༄༅། །ཕྱི་ལོ་ ༢༠༢༢ ཟླ་ ༠༩ ཚེས་ ༣༠ ཉིན་ཨི་ཊ་ལིའི་གྲོང་སྡེ་པེ་རུ་ཇའི་ལས་ཁུངས་དང་ཨི་ཊ་ལིའི་བོད་དོན་རྒྱབ་སྐྱོར་ཚོགས་པའི་གོ་སྒྲིག་འོག་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་། ཨེ་ཊ་ལིའི་པེ་རུ་ཇ་( Perugia) མངའ་སྡེའི་རིག་གཞུང་བློན་ཆེན་སྐུ་ཞབས་ལེའོ་ནར་ཌོ་ཝ་ར་ས་ནོ་ (Leonardo Varasano) མཆོག སུད་སི་བོད་ཀྱི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་བཅས་ནས་བདུན་ཕྲག་གསུམ་རིང་གི་ཨེ་ཤི་ཡའི་ལྟེ་གནས་ཏེ་བོད་ཀྱི་སྐོར་པར་རིས་འགྲེམས་སྟོན་དབུ་འབྱེད་གནང་ཡོད་པ་དང་། པར་རིས་འགྲེམས་སྟོན་དེའི་བརྗོད་དོན་གཙོ་བོ་ནི། རྒྱ་ནག་དམར་ཤོག་གཞུང་གིས་བོད་ལ་དབང་བསྒྱུར་བྱས་པ་མ་ཟད། མུ་མཐུད་བོད་མིར་དྲག་གནོན་བྱས་དང་བྱེད་བཞིན་པ། བཙན་བྱོལ་བོད་མིའི་འཚོ་བ་སོགས་ཀྱི་སྐོར་ཡིན་ཞིང་། བོད་དོན་དང་འབྲེལ་བའི་པར་རིས་འགྲེམས་སྟོན་དེ་ནི། ཨི་ཊ་ལཱིའི་བོད་དོན་རྒྱབ་སྐྱོར་ཚོགས་པའི་ (Italy-Tibet Association) ཚོགས་གཙོ་དང་པར་པ་ཁི་ལོ་ཌིའོ་ཁར་དེ་ལི་ (Claudio Cardelli) ལགས་ཀྱིས་ལོ་ངོ་ ༤༠ ལྷག་རིང་བོད་དང་འབྲེལ་བའི་པར་རིས་འདྲ་མིན་ཕྱོགས་སྒྲིག་བྱས་ཏེ་ཨི་ཊ་ལིའི་མང་ཚོགས་ལ་པར་རིས་འགྲེམས་སྟོན་གྱི་ལམ་ནས་བོད་དོན་སྐོར་འགྲེལ་བརྗོད་བྱས་དང་བྱེད་པ་ཞིག་རེད།

ཕྱི་ཟླ་ ༠༩ ཚེས་ ༢༩ ཉིན་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ཨི་ཊ་ལིའི་རྒྱལ་ས་རོམ་དུ་འབྱོར་མ་ཐག་ཨི་ཊ་ལིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་ཟུར་པ་དང་། དེ་བཞིན་བོད་དོན་རྒྱབ་སྐྱོར་ཚོགས་པའི་ཚོགས་མི་ཟུར་པ་རྣམས་དང་མཇལ་འཕྲད་གནང་ཡོད་པ་མ་ཟད། ཁོང་རྣམས་ཀྱིས་ད་བར་བོད་དོན་སླད་རྒྱབ་སྐྱོར་གནང་དང་གནང་བཞིན་པར་ཐུགས་རྗེ་ཆེ་ཞུས་གནང་ཡོད། ཨི་ཊ་ལིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་ཟུར་པ་དང་། དེ་བཞིན་བོད་དོན་རྒྱབ་སྐྱོར་ཚོགས་པའི་ཚོགས་མི་ཟུར་པ་རྣམས་ཀྱིས་མུ་མཐུད་བོད་དོན་སླད་རྒྱབ་སྐྱོར་གནང་རྒྱུའི་ཆོད་སེམས་བརྟན་པོ་ཡོད་སྐོར་གསུངས།

དེ་རྗེས་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཨི་ཊ་ལིའི་རྒྱལ་ས་རོམ་དུ་རྟེན་གཞི་བྱས་པའི་བོད་དོན་རྒྱབ་སྐྱོར་ཚོགས་པའི་ཚོགས་མི་དང་བོད་ཀྱི་གྲོགས་པོ་རྣམས་དང་ཐུག་འཕྲད་ཀྱིས་བོད་དོན་སྐོར་གླེང་སློང་གནང་ཡོད་པ་དང་། སྐབས་དེར་བཀའ་བློན་མཆོག་དང་ལྷན་དུ་ས་གནས་ཀྱི་བོད་མི་དང་བོད་བརྒྱུད་ནང་བསྟན་གྱི་ཆོས་ཚོགས་ཁག་གི་དགེ་འདུན་པ་རྣམས་ཀྱང་མཉམ་ཞུགས་གནང་ཡོད་པ་བཅས།།