༄༅། །ཕྱི་ལོ་ ༢༠༢༢ ཟླ་ ༡༢ ཚེས་ ༠༨ ཉིན་ཨ་རིའི་རྒྱལ་ས་ཝ་ཤིན་ཌོན་དུ་རྟེན་གཞི་བྱས་པའི་ཅེག་སྤྱི་མཐུན་རྒྱལ་ཁབ་ཀྱི་གཞུང་ཚབ་ཁང་གིས་ཅེག་སྤྱི་མཐུན་རྒྱལ་ཁབ་ཀྱི་གཞུང་ཚབ་ཆེན་མོའི་བཞུགས་གནས་སུ་ལོ་འཁོར་མི་ཊི་རན་ (Mitterand’ breakfast) ཞོགས་ཇ་ཞེས་པའི་མཛད་སྒོ་ཞིག་གོ་སྒྲིག་གནང་ཡོད་པ་དང་། ཞོགས་ཇའི་མཛད་སྒོར་བྱང་ཨ་རི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་དང་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་མཉམ་ཞུགས་གནང་ཡོད་པ་མ་ཟད། ཨ་རི་ནང་ཡོད་པའི་ཡུ་རོབ་སྤྱི་མཐུན་ཚོགས་པའི་སྐུ་ཚབ་དང་། དེ་བཞིན་བོད་དང་། འབར་མ། ཁུ་བྷ། ཝེ་ནེ་ཛུ་ལཱ་བཅས་ཀྱི་འགྲོ་བ་མིའི་ཐོབ་ཐང་རྩོད་ལེན་པ་དང་ཁོར་ཡུག་ལས་འགུལ་བ་སོགས་མཉམ་ཞུགས་གནང་འདུག

དེ་ཡང་ཞོགས་ཇའི་མཛད་སྒོར་ཅེག་སྤྱི་མཐུན་རྒྱལ་ཁབ་ཀྱི་གཞུང་ཚབ་ཆེན་མོ་སྐུ་ཞབས་མི་ལོ་སི་ལབ་ (Miloslav Stašek) ལགས་ཀྱིས་སྐུ་མགྲོན་རྣམས་ལ་ཕེབས་བསུའི་འཚམས་འདྲི་ཞུས་པ་དང་འབྲེལ་མི་ཊི་རན་ཞོགས་ཇའི་རྒྱབ་ལྗོངས་ལོ་རྒྱུས་འགྲེལ་བརྗོད་གནང་ཡོད། གཞན་ཡང་ཁོང་གིས་བོད་དང་། འབར་མ། ཁུ་བྷ། ཝེ་ནེ་ཛུ་ལཱ་བཅས་ཀྱི་སྐུ་ཚབ་རེ་རེར་ཁོང་སྒེར་དང་དམིགས་བསལ་འབྲེལ་བ་ཡོད་པའི་སྐོར་གསུངས་པ་མ་ཟད། འགྲོ་བ་མིའི་ཐོབ་ཐང་ནི་ཅེག་སྤྱི་མཐུན་རྒྱལ་ཁབ་ཀྱིས་ཕྱིའི་སྲིད་བྱུས་ནང་གལ་འགངས་ཆེ་ཤོས་ཀྱི་གྲས་སུ་རྩི་བཞིན་པའི་སྐོར་གསུངས།

ཕྱོགས་མཚུངས་ཅེག་སྤྱི་མཐུན་རྒྱལ་ཁབ་ཀྱི་གཞུང་ཚབ་ཆེན་མོ་སྐུ་ཞབས་མི་ལོ་སི་ལབ་ལགས་ཀྱིས་ཁོང་དེ་སྔ་རྒྱ་གར་ནང་གཞུང་ཚབ་ཆེན་མོ་གནང་སྐབས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལྡི་ལིར་ཁོང་གི་སྐྱེས་སྐར་ཐོག་གདན་འདྲེན་ཞུ་རྒྱུའི་གོ་སྐབས་བྱུང་བ་དྲན་གསོ་གནང་ཡོད།བྱང་ཨ་རི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས། ཅེག་སྤྱི་མཐུན་རྒྱལ་ཁབ་ཀྱི་གཞུང་ཚབ་ཁང་གིས་ཞོགས་ཇའི་མཛད་སྒོར་མགྲོན་འབོད་གནང་བར་ཐུགས་རྗེ་ཆེ་ཞུས་གནང་པ་དང་སྦྲགས་བོད་དང་ཅེག་སྤྱི་མཐུན་རྒྱལ་ཁབ་བར་མཛའ་གྲོགས་ཀྱི་འབྲེལ་བ་དེ་བཞིན་དེ་སྔའི་ཅེག་སྤྱི་མཐུན་རྒྱལ་ཁབ་ཀྱི་གཞུང་ཚབ་ཆེན་མོ་རྣམས་དང་ལྷན་དུའང་བྱུང་ཡོད་པ་དྲན་གསོ་ཞུས་གནང་ཡོད།

གཞན་ཡང་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་ཅེག་སྤྱི་མཐུན་རྒྱལ་ཁབ་ཀྱི་གཞུང་མང་གཉིས་ནས་རྒྱ་ནག་གི་གནོན་ཤུགས་ལ་མ་ལྟོས་པར་བོད་དོན་སླད་རྒྱབ་སྐྱོར་གནང་དང་གནང་བཞིན་པ་དེས་བོད་མི་རྣམས་ལ་སེམས་ཤུགས་བསྐྱེད་དུ་བཅུག་ཡོད་པས་ཐུགས་རྗེ་ཆེ་ཞུས་གནང་ཡོད། ཞོགས་ཇའི་མཛད་སྒོར་སྐུ་ཚབ་རྣམ་པས་ཕན་ཚུན་བར་དོན་ཕན་ལྡན་པའི་གླེང་མོལ་གནང་ཡོད་པ་བཅས།།