༄༅། །བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་གིས་གོ་སྒྲིག་གནང་པའི་ལས་བྱེད་གསར་འདེམས་རྣམས་ལ་དམིགས་པའི་བོད་ཨིན་སྐད་ཡིག་གཙོ་བོར་གྱུར་པའི་འཛིན་སྐྱོང་དང་འབྲེལ་བའི་རྒྱུས་སྟོན་ཟབ་སྦྱོང་ཕྱི་ལོ་ ༢༠༢༢ ཟླ་བ་ ༡༡ ཚེས་ ༡༧ ཉིན་ལེགས་པར་མཇུག་སྒྲིལ་ཡོད།
དེ་ཡང་གཟའ་འཁོར་གཉིས་རིང་གི་རྒྱུས་སྟོན་ཟབ་སྦྱོང་གི་མཇུག་སྡོམ་མཛད་སྒོ་ཕྱི་ཚེས་ ༡༧ ཉིན་རྒྱབ་ཆུ་ཚོད་ ༠༤ ཐོག་རྡ་ས་འཛིན་སྐྱོང་སྦྱོང་བརྡར་བསྟི་གནས་ཁང་གི་ཐུ་མི་ཚོགས་ཁང་དུ་ཚོགས་ཡོད་པ་དང་། མཛད་སྒོའི་སྐུ་མགྲོན་གཙོ་བོར་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་དཔེ་ཟུར་དབང་འདུས་ཚེ་རིང་མཆོག་དང་། ལས་བྱེད་འདེམས་ལྷན་ཚོགས་མི་ན་ག་སངས་རྒྱས་བསྟན་དར་ལགས། ལས་བྱེད་འདེམས་ལྷན་ཚོགས་མི་ཆོས་དབྱིངས་དོན་གྲུབ་ལགས། ལས་བྱེད་འདེམས་ལྷན་དྲུང་ཆེ་ཚེ་རིང་དབྱངས་སྐྱིད་ལགས། ཟབ་སྦྱོང་སློབ་ཁྲིད་པ་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་གཙང་ཕྲུག་སྟོབས་ལགས། དེ་བཞིན་འབྲེལ་ཡོད་ལས་བྱེད། ཟབ་སྦྱོང་བ་བཅས་ཚང་འཛོམས་ཀྱི་ཐོག་མར་ལས་བྱེད་འདེམས་ལྷན་དྲུང་ཆེ་ཚེ་རིང་དབྱངས་སྐྱིད་ལགས་ཀྱིས་ལས་བྱེད་གསར་པ་རྣམས་ནས་ལྷག་བསམ་སྤོབས་པ་ཆེར་སྐྱེད་ཀྱིས་བོད་མིའི་བདེ་དོན་སླད་ཞབས་ཞུ་བསྒྲུབ་རྒྱུའི་མངོན་འདོད་ཡོད་པའི་ཐོག་ལས་དོན་སྒྲུབ་པར་སྤྲོ་བ་དང་གཞན་དང་མཐུན་ལམ་གང་ལེགས་དགོས་པ་སོགས་ཀུན་སྤྱོད་དང་བསམ་བློ་ཁྱེར་གསོ་ཇི་དགོས་ཐད་ལམ་སྟོན་གནང་སོང་། 
དེ་རྗེས་གསར་འདེམས་སྲི་ཞུའི་ལས་བྱེད་རྣམས་ནས་ཟབ་སྦྱོང་གི་ཉམས་མྱོང་བརྗེ་སྤེལ། གཞན་ཡང་ཟབ་སྦྱོང་བ་རྣམས་ལ་ཟབ་སྦྱོང་ལེགས་གྲུབ་ཀྱི་ཕྱག་འཁྱེར་གནང་གྲུབ་མཚམས་འདེམས་ལྷན་ཚོགས་གཙོ་མཆོག་གིས་སྲི་ཞུའི་ལས་བྱེད་གསར་འདེམས་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དྲན་པའི་ཐོག་བོད་མིའི་སྒྲིག་འཛུགས་ནང་ཞབས་ཞུ་ཡུན་རིང་སྒྲུབ་ཐབས་འབད་འབུངས་གནང་དགོས་པ་དང་། བྱུང་འགྱུར་བོད་མིའི་སྒྲིག་འཛུགས་གནས་མིན་གཞོན་སྐྱེས་རྣམས་ལ་རག་ལུས་ཡོད་པས་དེ་འབྲེལ་བསམ་ཤེས་དགོས་གལ་ཆེ་བ་དང་། ས་གནས་ཁག་ཏུ་ལས་གནས་བསྐོ་བཞག་གནང་ཡོད་ཚེ་དེ་ཉིད་གོ་སྐབས་སུ་མཐོང་ནས་དམ་འཛིན་གནང་ཐུབ་ན་ཉམས་མྱོང་དང་གཞན་ཕན་རླབས་ཆེ་སྒྲུབ་ནུས་པ་མ་ཟད། དམིགས་བསལ་བོད་མིའི་གཞིས་ཆགས་ཁག་གི་འཁོས་ཞན་ཉམ་ཐག་གི་བདེ་སྡུག་ལ་ལྟ་སྐྱོང་གནང་རྒྱུར་ཧུར་སྐྱེད་གནང་དགོས་པའི་ལམ་སྟོན་གནང་རྗེས་གསར་འདེམས་སྲི་ཞུ་བ་རྣམས་ནས་གཞས་སྣ་ཁག་གཅིག་གཟིགས་འབུལ་ཞུས་ཏེ་ཟབ་སྦྱོང་ལེགས་པར་མཇུག་སྒྲིལ་ཡོད་པ་བཅས།།
