༄༅། །ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་ (Congressional Executive Commission on China) ཟུང་འབྲེལ་ཚོགས་གཙོ་དང་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ཇེབ་མར་ཀི་ལི་ (Jeff Merkley) མཆོག་དང་། ཨ་རིའི་གྲོས་གོང་མའི་འཐུས་མི་དང་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་མི་སྐུ་ཞབས་ཊོ་ཌི་ཡོན་གྷི་ (Todd Young) མཆོག ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་པེ་ཊིག་ལི་ཧེ་ (Patrick Leahy) མཆོག་བཅས་ལས་གྲུབ་པའི་ཨ་རིའི་མང་གཙོ་ཚོགས་པ་དང་སྤྱི་མཐུན་ཚོགས་པ་གཉིས་ཀྱི་གྲོས་ཚོགས་འཐུས་མི་ཁོང་རྣམ་པ་གསུམ་གྱིས་ཕྱི་ལོ་ ༢༠༢༢ ཟླ་ ༡༢ ཚེས་ ༢༠ རེས་གཟའ་མིག་དམར་ཉིན་ཨ་རིའི་གྲོས་ཚོགས་གོང་མའི་ནང་བོད་རྒྱའི་དཀའ་རྙོག་སེལ་ཐབས་སུ་རྒྱབ་སྐྱོར་གྱི་ཁྲིམས་འཆར་ཞིག་ངོ་སྤྲོད་གནང་བར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་ཁོང་རྣམ་པ་གསུམ་ལ་ཐུགས་རྗེ་ཆེ་ཞུའི་གསུང་འཕྲིན་ཞིག་ཕུལ་གནང་ཡོད།

དེ་ཡང་གསུང་འཕྲིན་ནང་དཔལ་ལྡན་སྲིད་སྐྱོང་མཆོག་གིས། ཨ་རིའི་མང་གཙོ་ཚོགས་པ་དང་སྤྱི་མཐུན་ཚོགས་པ་གཉིས་ཀྱི་གྲོས་ཚོགས་འཐུས་མི་ཁོང་རྣམ་པ་གསུམ་གྱིས་ཨ་རིའི་གྲོས་ཚོགས་གོང་མའི་ནང་ཁྲིམས་འཆར་ངོ་སྤྲོད་གནང་བ་དེས་ང་ཚོས་ཡུན་རིང་པོར་བོད་རྒྱའི་དཀའ་རྙོག་དེ་དབུ་མའི་ལམ་གྱི་སྲིད་བྱུས་བརྒྱུད་སེལ་ཐབས་བྱེད་བཞིན་པར་རམ་འདེགས་བྱ་ངེས་རེད་ལ། དེ་བཞིན་ཁྲིམས་འཆར་དེས་བོད་མི་སྤྱི་དང་། ལྷག་པར་སོ་སོའི་རིག་གཞུང་དང་ངོ་བོ་སོགས་མི་ཉམས་རྒྱུན་འཛིན་བྱེད་རྒྱུའི་གཞི་རྩའི་ཐོབ་ཐང་ཙམ་མེད་མཁན་གྱི་བོད་ནང་གི་བོད་མི་རྣམས་ལ་སེམས་ཤུགས་བསྐྱེད་དུ་འཇུག་ངེས་ཡིན། ཞེས་དང་།

ཨ་རིའི་གཞུང་གིས་རྒྱུན་དུ་བོད་དོན་སླད་རྒྱབ་སྐྱོར་གནང་གི་ཡོད། དེ་བཞིན་ཨ་རིའི་གྲོས་ཚོགས་གོང་མའི་འཐུས་མི་རྣམ་པས་ཁྲིམས་འཆར་དེ་ཨ་རིའི་སྲིད་བྱུས་ཤིག་ཏུ་བསྒྱུར་གནང་ཐུབ་ཚེ་དེས་ཏན་ཏན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་བམ་བོད་མིའི་སྒྲིག་འཛུགས་ཀྱི་སྐུ་ཚབ་དང་རྒྱ་ནག་གཞུང་གི་བར་བོད་རྒྱའི་གྲོས་མོལ་བསྐྱར་གསོ་ཡོང་བར་མཐུན་འགྱུར་བྱ་ཐུབ་ངེས་རེད། ཅེས་གསུངས་ཡོད། །