༄༅། །ཕྱི་ལོ་ ༢༠༢༢ ཟླ་བ་ ༡༢ ཚེས་ ༥ རེས་གཟའ་ཟླ་བ་ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་ཨ་རིའི་སིན་སིན་ན་ཊི་གྲོང་སྡེའི་སྤྱི་ཁྱབ་པ་བོད་རིགས་ཨཕ་ཏཱཕ་ཀརྨ་པུ་རེ་ཝལ་ (Aftab Karma Puruwal) ལགས་དང་། ཨ་རིའི་ཀན་ཊ་ཀེ་མངའ་སྡེ་ནང་གི་བྱམས་བརྩེ་གྲོང་ཁྱེར་ལོ་ཝེལ་(Louisville) གྱི་སྤྱི་ཁྱབ་པ་སྐུ་ཞབས་གྷེརྒ་ཕི་ཤར་ (Greg Fischer) ལགས། ཁ་ལེ་ཧྥོར་ནི་ཡ་མངའ་སྡེའི་ཨོ་ཁ་ལན་ཌི་གྲོང་སྡེའི་སྤྱི་ཁྱབ་པ་ལྕམ་སྐུ་ལི་བྷི་ཤཱཧྥ་ (Libby Schaaf) ལགས། པི་ཌས་སྦག་ (Pittsburgh) གྲོང་སྡེའི་སྤྱི་ཁྱབ་པ་ཟུར་པ་སྐུ་ཞབས་བྷིལ་པེ་ཌུ་ཏོ་ (Bill Peduto) ལགས། དེ་བཞིན་ལོ་ཝེལ་གྲོང་ཁྱེར་ནས་ཡིན་པའི་ཁུ་ཚུར་རྩལ་འགྲན་པ་མོ་ཧད་མད་ཨ་ལི་ (Muhammad Ali) ལགས་ཀྱི་བཟའ་ཟླ་ལྕམ་ལ་ནི་ཨ་ལི་ (Lonnie Ali) ལགས་བཅས་ལ་མཇལ་ཁ་སྩལ་ཡོད།དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གོང་གསལ་མི་སྣ་དག་ལ་མཇལ་ཁ་དང་། བྱམས་བརྩེ་དང་ཆོས་ལུགས་དང་མ་འབྲེལ་བའི་བཟང་སྤྱོད་སྐོར་བཀའ་སློབ་སྩལ་བ་དང་། མཇལ་ཁ་གྲུབ་རྗེས་སིན་སིན་ན་ཊི་གྲོང་སྡེའི་སྤྱི་ཁྱབ་པ་ཨཕ་ཏཱཕ་ཀརྨ་པུ་རེ་ཝལ་ལགས་ཀྱིས་ཕོ་བྲང་གི་ཕྱི་རོལ་དུ་གསར་འགོད་པར། ང་ནི་བཙན་བྱོལ་དུ་ཁ་ཐོར་དུ་གནས་པའི་བོད་མིའི་ཆ་ཤས་ཤིག་ཡིན་པར་དྲན་བཞིན་འདུག ད་ཐེངས་བཞུགས་སྒར་རྡ་རམ་ས་ལར་དངོས་སུ་སླེབས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་ཁ་ཞུ་རྒྱུའི་གོ་སྐབས་བྱུང་བ་ནི་ཧ་ཅང་སྐལ་པ་བཟང་པོ་ཡིན། ༸གོང་ས་མཆོག་དངོས་སུ་མཇལ་བ་ཐེངས་དང་པོ་ཡིན། ང་ལྟ་བུར་མཚོན་ན་ཨ་རིའི་གྲོང་ཁྱེར་ཆེ་གྲས་ཤིག་གི་སྤྱི་ཁྱབ་པ་བྱེད་པ་འདི་ནི་བཙན་བྱོལ་བོད་མིའི་ལོ་རྒྱུས་ནང་ཐེངས་དང་པོ་ཆགས་ཀྱི་ཡོད། འདི་བརྒྱུད་ནས་གོ་སྐབས་མང་པོ་ཞིག་ཡོད་པ་དྲན་བཞིན་ཡོད།

ངའི་ཨ་མ་ལགས་ནི་བཙན་བྱོལ་བོད་མི་སྤྱི་མཚུངས་ལྟར་རང་ཡུལ་བཞག་ནས་བཙན་བྱོལ་དུ་ཕེབས་དགོས་བྱུང་བ་རེད། དེ་ཐེངས་༸གོང་ས་མཆོག་དངོས་སུ་མཇལ་དུས་ང་རང་ཨ་རིར་གནས་སྡོད་བོད་མི་ཞིག་ཡིན་པའི་ཆ་ནས་བོད་པའི་ཆེད་དུ་ག་རེ་བྱེད་ཐུབ་ཀྱི་རེད་ཅེས་བཀའ་འདྲི་ཞུས་པར་མགོན་པོ་གང་ཉིད་མཆོག་གིས་སྤྱི་ཚོགས་ལ་ཞབས་ཞུ་ཞུ་དུས་བོད་པ་གཅིག་པོར་བསམ་བློ་མི་གཏོང་བར་འགྲོ་བ་མི་སྤྱིའི་བདེ་རྩ་ལ་ཕན་པའི་ཕྱག་ལས་གནང་དགོས་པའི་བསླབ་བྱ་གནང་སོང་། ཞེས་གསུངས་ཡོད་པ་དང་། གཞན་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨོ་སི་ཁྲི་ལི་ཡ་ནས་ཡིན་པ་འགྲོ་བ་མིའི་ཐོབ་ཐང་འཐབ་རྩོད་པ་སྒྲེའུ་པེཕ་ལོའོ་ (Drew Pavlou) ལགས་ལ་མཇལ་ཁ་དང་བཀའ་སློབ་སྩལ་ཡོད། །