༄༅། །བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ་ཐུབ་བསྟན་བསམ་འཕེལ་ལགས་ཕྱི་ལོ་ ༢༠༢༢ ཟླ་བ་ ༠༦ ཚེས་ ༠༤ ཉིན་གློ་བུར་དུ་འདས་གྲོངས་སུ་གྱུར་པའི་ཡིད་སྐྱོའི་གནས་ཚུལ་བྱུང་འདུག་པར་དཔལ་ལྡན་བཀའ་ཤག་ནས་ཐུགས་ཕམ་དང་སྦྲགས་དམ་པ་ཁོང་གི་ཚེ་རབས་ཕྲེང་བར་བསགས་པའི་སྡིག་སྒྲིབ་བྱང་ཞིང་དག་ནས་མངོན་མཐོ་ངེས་ལེགས་ཀྱི་གོ་འཕང་མགྱོགས་ནས་མྱུར་དུ་འཐོབ་པའི་སྨོན་ལམ་གསོལ་འདེབས་ཞུ་ཕྱིར། དེ་རིང་ཕྱི་ལོ་ ༢༠༢༢ ཟླ་ ༦ ཚེས་ ༤ ཉིན་གྱི་ཉིན་རྒྱབ་ཆུ་ཚོད་ ༣ ཐོག་གངས་སྐྱིད་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་མང་གཙོ་ཀ་བ་གསུམ་གྱི་མཛད་གཙོ་རྣམ་པས་དབུས་ལྷན་ཁང་ཁག་གི་དྲུང་ཆེ་ཆུང་རྣམ་པ། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཐོག་བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས་ཀྱིས་དམ་པ་ཁོང་གི་ལོ་རྒྱུས་སྒྲོགས་སྦྱང་གནང་རྗེས་སྲིད་ཚབ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་གསུང་བཤད་གནང་དོན། གོང་དུ་བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས་ཀྱིས་དྲིལ་བསྒྲགས་དྲུང་ཆེ་ཟུར་པ་ཐུབ་བསྟན་བསམ་འཕེལ་ལགས་ཀྱི་ལོ་རྒྱུས་སྒྲོགས་སྦྱང་གནང་བཞིན་པའི་སྐབས་ཉན་དུས་དྲིལ་བསྒྲགས་དྲུང་ཆེ་ཟུར་པ་ཐུབ་བསྟན་བསམ་འཕེལ་ལགས་ཀྱིས་སློབ་གྲྭ་དང་། གཙུག་ལག་སློབ་གཉེར་ཁང་གྲགས་ཅན་ཁག་ནས་སློབ་སྦྱོང་གནང་སྟེ་བོད་མིའི་སྒྲིག་འཛུགས་ཀྱི་ལས་ཁུངས་ཁག་ཏུ་ཕྱག་ལས་ཧ་ལས་པ་གནང་ཡོད་སྟབས། ཚང་མས་བསྔགས་བརྗོད་གནང་གི་ཡོད་པ་ཤེས་རྟོགས་བྱུང་། དེ་ནི་དམ་པ་ཁོང་གི་མི་ཚེ་ནང་གི་གྲུབ་འབྲས་ཧ་ཅང་ཆེན་པོ་ཞིག་རེད། ང་ཚོ་སྐྱེས་པའི་མཐའ་མ་འཆི་དགོས་པ་རེད། གསོན་པའི་རིང་བོད་པའི་སྤྱི་ཚོགས་ལ་ཕན་པའི་ལས་ཀ་བྱས་ཏེ་མི་ཚེ་དོན་དང་ལྡན་པ་བསྐྱལ་བ་ཡིན་ན་མཐའ་མར་འཆི་སྐབས་འགྱོད་སེམས་སྐྱེ་ཡི་མ་རེད།དྲིལ་བསྒྲགས་དྲུང་ཆེ་ཟུར་པ་ཐུབ་བསྟན་བསམ་འཕེལ་ལགས་ཀྱིས་གཟི་བརྗིད་ལྡན་པའི་ཕྱག་ལས་གནང་བ་ནང་བཞིན་ང་ཚོས་ཀྱང་དེ་ལྟར་ལས་ཀ་བྱེད་ཐུབ་པའི་མིག་དཔེ་ལྟ་རྒྱུ་ཧ་ཅང་གནད་འགག་ཆེན་པོ་རེད། རྣམ་པ་ཚོ་ཚང་མས་སྙིང་ཐག་པ་ནས་དམ་པ་དེ་ཉིད་ཀྱི་ཆེད་དུ་སྨོན་ལམ་གསུང་འདོན་གནང་རོགས་ཞེས་གསུང་བཤད་གནང་རྗེས་བསྔོ་སྨོན་གསུང་འདོན་དང་། དམ་པ་ཁོང་ལ་མྱ་ངན་གུས་འདུད་དང་གདུང་སེམས་མཉམ་སྐྱེ་མཚོན་སླད་ཉིན་རྒྱབ་ཆུ་ཚོད་ ༤ ནས་དབུས་ཀྱི་ལས་ཁུངས་ཁག་ལས་མཚམས་བཞག་ཡོད།

དམ་པ་ཁོང་ནི། ཕྱི་ལོ་ ༡༩༥༦ ཟླ་ ༡༡ ཚེས་ ༠༢ ཉིན་བོད་ཀྱི་རྒྱལ་ས་ལྷ་སར་ཕ་ཟླ་བ་ལགས་དང་མ་ཚེ་རིང་སྒྲོལ་མ་གཉིས་ཀྱི་སྲས་སུ་སྐྱེས་ཤིང་། དགུང་ལོ་དྲུག་ལ་ཕེབས་སྐབས་རྒྱ་གར་ལ་བཙན་བྱོལ་དུ་ཕེབས་རྗེས་བོད་ཕྲུག་ཁྱི་སྡེ་ནས་སློབ་སྦྱོང་གནང་ཡོད་པ་དང་། དེ་ནས་ཀ་སྦུག་ཏུ་རྟེན་གཞི་བྱས་པའི་གྷི་ར་ཧམ་ཨིན་ཇི་སློབ་གྲྭ་ (Dr. Graham) ནས་སློབ་མཐར་སོན་རྗེས་ལྡི་ལི་གཙུག་ལག་སློབ་གཉེར་ཁང་གི་ཁྱབ་ཁོངས་སན་ཊི་སི་ཊེ་ཧྥན་མཐོ་སློབ་ཁང་ (St. Stephen’s College) དུ་ལོ་རྒྱུས་རིག་པའི་ཐོག་ཉེ་བའི་གཙུག་ལག་རབ་འབྱམས་པ་དང་། ལྡི་ལི་གཙུག་ལག་སློབ་གཉེར་ཁང་དུ་ལོ་རྒྱུས་རིག་པའི་ཐོག་གཙུག་ལག་རབ་འབྱམས་པའི་སློབ་སྦྱོང་གནང་ཡོད། དེ་རྗེས་ཨ་རིའི་བོད་མིའི་སློབ་ཡོན་ལས་གཞི་འོག་ཨ་རིའི་ནིའུ་ཡོག་གྲོང་ཁྱེར་དུ་ཡོད་པའི་ཀོ་ལུམ་བྷི་ཡ་གཙུག་ལག་སློབ་གཉེར་ཁང་ནས་གསར་འགོད་ལས་རིགས་ཐོག་སློབ་སྦྱོང་ལེགས་པར་ཐོན་ཡོད། ཕྱི་ལོ་ ༡༩༨༠ ཟླ་ ༡༠ ཚེས་ ༠༡ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་སུ་གནས་བརྒྱད་པ་ཚོད་ལྟའི་ཐོག་དྲིལ་བསྒྲགས་ཨིན་ཡིག་རྩོམ་སྒྲིག་པ་རྒན་དྲུང་དུ་བསྐོ་གཞག་དང་། ཕྱི་ལོ་ ༡༩༨༡ ཟླ་ ༧ ཚེས་ ༢༠ ཉིན་ཕྱི་དྲིལ་ལས་ཁུངས་སུ་གནས་བརྒྱད་པ་རང་འཇགས་ཐོག་དྲིལ་བསྒྲགས་རྒན་དྲུང་ངོ་མར་བསྐོ་གཞག ཕྱི་ལོ་ ༡༩༨༢ ཟླ་ ༡༢ ཚེས་ ༢༤ ཉིན་ཕྱི་དྲིལ་ལས་ཁུངས་སུ་དམིགས་བསལ་དགོངས་བཞེས་ཀྱིས་གནས་བདུན་པར་གནས་སྤར་གྱི་དྲིལ་བསྒྲགས་ཁང་གི་དྲུང་གཞོན་དུ་བསྐོ་གཞག  ཕྱི་ལོ་ ༡༩༨༢ ཟླ་ ༡༢ ཚེས་ ༢༤ ཉིན་ཕྱི་དྲིལ་ལས་ཁུངས་སུ་དྲུང་གཞོན་གནས་རིམ་ཐོག་དམིགས་གསལ་གནས་སྤར། ཕྱི་ལོ་ ༡༩༨༦ ཟླ་ ༤ ཚེས་ ༠༡ ཉིན་སྐུ་སྒེར་ཡིག་ཚང་གི་ཨིན་དྲུང་གནས་རིམ་ཐོག་དྲུང་གཞོན་དུ་གནས་སྤོས། ཕྱི་ལོ་ ༡༩༨༧ ཟླ་ ༣ ཚེས་ ༡༦ ཉིན་དྲིལ་བསྒྲགས་ལས་ཁུངས་ཀྱི་དྲུང་གཞོན་དུ་གནས་སྤོས། ཕྱི་ལོ་ ༡༩༩༡ ཟླ་ ༤ ཚེས་ ༠༡ ཉིན་ཨ་རི་སྐུ་ཚབ་དོན་གཅོད་ལས་ཁུངས་ཀྱི་དྲུང་གཞོན་དུ་གནས་སྤོས།ཕྱི་ལོ་ ༡༩༩༢ ཟླ་ ༨ ཚེས་ ༡ ཉིན་བལ་ཡུལ་ (Tibetan Refugee Welfare Office, Kathmandu) དུ་ཟུང་དྲུང་གནས་རིམ་དུ་བསྐོ་གཞག ཕྱི་ལོ་ ༡༩༩༥ ཟླ་ ༨ ཚེས་ ༡༠ ཉིན་ཕྱི་དྲིལ་ཟུང་དྲུང་དུ་གནས་སྤོས། ཕྱི་ལོ་ ༡༩༩༦ ཟླ་ ༥ ཚེས་ ༠༡ ཉིན་ཕྱི་དྲིལ་ལས་ཁུངས་ཀྱི་དྲུང་འཕར་གནས་རིམ་དུ་གནས་སྤར། ཕྱི་ལོ་ ༡༩༩༦ ཟླ་ ༧ ཚེས་ ༢༥ ཉིན་ཕྱི་དྲིལ་ལས་ཁུངས་ཀྱི་དྲུང་འཕར་དུ་ལས་འགན་བཀོད་སྒྲིག ཕྱི་ལོ་ ༡༩༩༩ ཟླ་ ༠༡ ཚེས་ ༢༠ ཉིན་ཕྱི་དྲིལ་དྲུང་ཆེར་ལས་འགན་རང་འཇགས། ཕྱི་ལོ་ ༡༩༩༩ ཟླ་ ༠༡ ཚེས་ ༢༠ ཉིན་ཕྱི་དྲིལ་ལས་ཁུངས་ཀྱི་དྲུང་ཡིག་ཆེན་མོའི་གནས་རིམ་དུ་གནས་སྤར། ཕྱི་ལོ་ ༢༠༡༢ ཟླ་ ༣ ཚེས་ ༠༢ ཉིན་བོད་ཀྱི་སྲིད་བྱུས་ཉམས་ཞིབ་ཁང་གི་དྲུང་ཆེར་གནས་སྤོས། ཕྱི་ལོ་ ༢༠༡༦ ཟླ་ ༡༡ ཚེས་ ༠༢ ནས་ཕྱི་ལོ་ ༢༠༡༧ ཟླ་ ༡༡ ཚེས་ ༠༡ བར་ལོ་གཅིག་རིང་བགྲེས་ཡོལ་ཕར་འགྱངས། ཕྱི་ལོ་ ༢༠༡༧ ཟླ་ ༡༡ ཚེས་ ༠༢ ནས་ཕྱི་ལོ་ ༢༠༡༨ ཟླ་ ༡༡ ཚེས་ ༠༡ བར་སླར་ཡང་ལོ་གཅིག་རིང་བགྲེས་ཡོལ་ཕར་འགྱངས། ཕྱི་ལོ་ ༢༠༡༨ ཟླ་ ༡༡ ཚེས་ ༠༢ ཉིན་བགྲེས་ཡོལ་དུ་ཕེབས་པ་བཅས་དམ་པ་དེ་ཉིད་ཀྱིས་ད་བར་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་གཉིས་སུ་ལོ་ངོ་ ༣༨ ལྷག་རིང་སྲི་ཞུ་ལེགས་པར་བསྒྲུབས་གནང་ཡོད་པ་བཅས།།