༄༅། །ཕྱི་ལོ་ ༢༠༢༢ ཟླ་བ་ ༡༢ ཚེས་ ༡༠ ཉིན་འཛམ་གླིང་མཉམ་འབྲེལ་རྒྱལ་ཚོགས་ནས་འགྲོ་བ་མིའི་ཐོབ་ཐང་གསལ་བསྒྲགས་བསྐྱངས་ནས་ལོ་ངོ་ ༧༤ འཁོར་བའི་དུས་ཆེན་ཉི་འོང་གི་རྒྱལ་ས་ཀྲོག་ཡོའི་ཧ་བྷི་ཡ་ཀོན་དཔེ་མཛོད་ཁང་ (Hibiya Koen Library) དུ་སྲུང་བརྩི་ཞུས་ཡོད་པ་ལྟར། འབར་མ་དང་། ཀམ་བོ་ཌི་ཡཱ། ཡུ་ཀེ་རེན། བེ་ལཱ་རུས། ཨི་རཱན། ཐའེ་ཝན། བོད། ཤར་ཏུར་ཀིསྟན། ལྷོ་སོག ཧོང་ཀོང་། རྒྱ་ནག་སོགས་ཀྱི་མི་མང་མཉམ་ཞུགས་གནང་ཡོད།
ཚོགས་འདུའི་ཐོག་གོང་གསལ་རྒྱལ་ཁབ་ཁག་གི་སྐུ་ཚབ་རྣམས་ནས་རྒྱལ་ཁབ་སོ་སོར་སྲིད་དབང་སྒེར་འཛིན་པའི་དབང་བསྒྱུར་འོག་ཆབ་སྲིད་དང་འགྲོ་བ་མིའི་ཐོབ་ཐང་རྡོག་རོལ་ཚབས་ཆེ་གཏོང་བཞིན་པའི་སྐོར་ངོ་སྤྲོད་གནང་བ་མ་ཟད། གཉའ་གནོན་སྡུག་སྦྱོང་མྱོང་མཁན་མི་རིགས་ཐུན་མོང་མཉམ་རུབ་ཀྱིས་དྲག་སྤྱོད་དང་རང་དབང་རྡོག་རོལ་མཚམས་འཇོག་ཆེད་རྒྱལ་སྤྱིའི་ཐེ་གཏོགས་འོང་ཐབས་འབད་རྩོལ་གནང་རྒྱུའི་སྤྱི་མོས་ཐག་གཅོད་གནང་ཡོད། དེ་བཞིན་ཁོང་ཚོས་ཉི་འོང་གཞུང་ངོས་ནས་ཉེ་འཁོར་ཁྱིམ་མཚེས་རྒྱལ་ཁབ་ཁག་ཏུ་དྲང་བདེན་མིན་པའི་གནས་སྟངས་བྱུང་བཞིན་པར་དོ་སྣང་བྱས་ཏེ་སྲིད་དབང་སྒེར་འཛིན་པ་རྣམས་ལ་སྲིད་དོན་བཀའ་ཆད་གཏོང་དགོས་པའི་འབོད་སྐུལ་ཞུས་ཡོད་པ་རེད།
ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་གོ་སྒྲིག་ཚོགས་ཆུང་ངོས་ནས་ཁོང་ཉིད་མགྲོན་འབོད་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག འཛམ་གླིང་ནང་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་གྱི་སྲིད་དབང་འོག་སྡུག་སྦྱོང་མྱོང་མཁན་མང་དག་ཅིག་འདུ་འཛོམས་གཅིག་ཐོག་མཉམ་རུབ་བྱུང་བར་དགའ་ཚོར་བྱུང་ཞེས་དང་། རྒྱལ་ཁབ་གཅིག་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་དེ་རྒྱལ་ཁབ་གཅིག་ཁོ་ནའི་དཀའ་ངལ་མ་ཡིན་པར་དེ་ནི་འགྲོ་བ་མི་རིགས་སྤྱི་ཡོངས་ཀྱི་དཀའ་ངལ་དུ་ངོས་འཛིན་བྱེད་དགོས་པའི་སྐོར་དང་། རྒྱ་ནག་དམར་ཤོག་ཚོགས་པའི་དབང་འོག་ཏུ་བོད་དེ་ཞི་བའི་གནས་ཤིག་ནས་དམག་ས་ཞིག་ཏུ་གྱུར་ཡོད་ཅེས་སོགས་ཀྱི་གསུང་བཤད་གནང་ཡོད།
ཉི་འོང་བོད་རང་བཙན་སློབ་ཕྲུག་ཚོགས་པའི་ཀ་མི་ཊ་ཏ་རོ་ (Kameda Taro) ལགས་ཀྱིས་དེ་སྔོན་བོད་མི་ཁོ་ནས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་སྲུང་བརྩི་ཞུ་བཞིན་ཡོད་ནའང་ད་ཆ་ཡུ་གུར་དང་ལྷོ་སོག་མི་རིགས་ཀྱང་དེར་མཉམ་ཞུགས་གནང་སྟེ། དེ་རིང་གི་ཉིན་མོ་འདི་དྲག་གནོན་མྱོང་མཁན་མི་རིགས་ཀྱིས་སྲིད་དབང་སྒེར་འཛིན་པའི་སྲིད་གཞུང་ལ་ངོ་རྒོལ་དང་རྒྱལ་སྤྱིའི་དོ་སྣང་དང་རོགས་སྐྱོར་སློང་སའི་སྡིངས་ཆར་གྲུབ་ཡོད་ཅེས་གསུངས།
མཛད་སྒོ་གྲོལ་མཚམས་ལས་འགུལ་བ་ལྔ་བརྒྱ་ལྷག་གིས་ཞི་བའི་རྔམ་སྟོན་ཁྲོམ་སྐོར་གནང་སྟེ་སྲིད་དབང་སྒེར་འཛིན་པར་ངོ་རྒོལ་དང་མང་གཙོ་དར་འཕེལ་ཡོང་བའི་སྐད་འབོད་ཤུགས་ཆེ་གནང་ཡོད། ཕྱི་དྲོ་ཉི་འོང་གནས་འཁོད་བོད་མི་རྣམས་བཀྲ་ཤིས་བདེ་ལེགས་ཟ་ཁང་དུ་ཚང་འཛོམས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་ཝེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༣ འཁོར་བའི་དུས་ཆེན་སྲུང་བརྩི་ཞུས་པ་དང་ཆབས་ཅིག་ཉི་འོང་བོད་རིགས་ཚོགས་པའི་རྒྱུན་ལས་གསར་འདེམས་གནང་ཡོད་པ་བཅས།། 
