༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༡༠ ཚེས་ ༢༦ ཉིན་ཐའེ་ཝན་གྱི་ས་གནས་ཤིང་ཀྲོག་ཏུ་ཡོད་པའི་ཆིང་ཧྭ་གཙུག་ལག་སློབ་གཉེར་ཁང་དུ་ཐའེ་ཝན་བོད་ཀྱི་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས་བོད་དང་དེང་སང་རྒྱལ་སྤྱིའི་གནས་བབ་འོག་མ་འོངས་བོད་དོན་ཁ་ཕྱོགས་ཞེས་པའི་བརྗོད་གཞི་ཐོག་བོད་ཀྱི་སྔ་རབས་ལོ་རྒྱུས་དང་། བོད་ཀྱི་འགྲོ་བ་མིའི་བྱུང་རབས། བོད་ཀྱི་སྐད་ཡིག་དང་ཐ་སྙད་བྱུང་རབས། ལུགས་སྲོལ་གོམས་གཤིས། ཆོས་དད་རང་དབང་སོགས་ཇི་ཡོད་སྐོར་དང་། དེ་ནས་ཕྱི་ལོ་ ༡༩༤༩ ནས་རྒྱ་དམར་བོད་དུ་བཙན་འཛུལ་བྱེད་འགོ་བཙུགས་པ་ནས་བཟུང་ཕྱི་ལོ་ ༡༩༥༡ ལོར་གྲོས་མཐུན་དོན་ཚན་བཅུ་བདུན་ལ་རྒྱ་གཞུང་ནས་རྩིས་མེད་རྡོག་རོལ་བཏང་རྗེས་ཕྱི་ལོ་ ༡༩༥༩ ལོར་བོད་ས་ཁྱོན་ཡོངས་སུ་རྒྱ་མིས་བཙན་འཛུལ་བྱེད་པར་བརྟེན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཙན་བྱོལ་དུ་ཕེབས་དགོས་བྱུང་རྗེས། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༡༩༥༩ ལོར་བཙན་བྱོལ་བོད་གཞུང་རྒྱ་གར་ནང་དུ་གཞི་བཙུགས་པ་དང་སྦྲགས་བོད་མིའི་ཆབ་སྲིད་ལམ་སྲོལ་དེ་བཞིན་མང་གཙོའི་ལམ་ལུགས་སུ་བསྒྱུར་བ། བོད་དོན་བདེན་མཐའ་གསལ་ཐབས་སུ་དབུ་མའི་ལམ་གྱི་སྲིད་བྱུས་ལམ་སྟོན་མཛད་ཡོད་སྐོར།
ད་ལྟའི་ཆར་བོད་ཀྱི་གནས་སྟངས་ཆེས་ཛ་དྲག་ཅན་ཏུ་སྒྱུར་བཞིན་པ་དང་། བོད་ཆོལ་ཁ་གསུམ་གྱི་ས་བབ་ས་ཁྲ་དང་བཅས་པ་རྒྱ་ནག་གི་མངའ་སྡེ་དང་ས་ཁྲའི་ནང་འཁོ་བསྡུ་བྱེད་བཞིན་པའི་གནས་སྟངས། ཞི་ཅིང་ཕིང་གིས་བོད་ལ་འཛིན་པའི་སྲིད་བྱུས་ལག་བསྟར་ཇི་ལྟར་བྱེད་བཞིན་ཡོད་སྐོར། གཞན་ཡང་རྒྱལ་སྤྱིའི་ཐོག་ནས་བོད་ཀྱི་གནད་དོན་ཐད་རྒྱབ་སྐྱོར་དང་གཟིགས་ཚུལ་བཅས་པའི་སྐོར་ཚོུད་ ༢ ལྷག་ཙམ་རིང་བོད་དོན་དྲིལ་བསྒྲགས་དང་གོ་རྟོགས་རྒྱ་ཆེ་སྤེལ་ཐུབ་པ་བྱུང་ཡོད། །
