<< བླ་མ་དང་སྤྱན་རས་གཟིགས་དབྱེར་མེད་ཀྱི་རྣལ་འབྱོར་དངོས་གྲུབ་ཀུན་འབྱུང་། >> ཕྱག་དཔེ་དང་མཐུན་པའི་སྐུ་ཐང་གསར་པ།

༄༅། །འདི་གར་བྱང་ཨ་རི་སྐུ་ཚབ་དོན་ཁང་གི་བོད་རིགས་འབྲེལ་མཐུད་པས་བཏང་གནས་ནང་འཁོད་དོན། བྱང་ཨ་རིའི་བོད་རིགས་སྤྱི་མཐུན་ཚོགས་པ་ཁག་དང་། བོད་ཕྲུག་ཁྱིམ་སྡེའི་ལས་སློབ་ངོ་ཟུར་ཡོངས་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་ཆོག་པའི་གསོལ་འདེབས་ཞུས་པར་ཞལ་བཞེས་བཟང་པོ་ཐོབ་སྟེ།  ཟླ་བ་སྔོན་མའི་ཚེས་ ༢༦ ཉིན་བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། ཚེ་དཔག་མེད་དྭངས་མ་བཅུད་འདྲེན་གྱི་ཆོ་གའི་ཐོག་ནས་བརྟན་བཞུགས་འདེགས་འབུལ་ཞུས་པའི་གནང་སྒོ་ཐམས་ཅད་ཕུན་སུམ་ཚོགས་པོའི་ངང་ལེགས་གྲུབ་བྱུང་ཞིང་།  སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གིས “ ་་་་་་་ དུས་ད་ལྟའི་བར་གྱི་ལོ་ཡུན་རིང་དངོས་གནས་བོད་བསྟན་སྲིད་རིག་གཞུང་གི་ཐོག་མིག་མཐོང་ལག་ཟིན་གྱི་བྱས་རྗེས་ཤིག་ངོས་ཀྱིས་བཞག་ཡོད། བོད་ཀྱི་ཆོས་དང་རིག་གཞུང་ཟེར་དུས་འཛམ་གླིང་འདིར་ཆེ་མཐོང་ཡོད་པ་ཞིག་ཆགས་ཡོད། དེ་ངོས་ཀྱིས་བྱས་རྗེས་བཞག་པ་རེད། དེ་ནི་འཕགས་པ་སྤྱན་རས་གཟིགས་ལ་སྒྲུབ་པའི་མཆོད་པ་ཡིན། འཕགས་པ་སྤྱན་རས་གཟིགས་ཐུགས་དགྱེས་པའི་སྒོ་ནས་ངོས་ལ་བྱིན་རླབས་གནང་སྟེ་ད་དུང་འབྱུང་འགྱུར་ལོ་བཅུ་ཕྲག་གཉིས་རིང་སྡོད་ཐུབ་པ་ཞིག་དང་། ངོས་ཀྱི་རྨི་ལམ་དུའང་ལོ་བརྒྱ་དང་བཅུ་སྐོར་ཐོན་ཡོང་གི་འདུག་་་་་  ” སོགས་སུས་ཉན་ཡང་དགའ་ཚོར་དཔག་མེད་ཡོང་བའི་བཀའ་བཟང་ཕེབས་ཡོད་པ་བཅས། བརྟན་བཞུགས་ཀྱི་གནས་ཚུལ་རྒྱས་པ་བོད་མིའི་སྒྲིག་འཛུགས་ཀྱི་དྲྭ་རྒྱར་བཀོད་ཐོན་ཟིན་ཡོད།

ཐེངས་འདིའི་བརྟན་བཞུགས་སྐབས་རང་རིགས་སེར་སྐྱ་ཀུན་ལ་བརྗེད་ཐབས་མེད་པའི་ཆེས་དམིགས་བསལ་གྱི་བསོད་ནམས་ཆེན་པོ་དང་གོ་སྐབས་ཡག་པོ་ཞིག་བྱུང་ཡོད་པ་ནི། བརྟན་བཞུགས་གྲ་སྒྲིག་ཚོགས་ཆུང་གིས་སྔོན་ཚུད་ནས་སྙན་སེང་ཞུས་དོན་བཞིན་བརྟན་བཞུགས་ཀྱི་མཇུག་ཏུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ <<བླ་མ་དང་སྤྱན་རས་གཟིགས་དབྱེར་མེད་ཀྱི་རྣལ་འབྱོར་དངོས་གྲུབ་ཀུན་འབྱུང་།>> གི་ལྗགས་ལུང་བཀའ་དྲིན་སྩལ་ཡོད་པ་དེ་རེད།  

