༢༠༡༡ ཟླ་ ༡༠ ཚེས་ ༣༡ རེས་གཟའ་ཟླ་བ།
༄༅། ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༡༠ ཚེས་ ༣༠ ཉིན་ཐེ་ཝན་དུ་གནས་སྡོད་བོད་རིགས་ཚོགས་པས་གཙོ་འགན་བཞེས་ཏེ་ཕྱི་དྲོ་ཆུ་ཚོད་ ༢ ནས་ ༤ བར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་གི་མཆོད་ཁང་དུ་བོད་ཀྱི་དཔའ་བོ་དཔའ་མོ་རྣམས་ཀྱི་ཆེད་མཆོད་འབུལ་སྨོན་ལམ་ཞིག་གོ་སྒྲིག་གནང་ཡོད། དེ་ཡང་ཕྱི་ཟླ་ ༡༠ ཚེས་ ༢༥ ཉིན་བོད་དཀར་མཛེས་ཀྱི་དགེ་འདུན་པ་ཟླ་བ་ཚེ་རིང་ལགས་ཀྱིས་སྐད་སངས་མཐོན་པོས་༸རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པ་ཤོག བོད་ནང་འགྲོ་བ་མིའི་ཐོབ་ཐང་མེད་པའི་འབོད་ཚིག་སྒྲོག་པ་དང་ལྷན་རང་ལུས་མེར་སྲེག་བཏང་གནང་བ་དེ་ནི་ལོ་འཁོར་འདིའི་ནང་བོད་བསྟན་པ་ཆབ་སྲིད་སླད་རང་ལུས་ཞུགས་མེར་སྒྲོན་མཁན་ཐེངས་བཅུ་པ་ཆགས་དེ་ཡོད། དེ་བཞིན་བོད་ཀྱི་ལོ་རྒྱུས་ཐོག་བོད་ཕྱི་ནང་གཉིས་ནས་སྐུ་ལུས་ཞུགས་འབུལ་གནང་མཁན་ཁྱོན་དཔའ་བོ་དཔའ་མོ་བཅུ་གཉིས་དེ་དག་གི་སྙིང་སྟོབས་ལ་གུས་འདུད་དང། བཀའ་དྲིན་ལ་རྗེས་དྲན་གྱི་མཆོད་འབུལ་སྨོན་ལམ་གནང་ཞིང་། དཔའ་བོ་དེ་དག་གི་སྣང་བརྙན་མདུན་མཆོད་མེ་བརྒྱ་ཚར་དང་། ཆོས་ལུགས་རིས་མེད་ཀྱི་བླ་སྤྲུལ་དགེ་བཤེས་དང་། ཐེ་ཝན་དུ་གནས་སྡོད་བོད་རིགས་ཚོགས་པ་དང་ས་གནས་གཞོན་ནུའི་ཚོགས་མི་སོགས་སེར་སྐྱ་མི་གྲངས་ལྔ་བཅུ་ལྷག་མཉམ་འཛོམས་ཀྱིས་སྨོན་ལམ་གསུང་འདོན་དང་མ་ཎི་ཡིག་དྲུག་གསོག་སྒྲུབ་གནང། སྨོན་ལམ་གྲུབ་རྗེས་ཆུ་ཚོད་གཉིས་ལྷག་རིང་ཐེངས་དང་པོར་བོད་མི་སེར་སྐྱ་མཉམ་འཛོམས་ཀྱིས་སྤྱི་སྨན་དགོངས་འཆར་གྱི་བཀའ་བསྡུར་ལྷུག་པོ་གནང་ཞིང་། མཐར་སྤྱི་མོས་བྱུང་བའི་དོན་ཚན་གཉིས་སྐབས་འཕྲལ་ལག་ལེན་བསྟར་རྒྱུའི་དོན་ཚན་དང་པོ། འདི་ལོ་ཕྱི་ཟླ་ ༡༠ ཚེས་ ༡༧ ཉིན་དཔའ་མོ་བསྟན་འཛིན་དབང་མོ་ལགས་ཀྱིས་གཅེས་པའི་ལུས་སྲོག་བློས་གཏོང་གནང་བའི་ཉིན་ཞག་ཞེ་དགུའི་སྐབས་ཐེ་ཝན་དུ་གནས་སྡོད་བོད་མི་རྣམས་ཀྱིས་ཆུ་ཚོད་ཞེ་དགུ་རིང་ཟས་བཅད་ལས་འགུལ་དང་། མཆོད་འབུལ་སྨོན་ལམ་གོ་སྒྲིག་ཞུ་རྒྱུ། དོན་ཚན་གཉིས་པར་ཐེ་ཝན་བོད་ཀྱི་སྐུ་ཚབ་དོན་ཁང་ནས་གོ་སྒྲིག་ཐོག་བོད་བརྒྱུད་ནང་བསྟན་ཆོས་ལུགས་རིས་མེད་ཀྱི་བླ་སྤྲུལ་དགེ་འདུན་མཉམ་འཛོམས་ཀྱིས་ཐེ་ཝན་ནང་བོད་བརྒྱུད་ནང་བསྟན་ལ་གཞི་མེད་སྐྱོན་འཛུགས་བྱེད་མཁན་ཡོད་པ་དེར་གདོང་ལེན་བྱེད་པའམ་གང་དགའ་ཅི་ལེགས་དང་། བོད་བརྒྱུད་ནང་བསྟན་ཁྱབ་སྤེལ་བྱ་ཕྱོགས། རིས་མེད་ཆོས་ལུགས་ཁག་འབྲེལ་ལམ་དང་གོ་རྟོགས་སྤེལ་ཕྱོགས་བཅས་ཀྱི་ཐོག་བགྲོ་གླེང་ཚོགས་འདུ་འཚོགས་དགོས་པའི་གྲོས་འཆར་བྱུང་ཡོད་པ་བཅས།
ཐེ་ཝན་དུ་བོད་ཀྱི་དཔའ་བོ་དཔའ་མོ་རྣམས་ཀྱི་ཆེད་དུ་མཆོད་འབུལ་སྨོན་ལམ་ཚོགས་པ།
གསར་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)
འབྲེལ་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)