༄༅། །འདི་གར་ཐའེ་ཝན་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༡༢ ཚེས་ ༣༠ ཉིན་ཐའེ་ཝན་ཆབ་སྲིད་གཙུག་ལག་སློབ་གཉེར་ཁང་གི་སློབ་དཔོན་ཆེ་མོ་ལྕམ་ཁྲིན་ནེ་ཧྭ་ལགས་ནས་སློབ་གྲྭ་དེའི་མི་རིགས་སྡེ་ཚན་གྱི་སློབ་ཕྲུག་ ༡༥ འཁྲིད་དེ་སྐུ་ཚབ་དོན་གཅོད་ལས་ཁུངས་སུ་བོད་ཀྱི་གནད་དོན་སྐོར་རྒྱུས་ལོན་བྱེད་པར་བཅར་བ་དང་། སྐབས་དེ་དུས་སྐུ་ཚབ་དོན་གཅོད་འབའ་སྐལ་བཟང་རྒྱལ་མཚན་ལགས་ནས་ཆུ་ཚོད་གཅིག་རིང་སློབ་ཕྲུག་ཚོར་བོད་ཅེས་པའི་ཐ་སྙད་གྱི་གོ་དོན་དང་། རྒྱ་དམར་གཞུང་གིས་བོད་དེ་རྒྱ་ནག་གི་མངའ་སྡེ་ཁག་ཏུ་བཅད་གཏུབས་བྱས་སྟངས་རྒྱ་དམར་གྱིས་བོད་ལ་བཙན་འཛུལ་དབང་བསྒྱུར་བྱས་རྗེས་བོད་མི་ཚོར་ལོ་རྒྱུས་ཐོག་བྱུང་མྱོང་མེད་པའི་དྲག་གནོན་དམར་གསོད་དང་གཏོར་བཤིག་ཚབས་ཆེན་ཡ་ང་བའི་གནས་ཚུལ་ཇི་བྱུང་། ༧གོང་ས་སྐྱབས་མགོན་ཆེན་པོས་དབུ་འཁྲིད་པའི་བོད་ཀྱི་ཁྲིམས་མཐུན་གཞུང་རྒྱ་གར་ལ་བཙན་བྱོལ་དུ་འབྱོར་རྗེས་བོད་དོན་བདེན་མཐའ་གསལ་ཆེད་འཐབ་རྩོད་ཇི་བྱས་དང་། བཙན་བྱོལ་གྱི་བརྒྱུད་རིམ་ནང་དུ་བོད་ཀྱི་ཆོས་དང་རིག་གཞུང་ཉམས་པ་སླར་གསོ་དང་མི་ཉམས་གོང་སྤེལ་ཇི་བྱས་དཀའ་སྡུག་གི་ལོ་ཟླ། བཙན་བྱོལ་བོད་མིའི་མང་གཙོའི་འཕེལ་རིམ་ནས་ད་ལྟ་བོད་དོན་ཐག་གཅོད་གཉིས་སྨན་དབུ་མིའི་ལམ་གྱི་སྲིད་བྱུས་དང་རྒྱ་གཞུང་གི་དེར་འཛིན་པའི་ལང་ཕྱོགས། གཞན་ཡང་༧གོང་ས་སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞི་དང་ཐའེ་ཝན་དུ་ཐོག་མ་ཆིབས་བསྒྱུར་གནང་བའི་བརྒྱུད་རིམ་ལས་སྐུ་ཚབ་དོན་གཅོད་ལས་ཁུངས་གསར་འཛུགས་དང་འབྲེལ། དོན་ཁང་གི་ལས་གཞི་ཁག་ངོ་སྤྲོད་མཐིལ་ཕྱིན་ཞུས་རྗེས། དོན་ཁང་ནས་འགྲེམ་སྤེལ་ཞུས་པའི་བོད་དོན་ཁྱབ་བསྒྲགས་ཀྱི་དེབ་འགའ་དང། གཞན་ཡང་གངས་ལྗོངས་དཔེ་སྐྲུན་ཁང་གི་དེབ་ཁག་ཀྱང་ངོ་སྤྲོད་ཞུས་རྗེས། སློབ་ཕྲུག་ཚོས་དོགས་འདྲི་ཕེབས་པ་ཁག་ལ་ལན་འདེབས་ཀྱང་ཞུས་ཡོད་པ་རེད།
