༄༅། །ཤིས་ལོང་ས་གནས་འགོ་འཛིན་གསར་པ་བསྟན་འཛིན་བསམ་གཏན་ལགས་དང་ས་གནས་འགོ་འཛིན་ལས་ཚབ་ཆོས་སྒྲོན་ལགས་བར་རྩིས་སྤྲོད་རྩིས་ལེན་གྱི་མཛད་སྒོ་ཚོགས་ཡོད་པ་དང་། རྩིས་སྤྲོད་རྩིས་ལེན་གྱི་མཛད་སྒོར་ཕྱོགས་བཞུགས་བོད་མི་མང་སྤྱི་འཐུས་ཚེ་རིང་སྒྲོལ་མ་ལགས་དང་། དགའ་ལྡན་ཆོས་གླིང་དགོན་པའི་མཁན་པོ་དགེ་བཤེས་ངག་དབང་དཔལ་ལྡན་ལགས། ས་གནས་འཐུས་ཚོགས་ཀྱི་ཚོགས་གཙོ་ཤི་ལོག་ཚེ་རིང་ལགས། བོད་མི་མང་སྤྱི་འཐུས་ཟུར་པ་དབྱངས་ཅན་སྒྲོལ་དཀར་ལགས། ས་གནས་བོད་རང་དབང་བདེན་པའི་ལས་འགུལ་ཚོགས་པའི་དྲུང་ཡིག་བསོད་ནམས་ལགས། ས་གནས་བུད་མེད་ཚོགས་པའི་ཚོགས་གཙོ་ཚེ་སྐྱིད་ལྷ་མོ་ལགས་སོགས་ཕེབས་ཡོད།
རྩིས་སྤྲོད་རྩིས་ལེན་གྱི་མཛད་སྒོ་ལེགས་པར་གྲུབ་རྗེས་ས་གནས་འགོ་འཛིན་གསར་པ་བསྟན་འཛིན་བསམ་གཏན་ལགས་ཀྱིས་ས་གནས་མི་མང་དང་ཐུག་འཕྲད་ཀྱིས་ངོ་སྤྲོད་གསུང་བཤད་གནང་ཡོད་པ་དང་། སྐབས་དེར་ས་གནས་བོད་མི་རྣམས་ཀྱིས་ས་གནས་འགོ་འཛིན་གསར་པ་བསྟན་འཛིན་བསམ་གཏན་ལགས་ལ་ཕེབས་བསུའི་ཁ་བཏགས་ཕུལ་ཏེ་ནུས་པ་མཉམ་སྤུངས་གནང་རྒྱུ་ཡིན་སྐོར་གསུངས་ཡོད་པ་བཅས།།
