༄༅། །ཕྱི་ལོ་ ༢༠༢༢ ཟླ་བ་ ༡༡ ཚེས་ ༢༡ ཉིན་བཞུགས་སྒར་རྡ་ས་ཉེ་འཁྲིས་སུ་ཆགས་པའི་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་བོད་མིའི་སྒྲིག་འཛུགས་ཀྱི་ལས་བྱ་སྡེ་ཚན་གྱི་ལས་བྱེད་ཁག་གཅིག་ལ་ཉེར་མཁོའི་བོད་ཡིག་ཟབ་སྦྱོང་གནང་འགོ་བཙུགས་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༠༨ ཙམ་ལ་ཟབ་སྦྱོང་དབུ་འབྱེད་ཀྱི་མཛད་སྒོའི་སྐུ་མགྲོན་གཙོ་བོར་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་་དཔེ་ཟུར་དབང་འདུས་ཚེ་རིང་མཆོག་དང་། འདེམས་ལྷན་དྲུང་ཆེ་ཚེ་རིང་དབྱངས་སྐྱིད་ལགས། ས་རཱ་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས། དེ་བཞིན་ཟབ་ཁྲིད་པ་རྣམ་པ། འབྲེལ་ཡོད་ལས་བྱེད་དང་ཟབ་སྦྱོང་ལ་མཉམ་ཞུགས་གནང་མཁན་སྲི་ཞུའི་ལས་བྱེད་བཅས་ཚང་འཛོམས་ཐོག་ས་རཱ་མཐོ་སློབ་ཀྱི་སློབ་སྤྱི་པ་སངས་ཚེ་རིང་ལགས་ཀྱིས་ས་རཱ་མཐོ་སློབ་ཀྱི་འབྱུང་རིམ་ལོ་རྒྱུས་དང་མཐོ་སློབ་དེ་ནས་བོད་མིའི་སྤྱི་ཚོགས་ཁྲོད་ཚད་ལྡན་དགེ་རྒན་དང་། གཞུང་ཞབས་སྲི་ཞུ་བ་སྐྱེད་སྲིང་གནང་ཡོད་སྐོར་འགྲེལ་བརྗོད་གནང་རྗེས་འདེམས་ལྷན་ཚོགས་གཙོ་དཔེ་ཟུར་དབང་འདུས་ཚེ་རིང་ལགས་ཀྱིས་ཟབ་སྦྱོང་གི་དགོས་པ་དམིགས་ཡུལ་གཙོ་བོ་ནི། བོད་ནང་རྒྱ་ནག་གཞུང་གི་བཙན་གནོན་ཆེ་བའི་སྲིད་བྱུས་འོག་བོད་ཀྱི་ཆོས་རིག་སྐད་དང་བཅས་པ་རྩ་མེད་འགྲོ་ཉེན་ཆེ་བས་བཙན་བྱོལ་ནང་དུ་བོད་ཀྱི་ཆོས་དང་རིག་གཞུང་། སྐད་ཡིག་བཅས་མི་ཉམས་རྒྱུན་འཛིན་གནང་རྒྱུ་གནད་ཀྱི་དམ་པ་ཡིན་པ་ལྟར་དེ་འབྲེལ་བོད་མིའི་སྒྲིག་འཛུགས་ཀྱི་སྲི་ཞུ་བ་རྣམས་ལ་ཆེད་དམིགས་ཀྱིས་ཟབ་སྦྱོང་གོ་སྒྲིག་གནང་ཡོད་པ་དང་། དེ་ལུགས་མཉམ་ཞུགས་པ་རྣམས་ནས་ཐེངས་འདིའི་གོ་སྐབས་དམ་འཛིན་གྱིས་བོད་ཡིག་གི་ཤེས་ཚད་ཡར་རྒྱར་གང་ཐུབ་གཏང་རྒྱུར་འབད་ཐབས་གནང་དགོས་ཞེས་གསུངས། ཕྱོགས་མཚུངས་ཁོང་གིས་བོད་མི་རྣམས་བཙན་བྱོལ་དུ་འབྱོར་མ་ཐག་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་ཆེད་ཤེས་ཡོན་དང་ཆོས་རིག་བསྟི་གནས་གསར་འཛུགས་གནང་ཐུབ་པ་བྱུང་བ་རྣམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཡིན་པས་བོད་མི་རྣམས་ནས་མགོན་པོ་མཆོག་གི་བཀའ་དྲིན་དྲན་རྒྱུ་གལ་ཆེན་པོ་ཡིན་པ་སོགས་ཀྱི་ཐད་གསུང་བཤད་གནང་ཡོད།

ཉིན་གྲངས་བཅུ་གཉིས་ཀྱི་བོད་ཡིག་ཉེར་མཁོའི་ཟབ་སྦྱོང་དེར་ཨ་རིའི་རོགས་ཚོགས་ (USAID) དང་། (NDI) གཉིས་ཀྱིས་མཐུན་འགྱུར་སྦྱར་གནང་ཡོད་པ་བཅས།།