༄༅། །བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས་རྡ་ས་འཛིན་སྐྱོང་སྦྱོང་བརྡར་ཁང་དུ་ཕྱི་ལོ་ ༢༠༢༢ ཟླ་ ༡༢ ཚེས་ ༢༡ ནས་ ༢༧ བར་གཏན་ཉིན་སློབ་གྲྭ་ཁག་གི་འཛིན་རིམ་བཅུ་པའི་སློབ་ཕྲུག་རྣམས་ལ་འགོ་ཁྲིད་ནུས་པ་སྐྱེད་སྲིང་གི་ཟབ་སྦྱོང་གོ་སྒྲིག་གནང་ཡོད་པ་དང་། ཟབ་སྦྱོང་དབུ་འབྱེད་མཛད་སྒོར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། ཤེས་རིག་ལས་ཁུངས་ཀྱི་ཤེས་ཡོན་སྡེ་ཚན་གྱི་དེང་སྲོལ་འགན་འཛིན་གཅིག་ལྕོགས་དྲུང་འཕར་བསྟན་འཛིན་རྡོ་རྗེ་ལགས། ཤེས་ཡོན་འགན་འཛིན་དྲུང་གཞོན་དངོས་གྲུབ་བསྟན་པ་ལགས། མདུན་ལམ་སློབ་སྟོན་ཚན་པའི་ཟུང་དྲུང་འཇམ་དབྱངས་དབང་རྒྱལ་ལགས། དེ་བཞིན་འབྲེལ་ཡོད་ལས་བྱེད་དང་། གཏན་ཉིན་སློབ་གྲྭ་གྲངས་ ༢༧ གྱི་ཁྱོན་བསྡོམས་འཛིན་རིམ་བཅུ་པའི་སློབ་ཕྲུག་གྲངས་ ༡༡༤ ཙམ་ཕེབས་ཡོད།
དེ་ཡང་མཛད་སྒོའི་ཐོག་མར་ཤེས་རིག་ལས་ཁུངས་ཀྱི་ཤེས་ཡོན་སྡེ་ཚན་གྱི་དེང་སྲོལ་འགན་འཛིན་གཅིག་ལྕོགས་དྲུང་འཕར་བསྟན་འཛིན་རྡོ་རྗེ་ལགས་ཀྱིས་ཕེབས་བསུ་དང་ཟབ་སྦྱོང་ངོ་སྤྲོད་གསུང་བཤད་གནང་ཡོད། དེ་རྗེས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཟབ་སྦྱོང་དབུ་འབྱེད་མཛད་སྒོར་གསུང་བཤད་གནང་སྐབས་གཙོ་བོ་མང་ཚོགས་ཀྱི་དཀའ་ངལ་ཁག་རྒྱུས་ལོན་ཆེད་དུ་བཙན་བྱོལ་བོད་མིའི་གཞིས་ཆགས་ཁག་ཏུ་གཟིགས་སྐོར་ཕེབས་པའི་སྐོར་དང་། འགོ་ཁྲིད་ཅེས་པ་ནི་ཉིན་རེའི་བྱ་གཞག་དང་འབྲེལ་བ་ཡོད་པ། སློབ་ཕྲུག་རྣམས་ཀྱིས་བོད་མིའི་སྒྲིག་འཛུགས་དེ་སོ་སོའི་ནང་ཆེ་ཤོས་དེ་ཡིན་པ་བསམ་དགོས་པ། རྒྱ་གར་གཞུང་ནི་བོད་མི་རྣམས་ལ་བཀའ་དྲིན་ཤིན་ཏུ་ཆེན་པོ་ཡིན་པ་སོགས་ཀྱི་སྐོར་གསུངས། 
གཞན་ཡང་དཔལ་ལྡན་སྲིད་སྐྱོང་མཆོག་གིས་དུས་རབས་བདུན་པ་ནས་དགུ་པ་བར་གྱི་བོད་ཀྱི་ལོ་རྒྱུས་ཀྱི་ཁྱབ་ཁོངས་དང་། བོད་སིལ་བུར་ཐོར་བའི་སྐོར། སྡེ་སྲིད་ཕག་མོ་གྲུ་པ། སྡེ་བ་རིན་སྤུངས་པ། སྡེ་སྲིད་གཙང་པ་བཅས་བར་གྱི་ལོ་རྒྱུས། ༸རྒྱལ་དབང་སྐུ་ཕྲེང་ལྔ་པ་ཆེན་པོ་ནས་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་བར་གྱི་བོད་ཀྱི་ལོ་རྒྱུས། ཕྱི་ལོ་ ༢༠༡༡ ལོར་༸གོང་ས་མཆོག་གིས་ཆབ་སྲིད་ཀྱི་སྐུ་དབང་ཡོངས་རྫོགས་མི་མང་གིས་འོས་འདེམས་བྱས་པའི་འགོ་ཁྲིད་རྣམས་ལ་རྩིས་སྤྲོད་མཛད་པ་ནས་བཟུང་ད་བར་གྱི་བཙན་བྱོལ་བོད་མིའི་གནས་སྟངས་སྐོར།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས། བོད་ནང་རྒྱ་ནག་གཞུང་གིས་ཆུ་མཛོད་ཆེན་པོ་མང་དག་བརྒྱབ་སྟེ་བོད་ཀྱི་ཁྱིམ་མཚེས་རྒྱལ་ཁབ་རྒྱ་གར་གྱིས་གཙོས་ཨེ་ཤི་ཡའི་རྒྱལ་ཁབ་མང་པོར་ཆུའི་དཀའ་ངལ་འཕྲད་བཞིན་པ་དང་། བོད་ཀྱི་ཆོས་དང་རིག་གཞུང་། སྐད་ཡིག་གི་གལ་གནད། རྒྱ་ནག་གཞུང་གིས་རྒྱལ་སྤྱིའི་སྟེང་བོད་ཀྱི་ལོ་རྒྱུས་འཁྱོག་བཤད་བྱས་དང་བྱེད་བཞིན་པ། བོད་པའི་གཞོན་སྐྱེས་རྣམས་ཀྱིས་བོད་ཀྱི་ལོ་རྒྱུས་བལྟ་དགོས་པ། ཆོལ་ཁའི་ཕྱོགས་རིས་གནང་རྒྱུ་མེད་པ། མི་རབས་རྒན་པ་རྣམས་ཀྱིས་སྐུ་ལས་བསྐྱོན་པ་ལ་བརྟེན་ནས་བོད་མིའི་སྒྲིག་འཛུགས་ཚགས་ཚུད་བྱུང་ཡོད་པ་སོགས་ཀྱི་སྐོར་གསུངས། 
མཐར་ཤེས་ཡོན་འགན་འཛིན་དྲུང་གཞོན་དངོས་གྲུབ་བསྟན་པ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་ལེགས་པར་གྲུབ་ཡོད། དབུ་འབྱེད་མཛད་སྒོ་གྲོལ་རྗེས་དཔལ་ལྡན་སྲིད་སྐྱོང་མཆོག་གིས་མ་འོངས་བོད་ཀྱི་འགོ་ཁྲིད་སྐོར་ཟབ་ཁྲིད་གནང་ཡོད། སྤྱིར་ཟབ་སྦྱོང་གི་སྐབས་ཟབ་ཁྲིད་པ་སོ་སོ་ནས་བོད་ཀྱི་མང་གཙོའི་འཕེལ་རིམ་དང་། བོད་ཀྱི་ཁོར་ཡུག་གི་གལ་གནད། ཆོས་ལུགས་ལ་མ་བརྟེན་པའི་བཟང་སྐྱོད། འགོ་ཁྲིད་ཀྱི་ནུས་རྩལ། བོད་ཐོག་རྒྱ་ནག་གིས་འཛིན་པའི་སྲིད་བྱུས། བོད་མིའི་སྒྲིག་འཛུགས། བོད་ཀྱི་ཐ་སྙད། སེམས་ཁམས་འཕྲོད་བསྟེན། དབུ་མའི་ལམ་གྱི་སྲིད་བྱུས། འཚེ་མེད་ཞི་བའི་ལས་འགུལ། དྲ་རྒྱའི་བདེ་འཇགས་སྲུང་སྐྱོབ། ཕོ་མོ་འདྲ་མཉམ། སློབ་ཕྲུག་གི་མདུན་ལམ། ཤེས་རིག་སློབ་ཡོན། དཔེ་ཀློག་སོགས་ཀྱི་སྐོར་ཟབ་སྦྱོང་གནང་རྒྱུ་ཡིན་ཞིང་། སློབ་གྲྭ་སོ་སོའི་སྣེ་ཁྲིད་དགེ་རྒན་གྱིས་སློབ་ཕྲུག་རྣམས་བོད་མིའི་སྒྲིག་འཛུགས་ཀྱི་ལས་ཁུངས་ཁག་ལ་གཟིགས་སྐོར་དང་། ཉེ་འཁོར་གྱི་དགོན་སྡེ་ཁག་ལ་མཆོད་མཇལ་དུ་ཁྲིད་རྒྱུ་ཡིན་པ་བཅས།།
