༄༅། །ཕྱི་ལོ་ ༢༠༢༢ ཟླ་ ༡༡ ཚེས་ ༢༨ ཉིན་གྱི་སྔ་དྲོ་རྡ་ས་འཛིན་སྐྱོང་སྦྱོང་བརྡར་བསྟི་གནས་ཁང་དུ་སཾ་བྷོ་ཊ་བོད་སློབ་ཚོགས་པའི་ཁྱབ་ཁོངས་སློབ་ཁག་གི་ལོ་འཁོར་འགན་འཛིན་ཚོགས་འདུ་ཐེངས་བཅོ་ལྔ་པའི་དབུ་འབྱེད་མཛད་སྒོ་ཚོགས་ཡོད་པ་དང་། ཚོགས་འདུའི་དབུ་འབྱེད་མཛད་སྒོར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་དྲུང་ཆེ་འཇིགས་མེད་རྣམ་རྒྱལ་ལགས་དང་། སཾ་བྷོ་ཊ་བོད་སློབ་ཚོགས་པའི་སྤྱི་ཁྱབ་འགན་འཛིན་ཚེ་རིང་དོན་གྲུབ་ལགས་དང་སྤྱི་ཁྱབ་འགན་འཛིན་གཞོན་པ་ཚེ་དབང་ནོར་བུ་ལགས། སཾ་བྷོ་ཊ་བོད་སློབ་ཚོགས་པའི་ཁྱབ་ཁོངས་སློབ་གྲྭའི་སློབ་སྤྱི་དང་དགེ་ཆེ་རྣམ་པ། དེ་བཞིན་སཾ་བྷོ་ཊ་བོད་སློབ་ཚོགས་པའི་སྤྱི་ཁྱབ་ཡིག་ཚང་གི་ལས་བྱེད་རྣམ་པ་སོགས་ཕེབས་ཡོད།
དེ་ཡང་མཛད་སྒོའི་ཐོག་མར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་དྲུང་ཆེ་འཇིགས་མེད་རྣམ་རྒྱལ་ལགས་ཀྱིས་སྣང་གསལ་མར་མེ་ཞལ་ཁ་ཕྱེ་ནས་ཚོགས་འདུ་དངོས་སུ་དབུ་འབྱེད་གནང་གྲུབ་མཚམས་སཾ་བྷོ་ཊ་བོད་སློབ་ཚོགས་པའི་སྤྱི་ཁྱབ་འགན་འཛིན་ཚེ་རིང་དོན་གྲུབ་ལགས་ཀྱིས་ཚོགས་འདུ་ངོ་སྤྲོད་གསུང་བཤད་གནང་ཡོད། དེ་རྗེས་སྐུ་མགྲོན་གཙོ་བོ་ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས་ཀྱིས་གསུང་བཤད་གནང་སྐབས་གཙོ་བོ་ད་ལྟའི་ཆར་འབྲེལ་ཡོད་ཚང་མས་སློབ་ཕྲུག་གི་ཤེས་ཡོན་གྱི་སྤུས་ཚད་ཡར་རྒྱས་གཏོང་དགོས་པ་མ་ཟད། སཾ་བྷོ་ཊ་བོད་སློབ་ཚོགས་པའི་སྤྱི་ཁྱབ་ཡིག་ཚང་གིས་འགན་འཁུར་གནང་སྟེ་སཾ་བྷོ་ཊ་བོད་སློབ་ཚོགས་པའི་ཁྱབ་ཁོངས་སློབ་གྲྭ་ཡོངས་རྫོགས་གཅིག་གྱུར་གྱི་ལས་རིམ་གྱི་རེའུ་མིག་བཟོ་དགོས་པ། སློབ་གྲྭའི་འགན་འཛིན་དང་། དགེ་རྒན། ལས་བྱེད་སོགས་ནས་ཤེས་ཡོན་དང་འབྲེལ་བའི་ལས་འཆར་ལ་ཤུགས་སྣོན་བསྐྱོན་ཏེ་གཞི་རིམ་འོག་མ་ནས་གོང་མའི་སློབ་ཕྲུག་རྣམས་ལ་སོ་སོ་རང་ཉིད་ཀྱིས་དཔྱད་པ་གཏོང་ཐུབ་པ་ཞིག་བཟོ་དགོས་པ། སློབ་ཕྲུག་རྣམས་ལ་དཔེ་དེབ་ཀློག་རྒྱུའི་གོམས་གཤིས་བསྐྲུན་ཐབས་དང་། དེ་བཞིན་སྣེ་མང་སྒྱུ་རྩལ་དང་། ཁེ་ལས། སཱི་ཤེས་ཡོན་བཅས་ཚགས་ཚུད་གཏོང་དགོས་པ་སོགས་ཀྱི་སྐོར་གསུངས།
