༄༅། །ཕྱི་ལོ་ ༢༠༢༢ ཟླ་ ༡༢ ཚེས་ ༢༧ ཉིན་བོད་མིའི་སྒྲིག་འཛུགས་ཀྱི་མགྲིན་ཚབ་པ་དང་ཕྱི་དྲིལ་ལས་ཁུངས་ཀྱི་དྲུང་ཆེ་ལས་འཕར་བསྟན་འཛིན་ལེགས་བཤད་ལགས་ཀྱིས་རྡ་ས་འཛིན་སྐྱོང་སྦྱོང་བརྡར་ཁང་དུ་རྒྱ་བལ་གཉིས་ནས་ཕེབས་པའི་བཙན་བྱོལ་བོད་མིའི་གཏན་ཉིན་སློབ་གྲྭ་གྲངས་ ༢༧ གྱི་ཁྱོན་བསྡོམས་འཛིན་རིམ་བཅུ་པའི་སློབ་ཕྲུག་གྲངས་ ༡༡༤ ལ་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་ཀྱི་ངོ་བོ་དང་། བྱུང་རིམ། གྲུབ་འབྲས་སོགས་ཀྱི་སྐོར་ངོ་སྤྲོད་གསུང་བཤད་གནང་ཡོད་པ་མ་ཟད། སྲིད་བྱུས་དེས་བོད་རང་བཙང་བསྐྱར་གསོ་བྱས་ཏེ་ཁ་བྲལ་འགྲོ་རྒྱུའི་མཐའ་དང་། ད་ལྟའི་བོད་ནང་གི་དྲག་གནོན་གྱི་གནས་སྟངས་རང་འཇགས་བསྡད་རྒྱུའི་མཐའ་གཉིས་ཀྱི་དབུས་ནས་བོད་དོན་དཀའ་རྙོག་སེལ་ཐབས་བྱེད་ཀྱི་ཡོད་སྟབས། བོད་རྒྱ་གཉིས་ཀར་ཁེ་ཕན་ཡོད་པའི་སྐོར་དང་། དེ་བཞིན་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆའི་སྐོར་གསུངས་ཡོད།
གཞན་ཡང་ཁོང་གིས། དབུ་མའི་ལམ་གྱི་སྲིད་བྱུས་སྐོར་གོ་རྟོགས་ཡོང་སླད་སློབ་ཕྲུག་རྣམས་ཀྱིས་དཔེ་དེབ་གང་མང་ཀློག་དགོས་པའི་གལ་གནད་དང་། ད་ལྟའི་བོད་ནང་གི་ཛ་དྲག་གི་གནས་སྟངས། སློབ་ཕྲུག་རྣམས་ཀྱིས་བོད་དོན་སྐོར་དོ་སྣང་མང་ཙམ་གནང་དགོས་པའི་གལ་གནད་སོགས་ཀྱི་སྐོར་གསུངས་རྗེས་སློབ་ཕྲུག་གི་དྲི་བ་ཁག་ལ་ལན་འདེབས་གནང་ཡོད་པ་བཅས། །
