༢༠༡༡ ཟླ་ ༡༠ ཚེས་ ༣༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༢༩ རེས་གཟའ་སྤེན་པའི་སྔ་དྲོ་ཆུ་ཚོད་ ༦།༢༡ ཐོག་༸གོང་ས་༸སྐྱབས་མགོན་ཆེན་པོ་མཆོག་ཉི་ཧོང་གི་རྒྱལ་ས་ཊོཀ་ཁྱོའི་ན་རི་ཏ་གནམ་ཐང་དུ་༸ཞབས་སོར་བདེ་བར་འཁོད་སྐབས་ཉི་ཧོང་དང་ཤར་ཨེ་ཤི་ཡའི་སྐུ་ཚབ་དོན་གཅོད་ལྷག་པ་མཚོ་སྒོ་ལགས་དང་ཉི་ཧོང་དོན་གཅོད་ཀྱི་ལས་བྱེད། དེ་བཞིན་ཉི་ཧོང་བོད་དོན་རྒྱབ་སྐྱོར་བ་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད། དེ་རྗེས་ཉི་ཧོང་གི་གསར་འགོད་པ་དང་མཇལ་འཕྲད་ཀྱིས་དྲི་བར་བཀའ་ལན་མཛད། སྐབས་དེར་གསར་འགོད་པས་ཕྱི་ལོ་ ༢༠༡༢ ལོར་རྒྱ་ནག་གུང་ཁྲན་གཞུང་གི་དཔོན་རིགས་འཕོ་འགྱུར་སྐོར་དང། བོད་ནང་རང་ལུས་མེར་སྲེག་བཏང་བའི་དོན་རྐྱེན། ཉི་ཧོང་གཞུང་ལ་བོད་དོན་ཆེད་རྒྱབ་སྐྱོར་གྱི་རེ་འདུན་ཇི་འདྲ་ཞིག་འདོན་གནང་མཛད་རྒྱུའི་ཐུགས་འདོད་ཡོད་སྐོར། དེ་བཞིན་མགོན་པོ་གང་ཉིད་མཆོག་གི་སྐུའི་ཡང་སྲིད་སྐོར་ལ་རྒྱ་ནག་གཞུང་གིས་ཐེ་བྱུས་བྱེད་ཚུལ་བཅས་ཀྱིས་དྲི་བ་ཕུལ་བར་བཀའ་ལན་མཛད། དེ་ཡང་ཕྱི་ལོ་ ༢༠༡༢ ལོར་རྒྱ་ནག་གཞུང་གི་དཔོན་རིགས་འཕོ་འགྱུར་དང་འབྲེལ་བའི་སྐོར་བཀའ་ལན་སྩལ་དོོན། དྲི་བ་འདི་ཆབ་སྲིད་ཀྱི་དྲི་བ་ཞིག་རེད་འདུག་པས་ད་ཆ་ངོས་རང་བོད་མིའི་ཆབ་སྲིད་འགོ་ཁྲིད་ནས་རྒན་ཡོལ་ཆ་ཚང་ཞུས་ཟིན།  འོན་ཀྱང་ངོས་རང་སྒེར་གྱི་བསམ་ཚུལ་ཞུས་ན། སྲིད་འཛིན་ཧུའུ་ཅིན་ཐའོ་རྒྱ་ནག་གི་སྲིད་འཛིན་དུ་ཐོག་མར་བསྐོ་གཞག་བྱུང་སྐབས་མི་མང་པོ་ཞིག་ལ་རྒྱ་ནག་ཏུ་བཟང་ཕྱོགས་ཀྱི་འགྱུར་བ་ཞིག་ཡོང་རྒྱུར་རེ་བ་ཧ་ཅང་ཆེན་པོ་བྱུང་ཡོད། སྲིད་འཛིན་ཧུས་འཆམ་མཐུན་གྱི་སྤྱི་ཚོགས་བསྐྲུན་རྒྱུའི་ཆབ་སྲིད་ཀྱི་ལངས་ཕྱོགས་དེར་ངོས་ཀྱིས་མཐའ་གཅིག་ཏུ་རྒྱབ་སྐྱོར་ཞུས་ཡོད། འོན་ཀྱང་ལོ་བཅུ་ཙམ་ཕྱིན་རྗེས་ད་ཆ་རྒྱ་ནག་ནང་དུ་འཆམ་མཐུན་གྱི་སྤྱི་ཚོགས་ཤིག་བསྐྲུན་ཡོད་མེད་ཁྱེད་ཚོས་ངོས་ལས་ཡག་པ་ཤེས་ཀྱི་རེད། ཕྱི་ལོ་ ༢༠༠༨ ལོར་བོད་ནང་གི་གནད་དོན་དང་། ཕྱི་ལོ་ ༢༠༠༩ ལོར་ཤིང་ཅང་ནང་གི་དོན་རྐྱེན། དེ་བཞིན་ཕྱི་ལོ་ ༢༠༡༡ ལོར་ནང་སོག་ནང་བྱུང་བའི་དོན་རྐྱེན་དེ་དག་ནས་དངོས་ར་འཕྲོད་ཐུབ། འཆམ་མཐུན་གྱི་སྤྱི་ཚོགས་བསྐྲུན་རྒྱུའི་འཆར་སྣང་དེ་ཧ་ཅང་ཡག་པོ་ཡིན་ནའང་དམིགས་ཡུལ་དེ་བསྒྲུབ་རྒྱུའི་ཐབས་ལམ་གྱི་སྲིད་བྱུས་དེ་ནོར་བ་ཞིག་རེད། འཆམ་མཐུན་ཟེར་བ་དེ་བསམ་བློའི་ཐོག་ནས་ཡོང་དགོས། དེ་ལྟར་ཡོང་བར་ཕན་ཚུན་ཡིད་ཆེས་དགོས། འཇིགས་སྣང་འོག་ཡིད་ཆེས་བསླེབ་མི་ཐུབ། དེར་བརྟེན་འབྱུང་འགྱུར་རྒྱ་ནག་དཔོན་རིགས་ཚོས་རྒྱ་ནག་ནང་འགྱུར་བ་ཆེན་པོ་ཞིག་གཏོང་ཐུབ་མིན་སྐོར་བརྗོད་རྒྱུ་ད་ལྟ་དུས་ཚོད་སྔ་དྲགས་པ་རེད་ཅེས་བཀའ་ལན་མཛད།
