༢༠༡༡ ཟླ་ ༡༠ ཚེས་ ༡༤ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༡༨ ཉིན་ནས་ཚེས་ ༢༣ བར་བཀའ་ཁྲི་བློ་བཟང་སེང་གེ་མཆོག་ལྡི་ལིར་གནད་ཡོད་མི་སྣ་མཇལ་འཕྲད་དང་། རྡོར་གླིང་བོད་མིའི་སློབ་གྲྭ་དབུ་བརྙེས་ནས་མི་ལོ་ལྔ་བཅུ་འཁོར་བའི་དུས་དྲན་མཛད་སྒོ ཀ་སྦུག་ཏུ་ས་གནས་མི་མང་ལ་གསུང་བཤད་གནང་རྒྱུ་སོགས་ཀྱི་ཆེད་གཞུང་འབྲེལ་ཕྱོགས་བསྐྱོད་གནང་གཏན་འཁེལ་འདུག
དེ་ཡང་ཕྱི་ཚེས་ ༡༨ ཉིན་བཀའ་ཁྲི་མཆོག་རྡ་ས་ནས་པ་ཀོར་བརྒྱུད་ལྡི་ལིར་ཕེབས་རྗེས་ཕྱི་ཚེས་ ༡༩ ཉིན་ལྡི་ལིར་མི་སྣ་མཇལ་འཕྲད་གནང་རྒྱུ་དང་། ཚེས་ ༢༠ ཉིན་ལྡི་ལི་ནས་མཁའ་ལམ་བརྒྱུད་བྷག་ཌོག་རར་ཕེབས་ཐོན་གནང་རྒྱུ། ཕྱི་ཚེས་ ༢༡ ཉིན་རྡོར་གླིང་བོད་སློབ་དབུ་བརྙེས་ནས་མི་ལོ་ལྔ་བཅུ་འཁོར་བའི་མཛད་སྒོ་དང་ས་གནས་མང་ཚོགས་ལ་གསུང་བཤད་གནང་རྒྱུ། ཕྱི་ཚེས་ ༢༢ ཉིན་རྡོར་གླིང་ནས་ཀ་སྦུག་ཏུ་ཕེབས་འབྱོར་གྱིས་ས་གནས་མང་ཚོགས་ལ་གསུང་བཤད་གནང་རྗེས་བྷག་ཌོར་ནས་མཁའ་ལམ་བརྒྱུད་ལྡི་ལིར་ཕེབས་འབྱོར་གནང་རྒྱུ་དང།
ཕྱི་ཚེས་ ༢༣ ཉིན་ལྡི་ལི་ནས་འཇམ་མུར་མཁའ་ལམ་བརྒྱུད་ཕེབས་རྗེས་རྡ་སར་ཕེབས་འབྱོར་གནང་རྒྱུ་ཡིན་འདུག
ཐེངས་འདི་ནི་བཀའ་ཁྲི་མཆོག་གི་གཞུང་འབྲེལ་ཕྱོགས་བསྐྱོད་ཐེངས་དང་པོ་ཆགས་ཀྱི་ཡོད་པ་བཅས། །
