༄༅། །ཕ་རཱན་སིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཇེ་ཁེ་ལིན་ (Jacqueline Eustache-Brinio) ལགས་ཀྱི་གོ་སྒྲིག་འོག་མེ་ཊི་སི་(Médicis) ཚོགས་ཁང་དུ་ཕ་རཱན་སིར་བོད་ཕྲུག་ཉི་ཤུ་ཐོག་མར་འབྱོར་ནས་ལོ་ངོ་དྲུག་ཅུ་འཁོར་བའི་དུས་དྲན་སྲུང་བརྩི་ཞུས་ཡོད།
དེ་ཡང་དུས་དྲན་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་སྩལ་བའི་ནང་མགོན་པོ་གང་ཉིད་མཆོག་གིས་ཕ་རཱན་སིར་ཐོག་མར་བོད་ཕྲུག་ཉི་ཤུར་གཟིགས་རྟོག་གནང་མཁན་འབྲེལ་ཡོད་རྣམས་དང་། དེ་བཞིན་བོད་ཀྱི་རང་དབང་འཐབ་རྩོད་ལ་རྒྱབ་སྐྱོར་མུ་མཐུད་གནང་མཁན་ཡོངས་ལ་ཐུགས་རྗེ་ལེགས་འབུལ་ཞུས་ཡོད། བེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་མགོན་པོ་གང་ཉིད་མཆོག་གི་གསུང་འཕྲིན་ཕ་རཱན་སིའི་སྐད་དུ་བསྒྱུར་ཏེ་སྒྲོགས་སྦྱང་གནང་བ་མ་ཟད། ད་ལྟའི་ཛ་དྲག་གནས་སྟངས་ཁག་གཅིག་སྙན་སྒྲོན་ཞུས་ཏེ་གྲོས་ཚོགས་གོང་མའི་འཐུས་མི་རྣམས་ནས་ཕ་རཱན་སི་གཞུང་ལ་བོད་མིའི་སྒྲིག་འཛུགས་ཀྱི་ལས་དོན་ལ་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུ་རོགས་ཞེས་རེ་སྐུལ་ཞུས་གནང་ཡོད།
གཞན་ཡང་ལྷན་འཛོམས་ཐོག་གྲོས་ཚོགས་གོང་མའི་འཐུས་མི་ཨ་ནིག་བྷི་ལོན་ (Annick Billon) ལགས་དང་། ཇོ་སབ་ཨེལ་ (Joseph Else) ལགས། གྲོས་ཚོགས་གོང་མའི་འཐུས་མི་ཟུར་པ་ཨན་ཊི་གྷ་ཊོ་ལེན་ (André Gattolin) ལགས། བོད་མི་ཕ་རཱན་སིར་ཐོག་མར་འཁྲིད་མཁན་གྲས་ཨོར་ཊོ་ལི་ལགས་ཀྱི་བུ་ཝི་ལེ་རི་ཨོར་ཊོ་ལི་ (Valère Ortoli) ལགས། དེ་བཞིན་གསར་འགོད་པ། ཕྱོགས་བཞུགས་སྤྱི་འཐུས་ཐུབ་བསྟན་དབང་ཆེན་ལགས་དང་སྤྱི་འཐུས་ཐུབ་བསྟན་རྒྱ་མཚོ་ལགས། ཕ་རཱན་སིའི་བོད་རིགས་ཚོགས་པའི་ཚོགས་གཙོ་ཀརྨ་འཕྲིན་ལས་ལགས་དང་དྲུང་ཆེ་དབང་འདུས་རྒྱལ་ལགས། པེ་རི་སིའི་འབྲེལ་མཐུད་ལས་ཁུངས་ཀྱི་དྲུང་ཆེ་ཐུབ་བསྟན་ཚེ་རིང་ལགས། གཞན་ཡང་ཕ་རཱན་སིར་ཐོག་མར་འབྱོར་མཁན་བོད་མི་ཁོངས་ནས་མི་བཅུ་གཅིག་མཉམ་ཞུགས་གནང་ཡོད།
སྤྱིར་ཕྱི་ལོ་ ༡༩༥༩ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཙན་བྱོལ་དུ་ཆིབས་སྒྱུར་བསྐྱངས་མ་ཐག་བོད་དང་བོད་མིར་རྒྱལ་སྤྱིའི་རོགས་སྐྱོར་ཡོང་བའི་འབོད་སྐུལ་གནང་བ་ལྟར། སྐབས་དེའི་ཕ་རཱན་སིའི་སྲིད་འཛིན་ཊི་གྷུ་ལེ་ (General de Gaulle) མཆོག་གི་རྒྱབ་སྐྱོར་འོག་ཕ་རཱན་སི་གཞུང་ནས་བོད་ཕྲུག་གྲངས་ཉི་ཤུ་ལེན་རྒྱུའི་ཐག་གཅོད་གནང་ཞིང་། ཕྱི་ལོ་ ༡༩༦༢ ལོར་བོད་ཕྲུག་དེ་དག་ཕ་རན་སིར་འབྱོར་ཡོད། སྐབས་དེར་བོད་ཕྲུག་རྣམས་དང་ལྷན་ཕ་ཚབ་མ་ཚབ་རེ་བཏང་ཡོད་ཅིང་། ཁོང་རྣམས་ནས་བོད་ཕྲུག་རྣམས་ལ་ལྟ་སྐྱོང་དང་བོད་ཀྱི་སྐད་དང་རིག་གཞུང་སློབ་ཁྲིད་གནང་རྒྱུའི་འགན་ཁུར་བཞེས་ཡོད་པ་བཅས།།
