༄༅། །འདི་གར་ཆེས་མཐོའི་ཁྲིམས་ཞིབ་ཁང་ནས་བཏང་གནས་ནང་འཁོད་དོན། སྐོར་སྐྱོད་ཁྲིམས་ཞིབ་པ་ལྷ་འབྲུག་ལགས་དང་བྱང་ཕྱོགས་ས་གནས་ཁྲིམས་དྲུང་བློ་བཟང་ལགས་གཉིས་ནས་ཟླ་འདིའི་ཚེས་ ༡༨ ཉིན་གྱི་སྔ་དྲོ་ཆུ་ཚོད་ ༡༡༌༠༠ ཐོག་ལ་ཁན་ཝ་ལ་གཞིས་ཆགས་སུ་ས་གནས་འགོ་འཛིན་ལས་ཚབ་གཙོས་པའི་ལས་བྱེད་དང་། ཁྱབ་ཁོངས་ཀྱི་མི་མང་བཅས་མི་གྲངས་ ༣༥ དང་། དེ་བཞིན་ཉིན་རྒྱབ་ཆུ་ཚོད་ ༢༌༣༠ ཐོག་སེ་ལ་ཀུའི་ལག་ཤེས་སློབ་གཉེར་ཁང་དུ་སློབ་གྲྭའི་དབུ་འཛིན་གཙོས་པའི་དགེ་ལས་དང་། སློབ་མ་གྲངས་ ༡༤༢ བཅས་ནས་བཙན་བྱོལ་བོད་མིའི་ཁྲིམས་ལུགས་ཀྱི་གོ་རྟོགས་ལས་གཞི་ནང་མཉམ་ཞུགས་གནང་ཐུབ་པ་བྱུང་འདུག
ཁྲིམས་ལུགས་གོ་རྟོགས་ཀྱི་ལས་རིམ་ནང་བཙན་བྱོལ་བོད་མིའི་མང་གཙོའི་འཕེལ་རིམ་དང་། མང་གཙོ་ཀ་བ་གསུམ་གྱི་ངོ་བོ་དང་འགན་དབང་ངོ་སྤྲོད། བོད་མིའི་ཁྲིམས་ཞིབ་ཁང་གི་ཁྲིམས་ལུགས་དབང་འཛིན་གྱི་བྱུང་རིམ་དང་། ངོ་བོ། འགན་དབང་། གྲུབ་ཆ། སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་ནང་གསལ་ཁ་མཆུ་ཞུ་གཏུག་མ་བྱས་གོང་རང་ངོས་ནས་ཤེས་དགོས་པའི་གནད་དོན་དང་། ཁ་མཆུ་ཞུ་གཏུག་གི་ཞུ་སྙན་འབུལ་སྟངས་དང་། ཐོག་མ་ཁ་མཆུ་ཞུ་གཏུག་གི་བྱ་རིམ། བར་དུ་ཁ་མཆུ་གཏུག་བཤེར་གྱི་བྱ་རིམ། མཐའ་མ་ཁ་མཆུ་ཐག་གཅོད་ཀྱི་བྱ་རིམ་དང་། བཅོས་གསོའི་ཐབས་ལམ་ཇི་ཡོད་སོགས་ཀྱི་གོ་རྟོགས། སྐབས་མཚམས་སོ་སོར་དྲི་བ་བྱུང་བ་ཁག་ལ་ལན་འདེབས་གསལ་བཤད་ཀྱང་གནང་འདུག་པའི་གསར་འགྱུར་དུ། །
