༢༠༡༠ ཟླ་ ༧ ཚེས་ ༢༢ རེས་གཟའ་ཕུར་བུ།
༄༅། །འདི་གར་ནང་སྲིད་ལས་ཁུངས་ནས་བཏང་གནས་ནང་འཁོད་དོན། ནང་སྲིད་ཟུང་དྲུང་ཚེ་རིང་སྟོབས་རྒྱལ་ལགས་ཕྱི་ལོ་ ༢༠༡༠ ཟླ་ ༧ ཚེས་ ༡༥ ཉིན་རྡ་ས་ནས་ཕེབས་ཐོན་གྱིས་དཔལ་ལྡན་བཀའ་ཁྲི་མཆོག་བྱང་ཕྱོགས་ཧི་མ་ཅལ་བོད་མིའི་གཞིས་ཆགས་ཁག་ཏུ་འཚམས་གཟིགས་ཕེབས་རྒྱུའི་ལས་འཆར་ཁག་དོན་ལྡན་ཡོང་སླད་སིམ་ལ་དང་། བོད་གཞིས་ཌོ་ལན་ཇི། སྤོན་ཌོ་ཁྱབ་ཁོངས། མ་ནཱ་ལི། འབིར་ཁུལ་སུ་ཇ་དང་། གྷོ་པལ་པུར་བཅས་སུ་སྔོན་འགྲོའི་གྲ་སྒྲིག་ཆེད་ཕེབས་ཏེ་ཕྱི་ཚེས་ ༢༡ ཉིན་རྡ་སར་ཕེབས་འབྱོར་གནང་ཡོད། དེ་ཡང་ནང་སྲིད་ལས་ཁུངས་ཀྱི་སོ་ནམ་ལམ་སྟོན་དང་མཉམ་འབྲེལ་རོགས་སྐྱོར་ཚན་པ་ནས་དོན་ཁང་དབང་རྒྱལ་ལགས་དང་། ཟླ་བ་ཚུལ་ཁྲིམས་རྣམ་གཉིས་ཕྱི་ཟླ་ ༧ ཚེས་ ༡༤ ཉིན་ཕེབས་ཐོན་གྱིས་ཏིེ་ཛུ་གཞིས་ཆགས་སུ་ནང་སྲིད་དང་ལྡི་ལི་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གིས་གོ་སྒྲིག་འོག་བྱང་ཤར་མཉམ་འབྲེལ་ཁག་གི་གཤམ་འོག་ལས་བྱེད་རྣམས་ལ་ཕྱི་ལོ་ ༢༠༡༠ ཟླ་ ༧ ཚེས་ ༡༩ ནས་ ༢༡ བར་ཉིན་གསུམ་རིང་གི་ཟབ་སྦྱོང་གྲ་སྒྲིག་དང་། དེ་རྗེས་མེའོ་མཉམ་འབྲེལ་གྱི་གནས་སྟངས་རྟོག་ཞིབ་ཆེད་མེའོར་ཕེབས་རྗེས་ཕྱི་ཚེས་ ༢༩ ཉིན་རྡ་སར་ཕེབས་འབྱོར་གནང་རྒྱུ་ཡིན་འདུག དེ་བཞིན་སོ་ནམ་ཚན་པ་ནས་འཆི་མེད་རིག་འཛིན་ལགས་ཕྱི་ཟླ་ ༧ ཚེས་ ༡༡ ནས་ལྷོ་ཕྱོགས་གཞིས་ཆགས་སྦེལ་ཀོབ་ལུགས་བསམ་དང་། བདེ་སླར། ཀོ་ལེ་གྷལ། ཧོན་སུར། མོན་གྷོ་བཅས་སུ་སྦེལ་ཇི་ཡམ་གཞུང་གི་སྐྱེ་ལྡན་སོ་ནམ་འདེབས་ལས་དང་། སོ་ནམ་འཛུགས་སྐྲུན་ཡར་རྒྱས་གཏོང་རྒྱུའི་ཆེད་རོགས་དངུལ་གནང་བའི་ལས་གཞིའི་མཇུག་བསྡོམས་ཀྱི་སྒྲུབ་དོན་ཞིབ་འཇུག་ཆེད་ཕེབས་ཏེ་ཕྱི་ཟླ་ ༨ ཚེས་ ༡ ཉིན་རྡ་སར་ཕེབས་འབྱོར་གནང་རྒྱུ་ཡིན་འདུག ཡང་སོ་ནམ་སྡེ་ཚན་གྱི་འབྲེལ་ལས་དང་ཁྱད་ལས་པའི་མཉམ་གོང་གསལ་སྦེལ་ཇི་ཡམ་གཞུང་གི་རོགས་སྐྱོར་ལས་གཞིའི་ཆེད་ཏི་ཛུ་དར་རྒྱས་གླིང་དང་། ཨོ་རི་ས་ཕུན་ཚོགས་གླིང་། མན་སྤར་ཕན་བདེ་གླིང་བཅས་སུ་ཕྱི་ལོ་ ༢༠༡༠ ཟླ་ ༧ ཚེས་ ༡༤ ནས་ཕྱི་ཟླ་ ༨ ཚེས་ ༢ བར་ཕྱོགས་བསྐྱོད་ཕེབས་ཡོད། ཕྱོགས་མཚུངས་ནང་སྲིད་ལས་ཁུངས་ཀྱི་ཟས་སྐྱོབ་ལས་གཞིའི་འབྲེལ་ཡོད་རོགས་ཚོགས་ནས་འདི་ལོར་སྡེ་ཁག ༡༩ ཟས་སྐྱོབ་ལས་འཆར་སྒོ་རྒྱག་དགོས་པའི་བཀོད་ཁྱབ་ཕེབས་དོན་བཞིན་ཟས་སྐྱོབ་ལས་གཞིའི་འབྲེལ་ཡོད་ལས་བྱེད་ཁག་གཅིག་ཕྱི་ལོ་ ༢༠༡༠ ཟླ་ ༧ ཚེས་ ༡༢ ནས་ཕྱི་ཚེས་ ༢༨ བར་ཧི་མ་ཅལ་ཁུལ་སྡེ་ཁག་གྲངས་ ༡༠ དང་། དེ་བཞིན་ཕྱི་ཟླ་ ༧ ཚེས་ ༢༡ ནས་ཚེས་ ༢༩ བར་སྡེ་ར་ལྡྡུན་དང་ཧི་མ་ཅལ་སིར་མུར་ཁུལ་སྡེ་ཁག་གྲངས་ ༩ བཅས་སུ་ཕྱོགས་བསྐྱོད་ཕེབས་ཡོད་པ་བཅས།།
