༄༅། །འདི་གར་ཨོ་ཌི་ཤ་ཕུན་ཚོགས་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཨོ་ཌི་ཤ་ཕུན་ཚོགས་གླིང་བོད་མིའི་གཞིས་ཆགས་སུ་ས་གནས་འགོ་འཛིན་ལས་ཁུངས་དང་༸སྐུའི་འཁྲུངས་སྐར་གོ་སྒྲིག་ཚོགས་ཆུང་ཐུན་མོང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༧ ལ་ཕེབས་པའི་སྐུའི་འཁྲུངས་སྐར་དུས་ཆེན་གྱི་མཛད་སྒོ་ཉིན་གྲངས་གསུམ་རིང་སྲུང་བརྩི་གཟབ་རྒྱས་ཞུས་ཡོད། 

དེ་ཡང་ཕྱི་ཚེས་ ༦ ཉིན་གཞིས་མཉམ་གཉིས་ཀྱི་མདུན་ཐང་དུ་གཞུང་འབྲེལ་མཛད་སྒོ་དབུ་འཛུགས་ཀྱིས་ཐོག་མར་སྐུ་མགྲོན་གཙོ་བོ་༸སྐྱབས་རྗེ་དགེ་སྤྲུལ་འཇིགས་མེད་རིན་པོ་ཆེ་མཆོག་གིས་མར་མེ་ཞལ་ཕྱེ་གནང་རྗེས་ས་འགོ་ལས་ཚབ་ཐུབ་བསྟན་ལགས་ཀྱིས་དཔལ་ལྡན་བཀའ་ཤག་གི་གསུང་འཕྲིན་སྒྲོགས་སྦྱང་གནང་བ་དང་སྦྲགས་བཙན་བྱོལ་བོད་མིའི་མི་འབོར་གྲངས་བཤེར་ལས་རིམ་གསལ་བསྒྲགས་གནང་། དེ་ནས་ས་གནས་འཐུས་ཚོགས་ཀྱི་ཚོགས་གཙོ་བཀྲ་ཤིས་བསྟན་འཛིན་ལགས་ཀྱིས་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན་སྒྲོགས་སྦྱང་གནང་། སྐུ་མགྲོན་གཙོ་བོ་མཆོག་གིས་༸གོང་ས་མཆོག་གི་ཐུགས་བསྐྱེད་དམ་བཅའ་བཞི་དང་འབྲེལ་བའི་གསུང་བཤད་གནང་བ་མ་ཟད་བོད་མི་ནང་ཁུལ་འཆམ་མཐུན་དགོས་པའི་་ལམ་སྟོན་ཡང་གནང་སོང་།

དེ་ཉིན་སྐུ་མགྲོན་གཞན་དམག་དཔོན་སྐུ་ཞབས་ཨ་ནནྟ་ཏཱན་ཌི་ (CO Anand Tandi, Commandant of Army Aid College, Gopalpur) ལགས་ཀྱང་དུས་ཆེན་ལ་མཉམ་ཞུགས་གནང་ཡོད། དེ་ནས་རིམ་བཞིན་སམ་བྷོ་ཊ་སློབ་གྲྭ་དང་མི་མང་རྣམས་ནས་རིག་གཞུང་གཞས་སྣ་འཁྲབ་སྟོན་གཟིགས་འབུལ་ཞུས་རྗེས་སློབ་ཕྲུག་རྣམས་ལ་ཡིག་རྒྱུགས་ལེགས་སོན་ཐོག་བྱ་དགའ་གསོལ་རས་གནང་། ས་གནས་བུད་མེད་ལྷན་ཚོགས་ནས་རྩེད་མོ་ཁག་གཅིག་གོ་སྒྲིག་ཞུས་པ་དང་ཆབས་ཅིག་དབུས་ས་གཉིས་ཀྱི་བུད་མེད་ལྷན་ཚོགས་ཐུན་མོང་ནས་མི་འབོར་འཕེལ་རྒྱས་ཀྱི་བྱ་དགའ་གསོལ་རས་ཀྱང་གནང་།

དེ་རྗེས་ས་གནས་མཉམ་སྦྲེལ་ནས་ཞིང་པ་ཡོངས་ལ་དགའ་བསུའི་བྱ་དགའ་དང་མཇལ་དར་དར་སྒྲོན་གནང་རྗེས་གཞུང་འབྲེལ་མཛད་སྒོ་གྲོལ་བ་དང་ཕྱི་ཚེས་ ༧ དང་ ༨ ཉིན་མི་མང་རྣམས་ནས་དེང་དུས་ཀྱི་གཞས་སྣ་འཁྲབ་སྟོན་དང་། རྩེད་མོ་ཁག་གཅིག་རྩེ་པ། སྒོར་གཞས་འཁྲབ་རྗེས་ཉིན་གསུམ་གྱི་༸སྐུའི་འཁྲུངས་སྐར་གྱི་མཛད་སྒོ་རྒྱལ་ཁའི་ངང་གྲོལ་ཡོད་པ་བཅས། །