ཕྱི་ལོ་ ༢༠༠༨ ཟླ་ ༠༦ ཚེས་ ༢༤ རེས་གཟའ་མིག་དམར།

༄༅། །བོད་གཞུང་ཕྱི་དྲིལ་ལས་ཁུངས་ནས་ཐུན་རྐྱེན་རོགས་རམ་གནང་བའི་འོག་ Multi Track Diplomacy གཙུག་ལག་སློབ་གཉེར་ཁང་ནས་གྲོས་མོལ་གནང་ཕྱོགས་དང་རྩོད་རྙོག་འདུམ་སྒྲིག་ཐོག་ལ་ཉིན་ལྔའི་ཟབ་སྦྱོང་ཞིག་བཞུགས་སྒར་རྡ་སར་ཡོད་པའི་སུར་ཡཱ་མགྲོན་དུ་གོ་སྒྲིག་ཞུས་ཡོད་པ་རེད། ཟབ་སྦྱོང་དེ་ནི་ཁ་ཉིན་ཕྱི་ལོ་ ༢༠༠༨ ཟླ་ ༦ ཚེས་ ༢༣ ནས་ཚེས་ ༢༧ བར་ཚོགས་བཞིན་རེད་འདུག

ཟབ་སྦྱོང་ཚཽགས་བཞིན་པའི་རྣམ་པ་ཞིག

ཟབ་སྦྱོང་དེའི་ནང་བོད་གཞུང་གི་ལས་ཁུངས་འདྲ་མིན་ཁག་ནས་ཕེབས་པའི་སྲི་ཞུ་བ་དང་། དེ་མིན་གཞུང་འབྲེལ་མ་ཡིན་པའི་ཚོགས་པ་ཁག་ནས་ཕེབས་པའི་མི་སྣ་བཅས་ཁྱོན་བསྡོམས་མི་གྲངས་ ༢༣ འཛུལ་ཞུགས་གནང་ཡོད་པ་རེད།

Multi Track Diplomacy གཙུག་ལག་སློབ་གཉེར་ཁང་ནས་སྦྱོང་རྡར་སྤྲོད་པའི་ཟབ་སྱོང་ཐེངས་དང་པོ་དེ་ནི་ཕྱི་ལོ་ ༡༩༩༣ ལོར་ལྷ་སར་བོད་གཞུང་གི་སྲི་ཞུ་བ་ ༢༠ ལ་གནང་ཡོད་འདུག

ཟབ་སྦྱོང་ཉིན་དང་པོ་དེར་རྩོད་རྙོག་འདུམ་སྒྲིག་གི་བརྗོད་གཞིའི་ཐོག་བགྲོ་གླེང་གནང་ཡོད་པ་དང་། ཉིན་དང་པོའི་མཛད་སྒོའི་ཐོག་བོད་གཞུང་ཕྱི་དྲིལ་ལས་ཁུངས་ཀྱི་དྲུང་འཕར་ཌོག་ཊར་ངག་དབང་རབ་རྒྱས་ལགས་ནས་ Multi Track Diplomacy གཙུག་ལག་སློབ་གཉེར་ཁང་གི་འགན་འཛིན་སྐུ་ཞབས་མེཁ་ཇོན་ཌཔལུ་ཌོ་ནལཌེ་(Mc John W Donald)དང་། མཁས་དབང་སྐུ་ཞབས་ཨི་ལན་བོ་རིསེ་(Eileen Borris) བཅས་ཐེངས་འདིའི་ཟབ་སྦྱོང་་གི་སློབ་སྟོན་པ་ཁོང་གཉིས་ལ་ཕེབས་བསུའི་གསུང་བཤད་དང་།  Multi Track Diplomacy གཙུག་ལག་སློབ་གཉེར་ཁང་ནས་དེ་ལྟ་བུའི་ཟབ་སྦྱོང་གོ་སྒྲིག་ཞུས་པར་ཐུགས་རྗེ་ཆེའི་གསུང་བཤད་གནང་ཡོད་པ་བཅས།།