༄༅། །འདི་གར་ཆེས་མཐོའི་ཁྲིམས་ཞིབ་ཁང་ནས་བཏང་གནས་ནང་འཁོད་དོན།  སྐོར་སྐྱོད་ཁྲིམས་ཞིབ་པ་ལྷ་འབྲུག་ལགས་དང་བྱང་ཕྱོགས་ས་གནས་ཁྲིམས་དྲུང་བློ་བཟང་ལགས་གཉིས་ནས་ཟླ་འདིའི་ཚེས་ ༢ ཉིན་གྱི་ཞོགས་པ་ཆུ་ཚོད་ ༡༠༌༣༥ ཐོག་དྷ་རམ་ས་ལ་ས་གནས་འགོ་འཛིན་ལས་ཁུངས་ཀྱི་ཚོགས་ཁང་དུ་ས་གནས་འགོ་འཛིན་གཙོས་པའི་ས་འཐུས་ཚོགས་གཙོ་དང་། ཚོགས་སྡེ་ཁག་གི་སྐུ་ཚབ་རྣམ་པ། ཁྱབ་ཁོངས་ཀྱི་མང་ཚོགས་བཅས་ཁྱོན་མི་གྲངས་ ༤༠ དང་། གོང་ཚེས་ཉིན་རྒྱབ་ཆུ་ཚོད་ ༣ པ་ཐོག་དྷ་སྟེང་བོད་ཁྱིམ་སློབ་གྲྭའི་བདེ་སྐྱིད་ཚེ་རིང་ཚོགས་ཁང་དུ་འཛིན་རིམ་བཅུ་པ་ནས་བཅུ་གཉིས་བར་གྱི་སློབ་མ་དང་དགེ་རྒན་བཅས་ཁྱོན་མི་གྲངས་ ༢༥༠ དང་། ཕྱི་ཚེས་ ༣ ཉིན་གྱི་ཞོགས་པ་ཆུ་ཚོད་༡༠༌༣༠ ཐོག་གོ་པལ་པུར་བོད་ཁྱིམ་སློབ་གྲྭའི་ཚོགས་ཁང་དུ་འཛིན་རིམ་དགུ་པ་ནས་བཅུ་གཅིག་བར་གྱི་སློབ་མ་དང་དགེ་རྒན་བཅས་ཁྱོན་མི་གྲངས་ ༦༠༠ མཉམ་ཞུགས་གནང་བ་རྣམས་ལ་བཙན་བྱོལ་བོད་མིའི་ཁྲིམས་ལུགས་ཀྱི་གོ་རྟོགས་ལས་གཞི་ཞིག་སྤེལ་ཐུབ་པ་བྱུང་ཡོད།ཁྲིམས་ལུགས་གོ་རྟོགས་ཀྱི་ལས་རིམ་ནང་བཙན་བྱོལ་བོད་མིའི་མང་གཙོའི་འཕེལ་རིམ་དང་། མང་གཙོ་ཀ་བ་གསུམ་གྱི་ངོ་བོ་དང་འགན་དབང་ངོ་སྤྲོད། བོད་མིའི་ཁྲིམས་ཞིབ་ཁང་གི་ཁྲིམས་ལུགས་དབང་འཛིན་གྱི་བྱུང་རིམ་དང་། ངོ་བོ། འགན་དབང་། གྲུབ་ཆ། སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་ནང་གསལ་ཁ་མཆུ་ཞུ་གཏུག་མ་བྱས་གོང་རང་ངོས་ནས་ཤེས་དགོས་པའི་གནད་དོན་དང་། ཁ་མཆུ་ཞུ་གཏུག་གི་ཞུ་སྙན་འབུལ་སྟངས་དང་། ཐོག་མ་ཁ་མཆུ་ཞུ་གཏུག་གི་བྱ་རིམ། བར་དུ་ཁ་མཆུ་གཏུག་བཤེར་གྱི་བྱ་རིམ། མཐའ་མ་ཁ་མཆུ་ཐག་གཅོད་ཀྱི་བྱ་རིམ་དང་། བཅོས་གསོའི་ཐབས་ལམ་ཇི་ཡོད་སོགས་ཀྱི་གོ་རྟོགས། སྐབས་མཚམས་སོ་སོར་དྭོགས་འདྲི་བྱུང་བ་ཁག་ལ་ལན་འདེབས་གསལ་བཤད་གནང་ཡོད་པ་དང་།  ལྷག་པར་དུ་སློབ་གྲྭ་ཁག་ལ་གོ་རྟོགས་སྤེལ་སྐབས། སློབ་ཕྲུག་རྣམས་ལ་སྤྱིར་བཏང་ཁྲིམས་ཀྱི་སློབ་སྦྱོང་གི་གལ་གནད་དང་སྦྲགས་དེའི་མ་འོངས་མདུན་ལམ། སྤྱི་ཚོགས་ལ་ཕན་ནུས་བཅས་ཀྱི་སློབ་གསོ་བཅས་ཀྱང་གནང་འདུག་པ་བཅས།།