༢༠༡༡ ཟླ་ ༡༠ ཚེས་ ༢༩ རེས་གཟའ་སྤེན་པ།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༢༥ རེས་གཟའ་མིག་དམར་ཉིན་ཕ་རན་སིའི་རྒྱལ་ས་པེ་རི་སིའི་རྫོང་ཁོངས་བཅུ་གཅིག་གི་གྲོང་ཁྱེར་སྤྱི་ཁྱབ་པ་སྐུ་ཞབས་པེ་ཊེ་རིག་བྷོ་ལོ་ཆེ་(Mr. Patric Bloche ) མཆོག་གིས་སྲིད་འཛིན་ནི་ཁོ་ལ་སར་ཀོ་ཛི་མཆོག་ལ། ཕ་རན་སིའི་རྒྱལ་ས་པེ་རི་སིའི་ནང་འཛམ་གླིང་སྟོབས་ཆེན་རྒྱལ་ཁབ་ ༢༠ ཚོང་དོན་སྒྲིག་འཛུགས་ཀྱི་ལྷན་ཚོགས་(G20)འཚོགས་བཞིན་པའི་སྐབས་དང་བསྟུན། སྲིད་འཛིན་མཆོག་གི་མཚན་ཐོག་ནས་རྒྱལ་སྤྱིའི་དབུ་ཁྲིད་ཚོ་བརྒྱུད་རྒྱ་ནག་གཞུང་ལ་བོད་མི་ཚོའི་འགྲོ་བ་མིའི་ཐོབ་ཐང་ལ་སྲུང་བརྩི་ཞུ་དགོས་པའི་རེ་འདུན་འདོན་རོགས་ཞེས་འབོད་སྐུལ་ཞུས་འདུག དེ་ཡང་གྲོང་ཁྱེར་སྤྱི་ཁྱབ་པ་མཆོག་གིས་རང་ཉིད་སྒེར་གྱི་དྲ་རྒྱའི་ཐོག་འཁོད་དོན། ད་ལྟ་ཀིརྟི་དགོན་པ་དང་རྔ་པའི་ཁྱོན་ལ་རྒྱ་ནག་གཞུང་གིས་དམ་བསྒྲགས་ཀྱི་སྲིད་བྱུས་ལག་བསྟར་བྱེད་བཞིན་པ་དེ་ནི་རྒྱ་ནག་གཞུང་གི་རྒྱུན་ལྡན་གྲངས་ཉུང་མི་རིགས་དང་རྒྱ་ནག་གཞུང་གི་ལངས་ཕྱོགས་མི་མཐུན་པ་རྣམས་ལ་འཛིན་པའི་སྲིད་བྱུས་ཤིག་ཡིན་ཞེས་སོགས་འཁོད་ཡོད།།