༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༡༠ ཚེས་ ༢༩ ཉིན་ཨ་རིའི་གྲོང་ཁྱེར་ནིའུ་ཡོག་ནང་དུ་རྒྱ་ནག་དམར་ཤོག་ཚོགས་པའི་་ཚོགས་ཆེན་ཉི་ཤུ་པའི་རྗེས་མ་འོངས་རྒྱ་ནག་གི་འགྲོ་ཕྱོགས་ཞེས་པའི་བརྗོད་གཞིའི་སྟེང་། ཕྱི་སྡོད་རྒྱ་ནག་མང་གཙོ་མཉམ་འབྲེལ་ཚོགས་པ་དང་། རྒྱ་ནག་བུད་མེད་ཚོགས་པ་གཙོས་པའི་རྒྱ་རིགས་ཚོགས་པ་བཞི་ནས་མཉམ་འབྲེལ་ཐོག་བགྲོ་གླེང་ཚོགས་འདུ་ཞིག་བསྐོང་ཚོགས་གནང་བ་དང་། ཚོགས་འདུའི་སྟེང་ཨ་རིར་རྟེན་གཞི་བྱས་པའི་རྒྱ་རིགས་མང་གཙོ་དོན་གཉེར་བ་གྲགས་ཅན་དང་རྒྱ་ནག་དཔྱད་ཞིབ་པ། དེ་བཞིན་ས་གནས་སུ་ཡོད་པའི་་རྒྱ་སྐད་གསར་ཁང་ཁག་ཀྱང་མཉམ་ཞུགས་གནང་ཡོད་པ་དང་། གསུང་བཤད་གནང་མཁན་གྱི་གྲས་སུ་སྐུ་ཞབས་ཝེ་ཅིང་ཧྲིང་ལགས་དང་། ཝང་ཏན་ཁྲིན་ཀོང་ཁྲིང་ཁྲིན་ཕོ་ཁུང་ལགས། ཅིན་ཀྲུང་ལགས། ཝང་རོས་ཆིན་ལགས་སོགས་མཉམ་ཞུགས་གནང་་ཡོད། བྱང་ཨ་རི་དོན་ཁང་གི་རྒྱ་རིགས་འབྲེལ་མཐུད་པ་མགྲོན་འབོད་ལྟར་ཚོགས་འདུར་མཉམ་ཞུགས་ཀྱིས་རྒྱ་ནག་དམར་ཤོག་ཚོགས་ཆེན་ ༢༠ པ་དང་བོད་ཀྱི་གནད་དོན་གྱི་ཐད་གསུང་བཤད་གནང་ཡོད།

ཚོགས་འདུའི་སྟེང་རྒྱ་རིགས་གསུང་བཤད་པ་མང་ཆེ་བས་ཧུ་ཅིན་ཐོའོ་ལ་མི་འདོད་བཞིན་དུ་བཙན་པོ་དབང་ཡོད་ཀྱིས་ཚོགས་ཆེན་ནས་ཕྱིར་འཁྲིད་པའི་གནད་དོན་སྟེང་བསམ་ཚུལ་བཏོན་གནང་བ་དང་། བྱས་སྟངས་དེ་ནི་ཚོགས་ཆེན་སྟེང་གི་འགོ་འཁྲིད་ཙམ་མ་ཟད་མི་མང་གི་འཐུས་མི་ཡིན་ཞེས་ཚོགས་ཆེན་ལ་མཉམ་ཞུགས་བྱེད་མཁན་ཡོངས་ལ་ཡ་རབས་བཟང་སྤྱོད་ཀྱི་གཡའ་ཙམ་ཡང་མེད་པར་ཐ་ཤལ་གྱི་བྱེད་བབ་ཡིན་པ་འགྲེལ་བརྗོད་ཡང་གནང་སོང་།

སྐུ་ཞབས་ཅིན་ཀྲུང་ལགས་ཀྱིས་གནད་དོན་དེ་ནི་དེ་སྔ་རྒྱ་ནག་དམར་ཤོག་གཞུང་གི་འགོ་ཁྲིད་ལིན་པཡོ་ཡི་གནས་ཚུལ་དང་མཚུངས་བསྡུར་ཐུབ་པའི་གནད་དོན་བློ་ཡུལ་ལ་མི་ཤོང་བ་ཞིག་ཡིན་པ་གསུང་གནང་བ་དང་། སྐུ་ཞབས་ཝེ་ཅིང་ཧྲིང་ལགས་ཀྱིས་དམར་ཤོག་གཞུང་དེ་ནི་སྤྱི་ཚོགས་ནག་པོའི་བྱེད་ལས་རྐྱང་བསྒྲུབ་ནས་མི་མང་དང་ཉམ་ཆུང་ཚོར་རྟག་ཏུ་ཐུབ་ཚོད་བྱེད་མཁན་ཡིན་པ་དང་། ཞི་ཅིང་ཕིན་གྱིས་རྒྱ་ནག་གི་གོང་མ་ལྟ་བུའི་གཅིག་བསྡུས་སྲིད་དབང་སྒེར་སྤྱོད་བྱེད་འཆར་གྱིས་རྒྱ་ནག་རྒྱལ་རྒྱུད་སྐབས་ཀྱི་གནས་བབ་ལ་ཕྱིར་ལོག་བྱས་ཡོད་པས་རྒྱ་ནག་ནང་དཀའ་ངལ་ཇེ་ཆེར་འགྲོ་བཞིན་པ་བཤད།

