༄༅། །ཉི་ཧོང་གི་རེ་ཏ་ཀུ་གཙུག་ལག་སློབ་གཉེར་ཁང་གི་མགྲོན་འབོད་ལྟར་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་རེ་ཏ་ཀུ་གཙུག་ལག་སློབ་གཉེར་ཁང་གི་རྒྱལ་སྤྱིའི་སློབ་གཉེར་ཚན་པའི་སློབ་ཕྲུག་རྣམས་ལ་བོད་དོན་སྐོར་སློབ་ཁྲིད་གནང་ཡོད།

སྐབས་དེར་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་བོད་ཀྱི་འདས་ད་ལྟ་མ་འོངས་གསུམ་གྱི་གནད་དོན་ཞེས་པའི་བརྗོད་གཞིའི་ཐོག་གསུང་བཤད་གནང་ཞིང་། དེའི་ནང་བོད་ཀྱི་ལོ་རྒྱུས་དང་། བོད་དུ་ནང་ཆོས་དར་ཚུལ་སོགས་ཀྱི་སྐོར་འགྲེལ་བརྗོད་གནང་བ་དང་སྦྲགས། དེ་ལས་འཕྲོས་ཏེ་ཨེ་ཤི་ཡའི་རྒྱལ་ཁབ་སོག་ཡུལ་དང་། རྒྱ་ནག བལ་ཡུལ་སོགས་ནང་ཁུལ་ཞི་བདེ་འཆམ་མཐུན་ཡོང་ཆེད་བོད་དེ་ལོ་རྒྱུས་དང་ཆོས་རིག་ཐོག་ནས་གལ་གནད་ཆེན་པོ་ཆགས་ཚུལ་དང་། དེ་བཞིན་བཙན་བྱོལ་བོད་མིའི་གནས་བབ་མཚོན་པའི་བོད་བརྒྱུད་ནང་བསྟན་ལ་བརྟེན་ནས་འཁྲུག་རྩོད་ཆེ་བའི་འཛམ་གླིང་ལ་ཞི་བདེ་སྐྲུན་ཐུབ་པའི་ནུས་པ་ལྡན་སྐོར། ཕྱོགས་མཚུངས་སྲིད་དབང་སྒེར་འཛིན་པའི་འདོད་རྔམ་དང་དྲག་རྩུབ་འོག་ནས་འཛམ་གླིང་སྐྱོབ་པར་གཞོན་སྐྱེས་རྣམས་ལ་དམིགས་བསལ་འགན་ཁུར་ཡོད་སྐོར་འགྲེལ་བརྗོད་གནང་ཡོད།

དེ་བཞིན་ཁོང་གིས་སློབ་གཉེར་བ་རྣམས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ལས་འཁྲུངས་པའི་ཆོས་ལུགས་ལ་མ་བརྟེན་པའི་བཟང་སྤྱོད་ངོ་སྤྲོད་མདོར་བསྡུས་གནང་བ་དང་འབྲེལ་གཞོན་སྐྱེས་རྣམས་ནས་རང་ཉིད་ཀྱི་སེམས་ཁམས་འཕྲོད་བསྟེན་ལ་དོ་སྣང་བྱེད་དགོས་པའི་འབོད་སྐུལ་གནང་ཡོད་པ་དང་། གསུང་བཤད་གྲུབ་མཚམས་སློབ་གཉེར་བ་རྣམས་ནས་བོད་དོན་སྐོར་དོགས་དྲི་གནང་བ་ཁག་ལ་ལན་འདེབས་གསལ་བཤད་གནང་ཡོད་པ་རེད།

སྤྱིར་ཐེངས་འདིའི་བོད་དོན་གསུང་བཤད་ལས་རིམ་དེ་གཙུག་ལག་སློབ་དཔོན་ཀ་ཛུ་ནུ་བུ་ཧོ་རི་ཆི་ ( Kazunobu Horiuchi) ལགས་ཀྱིས་འབྲེལ་མཐུད་འོག་རེ་ཏ་ཀུ་གཙུག་ལག་སློབ་གཉེར་ཁང་གིས་གོ་སྒྲིག་ཞུས་ཡོད་པ་བཅས།།