བརྟན་བཞུགས་གྲ་སྒྲིག་ཚོགས་ཆུང་གིས་ད་ངུང་ <<བླ་མ་དང་སྤྱན་རས་གཟིགས་དབྱེར་མེད་ཀྱི་རྣལ་འབྱོར་དངོས་གྲུབ་ཀུན་འབྱུང་།>> གི་ཕྱག་དཔེ་དང་མཐུན་པའི་སྐུ་ཐང་ཚད་ལྡན་གྲངས་ ༣༠༠༠ པར་སྐྲུན་གྱིས་ཚོགས་ཡོངས་ལ་འགྲེམས་སྤེལ་མ་གནང་གོང་སྐུ་ཐང་གཅིག་གཟིགས་ཕུད་ཀྱི་ཚུལ་དུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་འབུལ་ལམ་ཞུས་པ་དེ་ལ་བརྟན་བཞུགས་དབུ་འཛུགས་མ་གནང་གོང་གི་ཞོགས་པར་༧རྒྱལ་བའི་གཟིམ་ཆུང་དུ་ཐུགས་ཞིབ་བྱིན་གྱིས་རླབས་ཤིང་། དེ་རྗེས་བརྟན་བཞུགས་ཀྱི་མཇུག་ཏུ་<<བླ་མ་དང་སྤྱན་རས་གཟིགས་དབྱེར་མེད་ཀྱི་རྣལ་འབྱོར་དངོས་གྲུབ་ཀུན་འབྱུང་། >> གི་ལྗགས་ལུང་བཀའ་དྲིན་སྩལ་ཡོད་པ་རེད། 

བརྟན་བཞུགས་གྲ་སྒྲིག་ཚོགས་ཆུང་གི་སློབ་སྟོན་པ་ངག་དབང་འཆི་མེད་ལགས་ནས་འགྲེལ་བརྗོད་གནང་བར་གཞིགས་ན།  བྱང་ཨ་རི་སྐུ་ཚབ་དོན་གཅོད་མཆོག་གིས་ད་རེས་བརྟན་བཞུགས་གྲ་སྒྲིག་ཚོགས་ཆུང་གི་ཚོགས་མི་ཡོངས་ཀྱི་ཚབ་ཞུས་ནས་དཔལ་ལྡན་དགའ་ལྡན་ཕོ་བྲང་ཡིག་ཚང་བརྒྱུད་༧སྙན་སེང་སྒྲོན་པ་བཞིན་༧གོང་ས་མཆོག་ནས་<<བླ་མ་དང་སྤྱན་རས་གཟིགས་དབྱེར་མེད་ཀྱི་རྣལ་འབྱོར་དངོས་གྲུབ་ཀུན་འབྱུང་།>> གི་ལྗགས་ལུང་བཀའ་དྲིན་སྩལ་བ་ (ཡུའུ་ཁྲུབ་དྲྭ་ཐག་མཚམས་འདིར་ 2:31:26 ལྗགས་ལུང་མཇལ་རྒྱུ་ཡོད།) དང་།  ལྗགས་ལུང་གང་གནང་བའི་ཕྱག་དཔེ་དང་མཐུན་པའི་སྐུ་ཐང་པར་ཕུད་ལ་བྱིན་རླབས་གནང་བ་འདིས།  དད་དམ་མོས་གུས་གཡོ་བ་མེད་པའི་སེར་སྐྱ་ཀུན་གྱིས་༧གོང་ས་མཆོག་དང་སྤྱན་རས་གཟིགས་དབྱེར་མེད་ཀྱི་བླ་མའི་འབྱོར་ལམ་ཡོངས་རྫོགས་ཉིན་ལྟར་བཤར་སྒོམ་བྱེད་རྒྱུར་ཕན་ཐོགས་ཅི་ཆེ་བྱུང་ཡོད་པར་ངོས་འཛིན་གནང་གི་འདུག་ལ།  བརྟན་བཞུགས་ལ་དངོས་སུ་བཅར་མཁན་བསམ་ཡོད་ཅན་ཚོས་ཀྱང་ད་རེས་བསོད་ནམས་བསགས་སོང་།  སྐལ་པ་བཟང་པོ་བྱུང་སོང་ཞེས་སྤྲོ་བ་ཆེན་པོས་འགྲེལ་བརྗོད་གནང་གི་འདུག 

<< བླ་མ་དང་སྤྱན་རས་གཟིགས་དབྱེར་མེད་ཀྱི་རྣལ་འབྱོར་དངོས་གྲུབ་ཀུན་འབྱུང་། >> ཞེས་པའི་ཕྱག་དཔེ་དེ་ནི། བཀའ་བློན་ལས་རོགས་ཤན་ཁ་བ་འགྱུར་མེད་བསོད་ནམས་སྟོབས་རྒྱལ་གྱིས་༧གོང་ས་༧སྐྱབས་མགོན་ཆེན་པོ་མཆོག་ལ་རེ་སྐུལ་སྙན་སེང་ནན་ཞུས་བྱས་པ་བཞིན་༧གོང་ས་མཆོག་ནས་ལྗགས་རྩོམ་མཛད་པ་ཞིག་ཡིན་པ་རེད།།