སྐུ་ཞབས་ཁྲིན་ཀོང་ཁྲིང་ལགས་ཀྱིས་རྒྱ་ནག་དམར་ཤོག་གཞུང་དེ་མེད་པ་མ་ཆགས་བར་རྒྱ་ནག་ནང་སྐྱིད་པའི་ཉིན་མོ་ཡོང་ཐབས་བྲལ་བ་ཡིན་པ་དང་། ད་ལྟའི་དུས་སྐབས་དེ་འདྲར་མི་མང་ནས་འགན་ལེན་ཐུབ་དགོས་པ་གསུང་གནང་སོང་། དེ་བཞིན་རྒྱ་ནག་ཆབ་སྲིད་དཔྱད་ཞིབ་གནང་མཁན་གྱི་གསུང་བཤད་པ་མང་དག་ནས་ད་ལྟའི་རྒྱ་ནག་གི་འགྱུར་བ་འགྲོ་སྟངས་ལ་གཞིག་ན་དུས་སྐབས་དང་གནས་སྟངས་གང་ཅིར་དཀའ་ངལ་ཅན་དུ་འགྱུར་སྲིད་ཀྱང་དེ་ལྟ་བུའི་དུས་སྐབས་དེ་ཡང་རྒྱ་ནག་དམར་ཤོག་ཁ་འཐོར་དུ་འགྲོ་སྲིད་པའི་རེ་བ་ཡོད་པ་ཚོད་དཔག་བྱེད་མཁན་ཡང་མི་ཉུང་བས་འགྲེལ་བརྗོད་གནང་སོང་།

རྒྱ་རིགས་འབྲེལ་མཐུད་པས་རྒྱ་ནག་དམར་ཤོག་ཚོགས་པའི་ཚོགས་ཆེན་ ༢༠ པའི་སྐབས་ཞི་ཅིན་ཕིང་གི་གཏམ་བཤད་ཀྱི་ནང་བོད་དོན་དང་འབྲེལ་བའི་སྐོར་ལ་ཚིག་གཅིག་ཀྱང་འགྲེལ་བརྗོད་བྱས་མེད་པའི་ཐོག་ནས་བོད་ཀྱི་གནད་དོན་ལ་ཁྱད་གསོད་དང་སྣང་མེད་བཏང་བར་ངོས་འཛིན་དང་། རྒྱ་ནག་དམར་ཤོག་གཞུང་གིས་བོད་ནང་བོད་མིའི་བདེ་སྡུག་གི་ཆེད་ལས་ཀ་བྱེད་ཐུབ་མཁན་བོད་རིགས་འགོ་ཁྲིད་གཅིག་ཀྱང་གསོ་སྐྱོང་ཐུབ་མེད་པ་ནི་རྒྱ་ནག་གཞུང་གིས་བོད་བཙན་བཟུང་བྱས་ནས་ལོ་ངོ་དྲུག་ཅུ་ལྷག་གི་རིང་བྱུང་བའི་ཕམ་ཉེས་ཡིན་པ་བཤད། དེ་བཞིན་ལྷ་སའི་ནང་ཏོག་དབྱིབས་ཀླད་ཀོར་གྱི་སྲིད་བྱུས་ལ་ངོ་རྒོལ་ལས་འགུལ་ཤུགས་ཆེ་སྤེལ་ཡོད་པའི་ནང་མང་ཆེ་བ་ནི་རྒྱ་རིགས་ཡིན་པ་དང་། ངོ་རྒོལ་དེ་བཞིན་གལ་སྲིད་བོད་རིགས་ནས་ལས་འགུལ་སྤེལ་ཡོད་ཚེ། དམག་དཔུང་དང་མེ་མདའི་དྲག་གནོན་བྱས་ཡོད་ངེས་ཡིན་ལ། དེའི་ལྟ་བུའི་མི་རིགས་དབྱེ་འབྱེད་ཀྱི་སྲིད་བྱུས་ལས་བོད་ནང་སྐུ་ལུས་མེར་སྲེག་ལྟ་བུའི་འ་ཆད་འུ་ཐུག་གི་གནས་ཚུལ་བཏུད་མར་བྱུང་བ་ཡིན་པ་བཤད།  རྒྱ་རིགས་འབྲེལ་མཐུད་པས་རྒྱ་ནག་དམར་ཤོག་གཞུང་གིས་བོད་ཐོག་བཟུང་བའི་སྲིད་བྱུས་ལ་ཐེར་འདོན་སྐྱོན་བརྗོད་བྱས་ནས། ༧གོང་ས་མཆོག་དང་བོད་མིའི་སྒྲིག་འཛུགས། བོད་མི་རྣམས་ནས་རྒྱ་ནག་མི་མང་ལ་མུ་མཐུད་རེ་བ་བྱེད་བཞིན་ཡོད་པ་འགྲེལ་བརྗོད་བྱས་པ་དང་བཅས། །