༄༅། །འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཐུན་ཐེངས་ ༥༡ ནང་རྒྱལ་ཚོགས་ཀྱི་ཚོགས་མི་དང་རྒྱལ་སྤྱིའི་འགྲོ་བ་མིའི་ཚོགས་པ་ཁག་གིས་ད་ལྟའི་བོད་ནང་གི་ཛ་དྲག་གནས་སྟངས་ལ་ཐུགས་འཚབ་དང་། རྒྱ་ནག་གཞུང་གིས་ཏོག་དབྱིབས་གཉན་རིམས་ཁྱབ་གདལ་འགོག་ཐབས་སུ་དོ་དམ་སྟངས་འཛིན་ཚུལ་བཞིན་མ་བྱས་པར་སྐྱོན་བརྗོད་གནང་འདུག  

འཇིག་ཉེན་ཡོད་པའི་མི་རིགས་སྲུང་སྐྱོབ་ལྷན་ཚོགས་ཚབ་ཞུས་ཏེ་སུད་སི་དོན་ཁང་གི་ལས་བྱེད་སྐལ་ལྡན་མཚོ་མོ་ལགས་ཀྱིས་བོད་ནང་རྒྱ་ནག་གཞུང་གི་ཏོག་དབྱིབས་གཉན་རིམས་ཁྱབ་གདལ་འགོག་ཐབས་ཚུལ་བཞིན་བྱེད་མ་ཐུབ་པའི་སྐོར་དང་འབྲེལ་ཏེ། བོད་ནང་རྒྱ་གཞུང་གིས་ཏོག་དབྱིབས་གཉན་རིམས་རྩ་མེད་བཟོ་རྒྱུའི་སྲིད་བྱུས་ཞེས་པ་ལག་བསྟར་བྱས་ཏེ་བོད་མི་རྣམས་བཙན་ཤེད་ཀྱིས་འཕྲོད་བསྟེན་མཐུན་རྐྱེན་ཧ་ཅང་ཞན་པའི་ཟུར་འཇོག་ཁང་དུ་བཅུག་གི་ཡོད་སྐོར་འགྲེལ་བརྗོད་དང་། དེ་བཞིན་རྒྱལ་ཚོགས་ཀྱི་དམིགས་བསལ་སྙན་སེང་བའི་སྙན་ཐོ་ནང་གསལ་ལྟར་བོད་ནང་རྒྱ་གཞུང་གིས་ཡུ་གུར་ལྟར་བོད་མི་འབྲོག་པ་དང་། ཞིང་པ། གྲོང་གསེབ་མང་ཚོགས་སོགས་ལ་གླ་ཡོན་མེད་པར་ངལ་རྩོལ་བྱེད་དུ་འཇུག་གི་ཡོད་སྐོར་ཚོགས་བཅར་བ་རྣམས་ལ་སྙན་སེང་ཞུས་འདུག 

དེ་བཞིན་ཁོང་མོས་རྒྱ་ནག་གཞུང་ནས་བོད་མི་ཏོག་དབྱིབས་གཉན་རིམས་ནད་པ་རྣམས་ལ་དུས་ཐོག་སྨན་བཅོས་མཐུན་རྐྱེན་སྦྱོར་སྤྲོད་བྱ་རྒྱུར་ལྷན་ཚོགས་ངོས་ནས་རྒྱ་གཞུང་ལ་འབོད་སྐུལ་གནང་སྐྱོང་ཡོང་བའི་རེ་སྐུལ་ཞུས་པ་མ་ཟད། ལྷན་ཚོགས་ཀྱིས་ཕྱི་ལོ་ ༢༠༢༠ ཟླ་བ་ ༠༦ ནང་རྒྱལ་ཚོགས་ཀྱི་རང་དབང་ལྡན་པའི་ཁྱད་མཁས་པ་ལྔ་བཅུས་རྒྱ་ནག་སྐོར་དམིགས་བསལ་ཚོགས་ཐུན་བསྐོང་ཚོགས་གནང་ཡོད་པ་དེར་དོ་སྣང་གནང་དགོས་པའི་རེ་འདུན་ཡང་བཏོན་ཡོད་པ་བཅས།།