སྐབས་དེར་ཐའེ་ཝན་སྐུ་ཚབ་དོན་གཅོད་ལས་ཁུངས་ཀྱི་དྲུང་ཆེ་ནས་ད་བར་བོད་མིའི་སྒྲིག་འཛུགས་ནང་ཞབས་ཞུ་སྒྲུབ་བཞིན་པའི་ཉམས་མྱོང་དང་འབྲེལ་ནས་བུད་མེད་ཀྱིས་སྤྱི་ཚོགས་ནང་འགན་འཁུར་སྣེ་ཁྲིད་བྱ་རྒྱུ་གལ་ཆེ་ཇི་ལྟར་ཡིན་སྐོར་འགྲེལ་བརྗོད་དང་། ཡང་༧དཔལ་ལྡན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་རྒྱ་ཡིག་དྲ་བརྙན་ཚན་པའི་ལས་བྱེད་ཚེ་རིང་སྒྲོལ་མ་ལགས་ནས་རང་ཉིད་བོད་ནས་འབྱོར་བ་ཞིག་ཡིན་དུས་བོད་མིའི་སྒྲིག་འཛུགས་ནང་ལས་ཀ་བྱེད་བཞིན་པའི་བརྒྱུད་རིམ་ནང་ཕྱིར་བོད་ནང་ཁོ་མོའི་ནང་ལ་རྒྱ་གཞུང་གིས་དཀའ་ངལ་ཇི་ལྟར་སྤྲོད་བཞིན་པའི་སྐོར་འགྲེལ་བརྗོད་ཞུས་པ་དེས་དེར་ཕེབས་དགེ་རྒན་དང་སློབ་ཕྲུག་ཚོར་ཚོར་སྣང་དམིགས་བསལ་ཞིག་བསྐྲུན་གནང་ཡོད་པ་རེད།
ཕྱི་ཟླ་ ༡༢ ཚེས་ ༡༦ ཉིན་ཐའེ་ཝན་རིག་གཞུང་ལྷན་ཁང་ནས་ཐའེ་ཝན་དུ་དགའ་ལྡན་ལྔ་མཆོད་དུས་དྲན་ཐེངས་དང་པོ་གོ་སྒྲིག་ཞུས་པའི་གསར་འགོད་ལྷན་ཚོགས་ཐོག་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་དང་། སོག་པོའི་གཞུང་ཚབ་གཉིས་སྐུ་མགྲོན་གཙོ་བོར་གདན་འདྲེན་ཞུས་པ་ལྟར་ཆེད་ཕེབས་ཀྱིས་ཐའེ་ཝན་རིག་གཞུང་ལྷན་ཁང་གི་བློན་ཆེན་གཞོན་པ་དང་། གྲོས་ཚོགས་འཐུས་མི། གཞན་ཡང་རིག་གཞུང་ལྷན་ཁང་གི་བོད་སོག་རིག་གཞུང་སྡེ་ཚན་གྱི་འགན་འཛིན་བགྲེས་གཞོན་དང་ལས་བྱེད་སོགས་དང་ཐུག་འཕྲད་གནང་སྟེ་སྤྱི་ཡོངས་བོད་ཀྱི་རིག་གཞུང་དུས་སྟོན་སྐོར་གྱི་བསམ་ཚུལ་དང་། ཐའེ་ཝན་གཞུང་གིས་བོད་མི་ཚོར་བོད་རིགས་སྤུན་ཟླ་ཞེས་འབོད་བཞིན་པ་དེས་ཆབ་སྲིད་ཀྱི་གོ་བརྡ་ཐད་རྒྱ་གཞུང་གིས་བརྗོད་པ་ནང་བཞིན་བོད་དེ་རྒྱ་ནག་གི་མངའ་འོག་ཡིན་ཚུལ་གོ་རྒྱུ་ཡོད་པས་གཟབ་ནན་དགོས་པ་དང་། ལྷག་པར་དུ་གཞུང་འབྲེལ་བོད་ཀྱི་རིག་གཞུང་དུས་སྟོན་གཉེར་སྐབས་བོད་མི་གདན་འདྲེན་མ་ཞུས་པར། ཐའེ་ཝན་མི་རང་ནས་བོད་ཀྱི་རིག་གཞུང་འཁྲབ་སྟོན་བྱེད་བཅུག་པ་ཡིན་ན་བོད་ཀྱི་རིག་གཞུང་ངོ་མ་ཆགས་ཀྱི་མེད་སྐོར་གྱི་བསམ་ཚུལ་སྦས་གསང་མེད་པར་བརྗོད་ཡོད་པ་རེད།
