༄༅། །འདི་གར་པེ་རི་སི་འབྲེལ་མཐུད་ལས་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༡༠ ཚེས་ ༢༦ ཉིན་ཕ་རཱན་སི་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མིའི་མགྲིན་ཚབ་པ་ཐེ་རེ་མུ་ནིར་ (Mr. Thierry Munier) ལགས་བརྒྱུད་དུས་ཚོད་ཞུས་ཏེ་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་སྐུ་ཇེཀ་ལིན་ (Jacqueline Eustache-Brinio) ལགས་དང་། གྲོས་འཐུས་མི་ལྕམ་སྐུ་ཨལ་སི་ཇོ་སེཕ་ (Else Joseph) ལགས། གྲོས་ཚོགས་འཐུས་མི་ལྕམ་སྐུ་ས་བྷ་ཡེན་ཌེཀ་སེ་ལར་ (Sabine Drexler) ལགས་བཅས་དང་མཇལ་འཕྲད་ཀྱིས་ད་ལྟའི་བོད་ནང་གི་ཛ་དྲག་གནས་སྟངས་སྐོར་གསལ་བཤད་དང་། བོད་དོན་ཐོག་མུ་མཐུད་ནས་རྒྱབ་སྐྱོར་གནང་བར་བཀའ་དྲིན་རྗེས་དྲིན་ཞུ་རྒྱུ་བྱུང་སོང་།གྲོས་ཚོགས་འཐུས་མི་རྣམ་པས་བོད་དོན་ཐོག་མུ་མཐུད་རྒྱབ་སྐྱོར་གནང་རྒྱུའི་ཆོད་སེམས་བརྟན་པོ་ཡོད་པ་དང་། གྲོས་ཚོགས་གོང་མའི་ནང་བོད་དོན་ཐོག་རྒྱབ་སྐྱོར་གནང་མཁན་གྲོས་ཚོགས་འཐུས་མི་གྲངས་ཉི་ཤུ་ཙམ་ཡོད་པ་བཀའ་གནང་སོང་། མ་འོངས་པར་གྲོས་ཚོགས་འོག་མའི་ནང་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་རྒྱུ་ལམ་སྟོན་གནང་རོགས་ཞུ་དོན་བཞིན་རོགས་པ་གང་དགོས་གནང་རྒྱུའི་ཞལ་བཞེས་གནང་སོང་བ་བཅས། །