༄༅། །ཡུ་རོབ་མཐུན་ཚོགས་ནང་གི་ཅེཀ་སྤྱི་མཐུན་རྒྱལ་ཁབ་ཀྱི་གཏན་འཇགས་སྐུ་ཚབ་ལྕམ་ཨི་ཊི་ཏ་ཧར་ཊ་ (Edita Hrda) ལགས་དང་། བེལ་ཇམ་གནས་འཁོད་ཅེཀ་སྤྱི་མཐུན་རྒྱལ་ཁབ་ཀྱི་གཞུང་ཚབ་པ་ཝེལ་ཀུ་ལུ་ཀི་ (Pavel Klucky) ལགས། ན་ཊོ་མཐུན་ཕྱོགས་རྒྱལ་ཁབ་ཀྱི་ཅེཀ་སྤྱི་མཐུན་རྒྱལ་ཁབ་ཀྱི་གཏན་འཇགས་སྐུ་ཚབ་ཇ་ཀུབ་ལན་ཊོས་ཀི་ (Jakub Landovksy) ལགས་ཀྱི་མགྲོན་འབོད་ལྟར་ཕྱི་ལོ་ ༢༠༢༢ ཟླ་བ་ ༡༠ ཚེས་ ༢༨ ཉིན་བེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཅེཀ་སྤྱི་མཐུན་རྒྱལ་ཁབ་ལ་རང་བཙན་ཐོབ་ནས་ལོ་ངོ་ ༡༠༤ འཁོར་བའི་དུས་ཆེན་མཛད་སྒོར་མཉམ་ཞུགས་གནང་ཡོད།

མཛད་སྒོའི་ཐོག་མར་ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་གླུ་བླངས་ཤིང་། དེ་རྗེས་སྐུ་ཚབ་གསུམ་གྱིས་གསུང་བཤད་གནང་གྲུབ་མཚམས་སྐུ་མགྲོན་རྣམས་ལ་ཅེཀ་སྤྱི་མཐུན་རྒྱལ་ཁབ་ཀྱི་སྲོལ་རྒྱུན་ཁ་ཟས་འདེགས་འབུལ་ཞུས་ཡོད། དུས་ཆེན་མཛད་སྒོ་དེ་བཞིན་ (Cercle Royal Gaulois) དུ་ཚོགས་ཡོད་པ་དང་། ས་ཚིགས་དེ་ནི་གཞུང་ཚབ་དང་། ཚན་རིག་པ། ཆབ་སྲིད་མི་སྣ། མཁས་པ་སོགས་འདུ་འཛོམས་གནང་སའི་ས་ཚིགས་ཁྱད་པར་ཅན་ཞིག་ཡིན་པ་རེད།།