ཕྱི་ལོ་ ༢༠༢༢ ཟླ་ ༡༢ ཚེས་ ༢༣ ཉིན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་དང་། ལྟ་གྲུབ་དགེ་རྒན་བསྟན་འཛིན་རྣམ་གྲོལ་རིན་པོ་ཆེ། གངས་ལྗོངས་དཔེ་སྐྲུན་ཁང་གི་སྤྱི་གཉེར་ལའེ་གཡུ་ནི་བཅས་ཞོན་ཙང་གཙུག་ལག་སློབ་གཉེར་ཁང་དུ་བཅར་ཏེ་སློབ་གྲྭ་དེའི་ཆོས་དང་རིག་གཞུང་སྡེ་ཙན་གྱི་འགན་འཛིན་སློབ་དཔོན་ཆེན་པོ་བཙུན་མ་ཀྲའོ་ཧེ་ལགས་དང་། གཞན་ཡང་ཐའེ་ཝན་བོད་བརྒྱུད་ནང་བསྟན་ཞིབ་འཇུག་ཚོགས་པའི་ཚོགས་གཙོ་མཁན་པོ་འཇིག་མེད་རྣམ་རྒྱལ་ལགས་དང་། ཚོགས་གཞོན་ཟུར་པ་ཧྭ་ཤིང་རིན་པོ་ཆེ་སོགས་དང་མཉམ་དུ་ཚོགས་འདུ་བསྐོངས་ཏེ། སློབ་གྲྭ་དེར་ད་ལྟ་བོད་ཀྱི་རིག་གཞུང་ངོ་སྤྲོད་ཀྱི་སློབ་ཚན་འགྲོ་བཞིན་པ་སློབ་དུས་སྔོན་མའི་ཉམ་མྱོང་ཕྱོག་བསྡོམས་དང་། མ་འོངས་མུ་མཐུད་སློབ་ཚན་འཁྲིད་ཕྱོགས། སློབ་གྲྭ་དེའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ལས་དོན་སྤེལ་ཕྱོགས་བཅས་ཀྱི་སྐོར་གོ་བསྡུར་ཞུས་པའི་མཐའ་མར་སློབ་དུས་རྗེས་མའི་སློབ་ཁྲིད་དེ་བཞིན་བསྟན་འཛིན་རྣམ་གྲོལ་རིན་པོ་ཆེ་མཆོག་གིས་འགན་གཙོ་བོར་འཁུར་བའི་ཐོག་བོད་བརྒྱུད་ནང་བསྟན་ངོ་སྤྲོད་ཀྱི་སློབ་ཚན་མུ་མཐུད་འཁྲིད་རྒྱུ་ཐུགས་གཏན་འཁེལ་བ་དང་། དེའང་ཐུབ་བཀྭན་གྲུབ་མཐའ་གཙོ་བོར་བཟུང་སྟེ་སློབ་ཚན་འཁྲིད་རྒྱུ་དང་ཆབས་ཅིག་ཞིབ་ཕྲའི་སློབ་གཞི་སྒྲིག་སྟངས་དང་། དགེ་རྒན་སུ་དང་སུ་གདན་འདྲེན་ཞུ་དགོས་བཅས་ཐའེ་ཝན་དོན་ཁང་དང་ལྟ་གྲུབ་དེ་རྒན་རྒན་བཅས་བོད་པའི་ཕྱོགས་ནས་ཐག་གཅོད་བྱེད་རྒྱུ་གཏན་འབེབས་བྱུང་བ་དང་། བོད་བརྒྱུད་ནང་བསྟན་ཞིབ་འཇུག་ཚོགས་པའི་ལས་ཀ་སྒྲ་བསྒྱུར་གཙོ་བོ་མ་ཡིན་པར། ཐའེ་ཝན་དུ་བོད་བརྒྱུད་ནང་བསྟན་གྱི་གནས་སྟངས་ཞིབ་འཇུག་གཙོ་བོར་བཟུང་སྟེ་འབྲེལ་ཡོད་ཁྱད་ལས་པ་དང་། སློབ་ཕྲུག་ཚོར་རྩོམ་བསྡུར་གྱི་ལས་གཞི་འཆར་རྩིས་རིམ་བཞིན་གཏན་འབེབས་བྱ་རྒྱུའི་ཐག་གཅོད་བྱུང་ཡོད་པ་མ་ཟད། མ་འོངས་པར་བསྟན་འཛིན་རྣམ་གྲོལ་རིན་པོ་ཆེ་སློབ་གྲྭ་དེའི་སློབ་དཔོན་ལས་རོགས་སུ་བསྐོ་གཞག་འབྱུང་ཐབས་ཀྱི་ཡིག་ཆ་ཁག་ཕུལ་ཟིན་པ་དང་། བོད་ཀྱི་རིག་གནས་ངོ་སྤྲོད་ཀྱི་སློབ་ཚན་འཁྲིད་པར་དགེ་རྒན་དང་ལས་བྱེད་ལ་ལས་དོད་ཕྲན་བུ་གནང་དགོས་པའི་སྔོན་རྩིས་ཐའེ་ཝན་བོད་བརྒྱུད་ནང་བསྟན་ཞིབ་འཇུག་ཚོགས་པའི་ཚོགས་གཙོ་ནས་གནང་རྒྱུ་ཡིན་པའི་ཞལ་བཞེས་བཟང་པོ་ཐོབ་ཡོད་པ་བཅས་དགའ་འོས་པའི་བྱ་བ་བཟང་པོ་མང་དག་སྤེལ་ཐུབ་ཡོད་པ་རེད། །
