༄༅། །ཕྱི་ལོ་ ༢༠༢༢ ཟླ་ ༡༢ ཚེས་ ༠༦ ཉིན་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་སྨན་བཅོས་ལྟ་སྐྱོང་ལས་གཞིའི་སྐོར་གོ་རྟོགས་སྤེལ་སླད་ལྷོ་སྤྱི་དང་། སིམ་སྤྱི། ལ་སྤྱི་བཅས་ཚུད་པའི་བཙན་བྱོལ་བོད་མིའི་གཞིས་ཆགས་ཁག་གི་ས་གནས་འགོ་འཛིན་རྣམས་དང་ལྷན་དུ་དྲ་ཐོག་ཚོགས་འདུ་བསྐོང་ཚོགས་གནང་ཡོད་པ་དང་། སྐབས་དེར་འཕྲོད་བསྟེན་ལས་ཁུངས་ཀྱི་སྨན་བཅོས་ལྟ་སྐྱོང་ཚན་པའི་འགན་འཛིན་པདྨ་གཡུ་སྒྲོན་ལགས་ཀྱིས་འཕྲོད་བསྟེན་ལས་ཁུངས་ནས་ཚོགས་འདུ་བསྐོང་ཚོགས་གནང་དགོས་པའི་དམིགས་ཡུལ་དང་། གལ་གནད། ཁེ་ཕན་སོགས་ཀྱི་སྐོར་འགྲེལ་བརྗོད་གནང་ཡོད།
འཕྲོད་བསྟེན་ལས་ཁུངས་ནས་ཕྱི་ཟླ་ ༡༢ ཚེས་ ༡༠ ཉིན་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་སུམ་ཅུ་སོ་གསུམ་འཁོར་བའི་དུས་ཚེས་ཁྱད་པར་ཅན་དང་བསྟུན་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞིའི་ཕྱི་ལོ་ ༢༠༢༣་་ ༢༠༢༤ ལོའི་ཚོགས་མི་ཐོ་འགོད་གནང་གཏན་ཁེལ་ཡོད་པ་བཅས།།