ཡང་བོད་ནང་རང་ལུས་མེར་སྲེག་བཏང་བའི་དོན་རྐྱེན་དང་འབྲེལ་ནས་བཀའ་ལན་སྩལ་དོན། བོད་ནང་དགེ་འདུན་པ་ཚོས་རང་ལུས་མེར་སྲེག་བཏང་བའི་དོན་རྐྱེན་དེར་ཆོས་དང་ཆབ་སྲིད། དེ་བཞིན་ལྟ་གྲུབ་ཀྱི་རྣམ་གཞག་ཐོག་ནས་ལྟ་དགོས་པ་ཞིག་ཡིན། བོད་མི་ཚོས་རང་ལུས་མེར་སྲེག་བཏང་བ་དེ་ནི་འ་ཆད་འུ་ཐུག་གི་གནས་སྟངས་ཤིག་ཡིན་པ་གསལ་པོ་རེད། རྒྱ་ནག་གཞུང་གི་དཔོན་རིགས་ཚོས་བོད་མི་ཚོའི་དཀའ་ངལ་དེ་དག་སེལ་ཐབས་བྱེད་དགོས། ཡ་ང་སྙིང་རྗེ་རྩ་བ་ནས་མེད་པའི་བྱ་སྤྱོད་ཁོ་ན་ལག་བསྟར་བྱེད་རྒྱུ་དེ་ནི་རང་གཞན་ཀུན་ལ་མི་དགོས་པ་ཞིག་ཡིན།
ཕྱོགས་མཚུངས་ཉི་ཧོང་སྲིད་གཞུང་གིས་བོད་དོན་རྒྱབ་སྐྱོར་ཇི་འདྲ་ཞིག་གནང་དགོས་མིན་གྱི་དྲི་བར་བཀའ་ལན་སྩལ་དོན། ཉི་ཧོང་ནི་མང་གཙོའི་རྒྱལ་ཁབ་གཅིག་རེད། དེར་བརྟེན་སྲིད་གཞུང་འདི་མང་ཚོགས་ཀྱིས་འོས་འདེམས་བྱས་ནས་སླེབས་པ་ཞིག་ཆགས་པར་བརྟེན། ཉི་ཧོང་མང་ཚོགས་དང་ལྷག་པར་གསར་འགོད་པ་ཚོས་རང་གི་སྲིད་གཞུང་ལ་གནད་དོན་དེའི་སྐོར་བསམ་ཚུལ་བཏོན་ན་རན་པ་ཡོད། ངོས་སྒེར་ལ་ཆ་བཞག་ན་བོད་ཀྱི་གནད་དོན་དེ་བཞིན་བདེན་པའི་གནད་དོན་ཞིག་ཡིན་པར་བརྟེན། མང་ཚོགས་བརྒྱུད་གྲོས་ཚོགས་སུ་བསླེབ་དགོས་པ་ཞིག་རེད་ཅེས་བཀའ་ལན་མཛད། ཡང་ཏཱ་ལའི་བླ་མའི་ཡང་སྲིད་ཐད་རྒྱ་ནག་གཞུང་གིས་ཐེ་བྱུས་བྱས་པའི་སྐོར་བཀའ་ལན་སྩལ་དོན། རྒྱ་ནག་གུང་ཁྲན་ཏང་ངམ་དམར་ཤོག་ཚོགས་པས་ཆོས་ཁས་ལེན་བྱེད་ཀྱི་མེད་པ་མ་ཟད། སྐྱེ་བ་ཕྱི་མ་ཡང་ཁས་ལེན་གྱི༝་མེད།
དེར་བརྟེན་ཡང་སྲིད་ཟེར་བ་ཡང་ཁས་ལེན་ཤེས་ཀྱི་མ་རེད། འོན་ཀྱང་ཁོང་ཚོར་ད་ཆ་ཏཱ་ལའི་བླ་མའི་ཡང་སྲིད་སྐོར་ལ་ཐེ་བྱུས་བྱེད་འདོད་ཡོད། ཏཱ་ལའི་བླ་མ་ནི་ད་ཆ་ཆབ་སྲིད་ཀྱི་གནད་དོན་དང་འབྲེལ་བ་གང་ཡང་མེད། འོན་ཀྱང་རྒྱ་ནག་གི་དཔོན་རིགས་ཚོས་ཏཱ་ལའི་བླ་མའི་ཡང་སྲིད་ཐོག་དངོས་གནས་སེམས་འཚབ་ཡོད་ན་ཐོག་མར་ཁོང་ཚོས་ཆོས་ཁས་ལེན་དགོས། དེ་ནས་མའོ་ཙེ་ཏུང་དང་ཏེང་ཞའོ་ཕིང་གི་ཡང་སྲིད་འཚོལ་རྒྱུའི་ཐོག་བསམ་བློ་བཏང་བ་ཡིན་ན་རྒྱུ་མཚན་ལྡན་པ་ཞིག་རེད། ཅེས་བཀའ་ལན་སྩལ་ཡོད་པ་བཅས།།