༢༠༡༡ ཟླ་ ༡༠ ཚེས་ ༥ རེས་གཟའ་ལྷག་པ།
༄༅། །འདི་གར་ཐེ་ཝན་སྐུ་ཚབ་དོན་ཁང་ནས་ཕྱི་ལོ་ ༢༠༡༡ ཟླ་ ༡༠ ཚེས་ ༥  ཉིན་བཏང་གནས་ནང་འཁོད་དོན། ཐེ་ཝན་ཤིན་ཀྲུའུ་གྲོང་ཁྱེར་ལས་རིགས་འདྲ་མིན་གྱི་གཞུང་ཞབས་ཚོར་ཟབ་སྦྱོང་སྐབས་ཐའེ་ཝན་བོད་ཀྱི་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་བོད་དོན་ངོ་སྤྲོད་ཀྱི་གསུང་བཤད་གནང་ཡོད།
དེ་ཡང་ཕྱི་ཟླ་ ༡༠ ཚེས་ ༤ ཉིན་གྱི་དགོང་དྲོ་ཆུ་ཚོད་ ༦། ༣༠ ནས་ ༨། ༣༠ བར་སྐུ་ཚབ་དོན་གཅོད་ཀྱིས་གཙོ་བོ་བོད་ཀྱི་ལོ་རྒྱུས་དང་། ཆབ་སྲིད་འགྱུར་འགྲོས། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་ཡང་སྲིད་སྐོར་ངོ་སྤྲོད་ཀྱི་གསུང་བཤད་གནང་ཡོད། ཐེངས་འདིའི་ཤིན་ཀྲུའུ་གྲོང་ཁྱེར་གཞུང་ཞབས་ཟབ་སྦྱོང་ཁོངས་སུ་གཞུང་ཞབས་ལས་བྱེད་དང་། རྒྱལ་སྲུང་དམག་དོན་དཔོན་རིགས། དགེ་རྒན། ཉེན་རྟོག་སྡེ་ཚན་གྱི་དཔོན་རིགས། ཁེ་ལས་ཚོང་འབྲེལ་གྱི་འགན་འཛིན། གསར་འགོད་པ་སོགས་ཁྱོན་མི་གྲངས་ ༢༠ བརྒལ་བ་མཉམ་ཞུགས་གནང་ཡོད་པ་མ་ཟད། ཚོགས་ཞུགས་གནང་མཁན་གྱི་དྲི་བ་ཁག་ལ་དོན་གཅོད་ཀྱིས་ལན་འདེབས་ཀྱང་གནང་ཡོད་པ་བཅས།།