གཞན་ཡང་ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས་ཀྱིས། གཞི་རིམ་འོག་མ་ནས་གཞི་རིམ་གོང་མའི་བར་གྱི་ཤེས་ཡོན་སློབ་གསོ་དེ་བཞིན་བོད་ཀྱི་སྐད་ཡིག་བརྒྱུད་སློབ་ཁྲིད་གནང་དགོས་པ་ཤེས་ཡོན་སྲིད་བྱུས་ནང་འཁོད་ཡོད་པ་ལྟར། ཤེས་རིག་ལས་ཁུངས་ནས་རིམ་པས་ལག་བསྟར་གནང་དགོས་པའི་གལ་གནད་དང་། གཞི་རིམ་འོག་མའི་ཤེས་ཡོན་སློབ་གསོ་དེ་བོད་ཀྱི་སྐད་ཡིག་བརྒྱུད་སློབ་ཁྲིད་གནང་གི་ཡོད་པ། གཞི་རིམ་བར་མ་དང་གོང་མའི་ཀློག་དེབ་དང་རྒྱུ་ཆ་གྲ་སྒིག་གནང་ཚར་བ། ཕྱི་ལོ་ ༢༠༢༣ ལོ་ནས་བཟུང་སློབ་གྲྭ་ཁ་ཤས་འདེམས་སྒྲུག་གནང་སྟེ་བོད་ཡིག་བརྒྱུད་སྤྱི་ཚོགས་ཚན་རིག་སློབ་ཁྲིད་གནང་རྒྱུ་ཡིན་པའི་སྐོར་དང་།
ཕྱོགས་མཚུངས་བཙན་བྱོལ་བོད་མིའི་སློབ་གྲྭ་ཁག་ཏུ་བོད་པའི་སློབ་ཕྲུག་གི་གྲངས་ཀ་ཉུང་དུ་འགྲོ་བཞིན་ཡོད་སྟབས་དེར་གདོང་ལེན་དང་། གཞིས་ཆགས་དང་སློབ་གྲྭ་ཁག་སྲ་བརྟན་དང་། བོད་མིའི་འཐབ་རྩོད་རྒྱུན་གནས་ཡོང་བར་ཇི་ལྟར་གནང་དགོས་པའི་སྐོར་ཚང་མས་དགོངས་པ་བཞེས་ཏེ་དགོངས་ཚུལ་ལྷུག་པོ་གསུང་རོགས། ཞེས་སོགས་ཀྱི་གསུང་བཤད་གནང་། མཐར་སཾ་བྷོ་ཊ་བོད་སློབ་ཚོགས་པའི་སྤྱི་ཁྱབ་འགན་འཛིན་གཞོན་པ་ཚེ་དབང་ནོར་བུ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་བ་དང་འབྲེལ་ཚོགས་འདུའི་དབུ་འབྱེད་མཛད་སྒོ་ལེགས་པར་གྲུབ་ཡོད།
སྤྱིར་སཾ་བྷོ་ཊ་བོད་སློབ་ཚོགས་པའི་ཁྱབ་ཁོངས་སློབ་ཁག་གི་ལོ་འཁོར་འགན་འཛིན་ཚོགས་འདུ་ཐེངས་བཅོ་ལྔ་པ་དེ་བཞིན་ཕྱི་ལོ་ ༢༠༢༢ ཟླ་ ༡༡ ཚེས་ ༢༨ ཉིན་འགོ་བཙུགས་ཏེ་ཕྱི་ཚེས་ ༢༩ བར་ཉིན་གྲངས་གཉིས་རིང་འཚོགས་རྒྱུ་ཡིན་ཞིང་། ཚོགས་འདུའི་ཉིན་དང་པོ་དང་གཉིས་པར་གྲོས་གཞི་ཁག་ལ་གྲོས་བསྡུར་སྦྱངས་བཤད་དང་གྲོས་ཆོད་འཇོག་གནང་རྒྱུ་ཡིན་པ་བཅས།།
