༄༅། །ཨོསྟྲེ་ལི་ཡཱའི་ཁེན་བྷེ་ར་ཁུལ་གྱི་བོད་རིགས་མི་མང་དང་ཨོསྟྲེ་ལི་ཡཱའི་བོད་དོན་རྒྱབ་སྐྱོར་བ་རྣམས་ནས་རྒྱ་ནག་གཞུང་ཚབ་ཁང་གི་མདུན་དུ་རྒྱ་ནག་དམར་ཤོག་ཚོགས་པས་བོད་ནང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་དང་གཏོང་བཞིན་པར་ཞི་བའི་སྐད་འབོད་གནང་ཡོད།
དེ་ཡང་ཁེན་བྷེ་ར་བོད་རིགས་མཐུན་ཚོགས་ཀྱི་ཚོགས་གཙོ་སྐལ་བཟང་ཚེ་རིང་ལགས་ཀྱིས། རྒྱ་ནག་གཞུང་གིས་བོད་ནང་གཞི་རྩའི་རང་དབང་དང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བཏང་བ་མ་ཟད། ལྷག་པར་ཏོག་དབྱིབས་གཉན་རིམས་རྩ་གཏོར་གྱི་སྲིད་བྱུས་ལ་ཁ་གཡར་ནས་དམ་བསྒྲགས་ཚད་ལ་བརྒལ་བ་བྱས་པའི་རྐྱེན་གྱིས་བོད་མི་རྣམས་ལ་དཀའ་ངལ་ཧ་ཅང་འཕྲད་ཡོད་སྐོར་འགྲེལ་བརྗོད་གནང་ཡོད།ཁེན་བྷེ་ར་ཐའེ་ཝན་མཐུན་ཚོགས་ཀྱི་ཚོགས་གཙོ་ཡི་སུན་ཁྲིན་ (Dr. Yi-Tsun Chen) ལགས་ཀྱིས། རྒྱ་ནག་དམར་ཤོག་གཞུང་གིས་ཐའེ་ཝན་ནང་ཆབ་སྲིད་ཀྱི་དྲག་གནོན་ཤུགས་ཆེ་བྱས་དང་བྱེད་བཞིན་པ་སོགས་ཀྱི་སྐོར་གསུང་བཤད་གནང་ཡོད། ཡུ་གུར་ཚོགས་པའི་འགོ་ཁྲིད་ནུར་གུལ་སཱ་ཝུ་ཊི་ (Nurgul Sawut) ལགས་ཀྱིས། ཡུ་གུར་བ་རྣམས་ཀྱིས་རྒྱ་ནག་ནང་མི་རིགས་དབྱེ་འབྱེད་དང་དྲང་བདེན་མེད་པའི་དཀའ་ངལ་མྱོང་བཞིན་པ་སོགས་ཀྱི་སྐོར་གསུངས། ཨོསྟྲེ་ལི་ཡཱའི་གྲོས་ཚོགས་འཐུས་མི་ཨན་ཌི་རེའོ་ (Andrew Braddock) ལགས་ཀྱིས། ཨོསྟྲེ་ལི་ཡཱའི་ལྗང་ཁུ་ཆབ་སྲིད་ཚོགས་པའི་ངོས་ནས་རྒྱུན་དུ་བོད་དོན་དང་འགྲོ་བ་མིའི་ཐོབ་ཐང་སླད་མུ་མཐུད་རྒྱབ་སྐྱོར་གནང་བཞིན་པ་སོགས་ཀྱི་སྐོར་གསུངས། ཧོང་ཀོང་བ་ཁི་ལི་ཌི་ཡ་(Claudia Ng) ལགས་ཀྱིས། རྒྱ་ནག་གཞུང་གིས་ཧོང་ཀོང་ངོ་རྒོལ་བ་རྣམས་བཙོན་འཇུག་བྱས་པ་དང་། དེ་བཞིན་ཧོང་ཀོང་བ་རྣམས་རང་ཡུལ་ཧོང་ཀོང་དུ་ལོག་ཐུབ་ཀྱི་མེད་པ་སོགས་ཀྱི་སྐོར་གསུངས། ཆོས་འཁོར་སྒོམ་སྒྲུབ་ཚོགས་པའི་ཚོགས་མི་སུན་ཧྥ་ (Song Fa) ལགས་ཀྱིས་བོད་མི་ཚོ་དང་མཉམ་དུ་དྲང་བདེན་རྩོད་ཀྱི་ཡོད་པའི་སྐོར་གསུངས།
ཨོསྟྲེ་ལི་ཡཱའི་ཁེན་བྷེ་ར་ཁུལ་གྱི་བོད་རིགས་མི་མང་དང་ཨོསྟྲེ་ལི་ཡཱའི་བོད་དོན་རྒྱབ་སྐྱོར་བ་རྣམས་ནས་རྒྱ་ནག་གཞུང་ཚབ་ཁང་གི་མདུན་དུ་བོད་རྒྱལ་ཆེན་པོའི་རྒྱལ་གླུ་བླངས་ནས་བོད་ནང་འགྲོ་བ་མིའི་ཐོབ་ཐང་དང་རང་དབང་མེད་པའི་སྐོར་ཞི་བའི་སྐད་འབོད་གནང་ཡོད་པ་ལྟར། ནིའུ་ཛི་ལེནྜའི་ཨོག་ལེན་ཌི་ས་གནས་བོད་རིགས་མི་མང་དང་། བོད་རྒྱ་མཛའ་གྲོགས་ཚོགས་པ། བོད་ཀྱི་གྲོགས་པོ་སོགས་ནས་ཨོག་ལེན་ཌི་གྲོང་ཁྱེར་ནང་ཡོད་པའི་རྒྱ་ནག་གཞུང་ཚབ་ཁང་གི་མདུན་དུ་འཛམ་གླིང་འགྲོ་བ་མིའི་ཐོབ་ཐང་ཉིན་མོར་ཞི་བའི་སྐད་འབོད་གནང་ཡོད། ཞི་བའི་སྐད་འབོད་གནང་མཁན་ཡོངས་ནས་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་བ་དང་། དམ་བསྒྲགས་ཅན་གྱི་ཏོག་དབྱིབས་གཉན་རིམས་ཀྱི་སྲིད་བྱུས་མཚམས་འཇོག་དགོས་པ་སོགས་ཀྱི་སྐོར་གླེང་སློང་གནང་ཡོད་པ་མ་ཟད། རྒྱ་ནག་གཞུང་གིས་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་དུ་བོད་རྒྱའི་དཀའ་རྙོག་སེལ་ཐབས་སུ་གྲོས་མོལ་དགོས་པའི་འབོད་སྐུལ་གནང་ཡོད་པ་བཅས།།
ཨོསྟྲེ་ལི་ཡཱ་དང་ནིའུ་ཛི་ལེནྜའི་བོད་མི་དང་བོད་དོན་རྒྱབ་སྐྱོར་རྣམས་ནས་འཛམ་གླིང་འགྲོ་བ་མིའི་ཐོབ་ཐང་ཉིན་མོར་ཞི་བའི་སྐད་འབོད་གནང་བ།
གསར་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)
འབྲེལ་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)