༄༅། །ཁེ་ན་ཊའི་གྲོས་ཚོགས་འཐུས་མི་དང་བོད་དོན་རྒྱབ་སྐྱོར་བ་སྐུ་ཞབས་གྷར་ནེཊ་ཇི་ནུ་སི་ (Garnett Genuis) ལགས་ཀྱིས་བོད་མིའི་རང་ཐག་རང་གཅོད་ཐོབ་ཐང་ལ་རྒྱབ་སྐྱོར་གྱི་གྲོས་འཆར་ཞིག་ཁེ་ན་ཊའི་གྲོས་ཚོགས་འོག་མའི་ནང་བཏོན་གནང་ཡོད། ཁོང་གིས་གྲོས་ཚོགས་སུ་ཁེ་ན་ཊས་དབུ་མའི་ལམ་ལ་ངོས་འཛིན་ཐོག་རྒྱ་ནག་གཞུང་དང་བོད་མིའི་སྐུ་ཚབ་བར་གྲོས་མོལ་ཡོང་བར་རྒྱབ་སྐྱོར་གྱིས་བོད་མིར་མིང་དོན་མཚུངས་པའི་རང་སྲིད་རང་སྐྱོང་བརྒྱུད་རང་ཐག་རང་གཅོད་ཀྱི་ཐོབ་ཐང་སྤྲོད་དགོས་པའི་འབོད་སྐུལ་གནང་ཡོད་པ་རེད།
དེ་ཡང་གྲོས་འཆར་ནང་། རྒྱ་ནང་གཞུང་གི་རྩ་ཁྲིམས་འོག་བོད་མི་རྣམས་ནས་མིང་དོན་མཚུངས་པའི་རང་སྲིད་རང་སྐྱོང་ལག་བསྟར་ཆེད་ང་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གམ་ཁོང་གི་སྐུ་ཚབ་ཡང་ན་བོད་མིའི་སྐུ་ཚབ་དང་རྒྱ་ནག་གཞུང་བར་གྲོས་མོལ་ཡོང་བའི་འབོད་སྐུལ་ཞུ་རྒྱུ་ཡིན། ཞེས་འཁོད་ཡོད། གྲོས་ཚོགས་འཐུས་མི་གྷར་ནེཊ་ཇི་ནུ་སི་ལགས་ཀྱིས་དེ་མཚུངས་ཀྱི་གྲོས་འཆར་དེ་སྔོན་ཕྱི་ཟླ་ལྔ་པའི་གྲོས་ཚོགས་འཚོགས་སྐབས་བཏོན་པ་མ་ཟད། དེ་ཉིད་གཏན་འབེབས་ཆེད་མང་མོས་རྒྱབ་སྐྱོར་ཐོབ། དེ་བཞིན་ཁོང་གིས་ཁེ་ན་ཊ་གཞུང་དང་གྲོས་ཚོགས་འཐུས་མི་རྣམས་ནས་གྲོས་ཆོད་གཏན་འབེབས་ཀྱིས་བོད་མིའི་རང་ཐག་རང་གཅོད་ཀྱི་ཐོབ་ཐང་དང་། མིང་དོན་མཚུངས་པའི་རང་སྲིད་རང་སྐྱོང་ལ་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་གནང་ཡོད།
དེ་བཞིན་མུ་མཐུད་ཁོང་གིས། བོད་མིའི་འགོ་ཁྲིད་རྣམས་ནས་རང་ཐག་རང་གཅོད་ཀྱི་ཐོབ་ཐང་བརྒྱུད་རྒྱ་ནག་ནས་རང་བཙན་གཙང་མ་བསྐྱར་གསོ་བྱེད་ཀྱི་མེད། ཁོང་ཚོས་དབུ་མའི་ལམ་བརྒྱུད་རྒྱ་ནག་གཞུང་གི་རྩ་ཁྲིམས་དགོངས་དོན་མིང་དོན་མཚུངས་པའི་རང་སྲིད་རང་སྐྱོང་རྩོད་ཀྱི་ཡོད་ཅེས་གསུངས། དེ་དང་ཆབས་ཅིག་ཁོང་གིས་བོད་མིའི་དབུ་མའི་ལམ་གྱི་སྲིད་བྱུས་དེ་དངོས་ཡོད་དང་མཐུན་པ་གང་ཞིག་ནུས་པ་ལྡན་པའི་འཐབ་རྩོད་ཅིག་ཡིན་པ་མ་ཟད། འདས་པའི་ལོ་ངོ་ ༦༠ ནང་རྒྱ་ནག་གཞུང་གིས་བོད་ཀྱི་ངོ་བོ་རྩ་མེད་གཏང་རྒྱུའི་ཐབས་ཤེས་ཡོད་དགུ་རྩལ་སྤྲུག་བྱས་ཀྱང་སྲིད་བྱུས་དེ་ཉིད་ཉམས་པ་མེད་པར་གནས་ཡོད་ཅེས་དང་།
ཕྱོགས་མཚུངས་ཁོང་གིས་རྒྱལ་སྤྱིས་བོད་ཀྱི་གནད་དོན་ལ་བློ་འཚབ་བྱེད་བཞིན་པར་རྒྱབ་སྐྱོར་དང་སྦྲགས། བོད་རྒྱའི་དཀའ་རྙོག་སེལ་ཐབས་ཀྱི་འབད་རྩོལ་ལ་ཆབ་སྲིད་ཐོག་ནས་རྒྱབ་སྐྱོར་གནང་རྒྱུ་ཡིན་པའི་ཁས་ལེན་དམ་བཅའ་བཞག་སྟེ་བོད་རྒྱའི་དཀའ་རྙོག་མ་སེལ་བར་ངལ་གསོ་རྒྱག་གི་མིན་སྐོར་གསུངས་ཡོད་པ་བཅས།།
