༄༅། །ཕྱི་ལོ་ ༢༠༢༢ ཟླ་བ་ ༡༢ ཚེས་ ༡༤ རེས་གཟའ་ལྷག་པ་ཉིན་ཁེ་ན་ཌའི་གྲོས་ཚོགས་འོག་མའི་ནང་དབུ་མའི་ལམ་གྱི་སྲིད་བྱུས་དང་། དེ་བཞིན་བོད་མིའི་སྒྲིག་འཛུགས་ཀྱི་སྐུ་ཚབ་དང་རྒྱ་ནག་གཞུང་བར་གྲོས་མོལ་བསྐྱར་གསོ་ཡོང་ཐབས་སུ་སྤྱི་མོས་ཀྱིས་གྲོས་ཆོད་གཏན་འབེབས་གནང་ཡོད།

དེ་ཡང་ཕྱི་ཚེས་ ༡༣ ཉིན་ཁེ་ན་ཊའི་གྲོས་ཚོགས་འཐུས་མི་དང་བོད་དོན་རྒྱབ་སྐྱོར་བ་སྐུ་ཞབས་གྷར་ནེཊ་ཇི་ནུ་སི་ (Garnett Genuis) ལགས་ཀྱིས་བོད་མི་ཡོངས་ལ་མིང་དོན་མཚུངས་པའི་རང་ཐག་རང་གཅོད་ཀྱི་ཐོབ་ཐང་ལ་རྒྱབ་སྐྱོར་གྱི་གྲོས་འཆར་ཞིག་ཁེ་ན་ཊའི་གྲོས་ཚོགས་འོག་མའི་ནང་བཏོན་གནང་ཡོད།

སྐུ་ཞབས་གྷར་ནེཊ་ཇི་ནུ་སི་ལགས་ཀྱིས་ཊུ་ཝི་ཊར་དྲ་ལམ་བརྒྱུད་གསུང་དོན། ཁེ་ན་ཌའི་གྲོས་ཚོགས་ནང་སྤྱི་མོས་ཀྱིས་དབུ་མའི་ལམ་དང་རྒྱ་ནག་གི་རྩ་ཁྲིམས་ཀྱི་སྒྲོམ་གཞིའི་ནང་གསལ་བའི་བོད་མི་ཡོངས་ལ་མང་དོན་མཚུངས་པའི་རང་སྐྱོང་འཐོབ་ཐབས་སུ་རྒྱབ་སྐྱོར་གྱི་གྲོས་ཆོད་གཏན་འབེབས་གནང་ཡོད་པ་དང་། བོད་མི་ཚོས་འགོ་ཁྲིད་དེ་ཞུ་གཏུག་གི་ལས་འགུལ་སྤེལ་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་ཡོད་པ་བཅས།།