་ཡག་པོ་རེད་འདུག དེར་བརྟེན། རྒྱ་གར་འཚེ་བ་མི་བྱེད་པའི་རྒྱལ་ཁབ་ཅིག་ཆགས་ཡོད། ཆོས་ལུགས་རིས་མེད་ཀྱང་ཆགས་ཡོད། འཛམ་གླིང་གི་ཆོས་ལུགས་ཚང་མ་རྒྱ་གར་ནང་ཡོད་པ་རེད། ང་ཚོ་རྒྱ་གར་ནང་བཙན་བྱོལ་བ་བྱས་ནས་བསྡད་ཡོད་དུས་སྐལ་བ་བཟང་པོ་རེད་འདུག ཆོས་ལུགས་རིས་མེད་ཀྱི་ཆོས་ལུགས་ཡོད་པ་དང་། གཙོ་བོ་འཚེ་བ་མེད་ལ་བརྟེན་སྡོད་མཁན་ནང་ང་ཚོ་ཡོད་པ་དེ་ང་ཚོའི་ལས་དང་སྨོན་ལམ་གྱི་འབྲེལ་བ་ཡག་པོ་བྱུང་བ་རེད་ལ། ཚང་མའི་སྡོད་ས་དེ་འཚེ་བ་མེད་པའི་ལུང་པ་ཞིག་ནང་བསྡད་པ་ནང་བཞིན་སོ་སོ་རང་གིས་ཉིན་རེ་བཞིན་དུ་བསམ་བློ་གཏོང་སྟངས་དེ་གཞན་ལ་འཚེ་བ་མི་བྱེད་པ། མཐའ་གཅིག་ཏུ་བརྩེ་བ་བྱེད་པའི་བསམ་བློ་གཏོང་ཐུབ་པ་བྱུང་ན་ཡག་པོ་ཡོང་གི་རེད། གཞན་དག་ཞུ་རྒྱུ་གང་ཡང་མི་འདུག ཅེས་དང་། མཐའ་དོན་མགོན་པོ་གང་ཉིད་མཆོག་གིས། དེ་རིང་མངའ་སྡེ་གཞུང་གི་གྲ་སྒྲིག་གནང་རྒྱུ་དང་། རྒྱ་གར་དབུས་གཞུང་ནས་ཀྱང་འབྲེལ་བ་ཡོད་པ་ཡིན་དུས་ཐུགས་རྗེ་ཆེ་ཞེས་ཞུ་རྒྱུ་ཡིན། གཞན་བྱམས་བརྩེ་ལག་ལེན་འགེལ་མཁན་ལ་ཐུགས་རྗེ་ཆེ་བརྗོད་པ་གཞིར་བཟུང་སོ་སོ་རང་ཉིད་ནས་ཉིན་ཞག་དུས་དྲུག་ཏུ་བྱམས་བརྩེའི་ཉམས་ལེན་བྱ་རྒྱུ་དེ་ཧ་ཅང་གལ་ཆེན་པོ་རེད། དེ་རིང་འདིར་གནས་ནི་ཁྱད་པར་ཅན་རེད། གྲང་ངར་ཆེན་པོ་དང་། ལྷག་པ་གྲང་མོ་འདུག བདུན་དང་པོ་ས་གས། བདུན་གཉིས་པ་ཆུ་གས། བདུན་གསུམ་པ་བཙུན་པའི་དབུ་གས་ཞེས་པ་ལྟར་དེ་རིང་གནམ་དགའ་རབ་གྲང་མོ་འདུག བཙུན་པའི་དབུ་ལ་ཟེར་ལྟ་བུ་ཕྲན་བུ་རྒྱག་གི་འདུག གལ་ཆེ་ཤོས་ང་ཚོས་ཉིན་ཞག་ཕྲུགས་གཅིག་གི་མི་ཚེ་སྐྱེལ་བའི་ནང་སེམས་པ་བཟང་པོ་བྱང་ཆུབ་ཀྱི་སེམས་ཀྱིས་ཟིན་པ་བྱས་ཏེ་གཞན་ཕན་གཙོ་བོ་བྱས་ཏེ་མི་ཚེ་བསྐྱལ་རྒྱུ་དང་། གཞན་ཕན་སྒྲུབ་དུས་དངོས་ཡོད་ཀྱི་གནས་ཚུལ་ལ་རན་པ་ཞིག་ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱིས་བརྟག་དཔྱད་བྱས་ནས་དངོས་ཡོད་གནས་ཚུལ་གཞན་ལ་ཁ་ཡོད་ལག་ཡོད་ཀྱིས་ཕན་ཐོགས་ཡོད་པ་ཞིག་དང། བྱང་ཆུབ་ཀྱི་སེམས་ཁ་ཡོད་ལག་ཡོད་ཐོག་ནས་གཞན་ཕན་སྒྲུབ་དགོས། དེ་ང་ཚོ་ཚང་མས་བྱེད་དགོས་པ་ཡིན། ཐུགས་རྗེ་ཆེ་ཞུ་རྒྱུ་ཡིན། ཞེས་བཀའ་སློབ་བཀའ་དྲིན་སྩལ་གྲུབ་རྗེས་ཀརྨ་ཆུང་དག་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་རྒྱལ་ཁའི་ངང་གྲོལ་ཡོད།

༧གོང་ས་ཏཱ་ལའི་བླ་མ་བོད་དང་རྒྱ་གར་གནའ་བོའི་རིག་གཞུང་ལྟེ་གནས་ཁང་གི་རྩིག་རྨང་འདིང་འཇོག་གི་མཛད་སྒོའི་དམིགས་བསལ་སྐུ་མགྲོན་དུ་རྒྱ་གར་དབུས་གཞུང་ཁྲིམས་དང་དྲང་བདེན་བློན་ཆེན་སྐུ་ཞབས་ཀི་རན་རི་ཇི་ཇུ་མཆོག་དང་། ས་སྐྱ་༧གོང་མ་ཁྲི་རིན་པོ་ཆེ་མཆོག དགའ་ལྡན་ཁྲི་ཐོག་བརྒྱ་དང་བཞི་པ་རྗེ་བཙུན་བློ་བཟང་བསྟན་འཛིན་མཆོག ས་སྐྱ་ཁྲི་འཛིན་ཞེ་གཉིས་པ་དང་ཞེ་གསུམ་པ། བྷི་ཧར་མངའ་སྡེའི་སོ་ནམ་ཞིང་ལས་བློན་ཆེན་སྐུ་ཞབས་ཀུ་མཱར་སརྦ་ཇིཏ་མཆོག མཁན་བླ་སྤྲུལ་རྣམ་པ། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག གཞན་ཡང་གནད་ཡོད་སྐུ་མགྲོན་ཁག་གཅིག་ལྷན་ཞུགས་གནང་ཡོད་པ་བཅས།།