༄༅། །ཕྱི་ལོ་ ༢༠༢༢ ཟླ་ ༥ ཚེས་ ༡༣ ཉིན་གྱི་ཕྱི་དྲོ་ཆུ་ཚོད་ ༣།༣༠ ཐོག་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་སྲིད་སྐྱོང་ཚོགས་ཁང་དུ་ཨ་རིའི་བོད་དོན་རྒྱབ་སྐྱོར་བ་སྐུ་ཞབས་རི་ཅར་ཌི་བྷི་ལུམ་ (Richard Blum) ལགས་དམ་པ་དེ་ཉིད་ཀྱི་བུ་མོ་ཧེ་ཌི་བྷི་ལུམ་ (Heidi Blum) ལགས་བཞུགས་སྒར་རྡ་སར་ཕེབས་འབྱོར་སྐབས་དང་བསྟུན། བོད་མིའི་སྒྲིག་འཛུགས་ཀྱི་འཛིན་སྐྱོང་ངོས་ནས་སྐུ་ཞབས་རི་ཅར་ཌི་བྷི་ལུམ་ལགས་དམ་པ་དེ་ཉིད་རྗེས་དྲན་གྱི་མཛད་སྒོ་ཞིག་གོ་སྒྲིག་གནང་ཡོད་པ་དང་། མཛད་སྒོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དབུས་བཀའ་བློན་རྣམ་པ་དང་། སྐུ་ཞབས་རི་ཅར་ཌི་བྷི་ལུམ་ལགས་དམ་པ་དེ་ཉིད་ཀྱི་བུ་མོ་ཧེ་ཌི་བྷི་ལུམ་ (Heidi Blum) ལགས་དང་། ཁོང་གི་བུ། རྒྱལ་སྤྱིའི་བོད་དོན་ལས་འགུལ་ཁང་གི་དམ་ཆོས་རྒྱ་མཚོ་ལགས། དེ་བཞིན་རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། ལས་ཁུངས་ཁག་གི་དྲུང་ཆེ་རྣམ་པ། སྲི་ཞུའི་ལས་བྱེད་རྣམ་པ་བཅས་ཕེབས་ཡོད།
དེ་ཡང་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་བོད་དོན་རྒྱབ་སྐྱོར་བ་སྐུ་ཞབས་རི་ཅར་ཌི་བྷི་ལུམ་ལགས་དམ་པ་དེ་ཉིད་རྗེས་དྲན་ཞུས་པ་དང་འབྲེལ་དེ་སྔ་སྐུ་ཞབས་རི་ཅར་ཌི་བྷི་ལུམ་ལགས་དང་དངོས་སུ་མཇལ་འཕྲད་ཞུས་པ་དང་། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་སྐུ་ཞབས་རི་ཅར་ཌི་བྷི་ལུམ་ལགས་དམ་པ་དེ་ཉིད་ཕན་ཚུལ་མཇལ་འཕྲད་བྱུང་བའི་སྐོར། ཕྱི་ལོ་ ༡༩༧༠ ནང་སྐུ་ཞབས་རི་ཅར་ཌི་བྷི་ལུམ་ལགས་དམ་པ་དེ་ཉིད་ཀྱིས་བཙན་བྱོལ་བོད་མིའི་ཕྲུ་གུ་རྣམས་ལ་རོགས་རམ་གནང་བ་ནས་བཟུང་སྐུ་ཚེའི་འཕེན་པ་མ་རྫོགས་བར་བོད་དོན་ལ་ཁ་ཞེ་གཉིས་མེད་ཀྱི་སྒོ་ནས་རྒྱབ་སྐྱོར་གནང་ཡོད་སྟབས། བོད་མི་རྣམས་ལ་མཚོན་ན་དམ་པ་དེ་ཉིད་ཧ་ཅང་བཀའ་དྲིན་ཆེན་པོ་ཡིན། ཞེས་གསུངས།
གཞན་ཡང་དཔལ་ལྡན་སྲིད་སྐྱོང་མཆོག་གིས་ཕྱི་ལོ་ ༡༨༨༩ དང་ ༡༨༩༡ བཅས་ལ་ཨ་རི་བ་སྐུ་ཞབས་ཝི་ལིམ་ཝོ་ཌི་ཝི་ལེ་ (William Woodville Rockhill) ལགས་བོད་ལ་ཐོག་མར་ཕེབས་པ་ནས་བཟུང་ཨ་རི་དང་བོད་དབར་འབྲེལ་བ་བྱུང་བའི་ལོ་རྒྱུས་སྐོར་དང་། ཕྱི་ལོ་ ༡༩༧༩ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིར་ཐོག་མར་ཆིབས་སྒྱུར་བསྐྱངས་པ་ནས་བཟུང་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི་ (Nancy Pelosi) མཆོག་དང་སྐུ་ཞབས་རི་ཅར་ཌི་བྷི་ལུམ་ལགས་དམ་པ་དེ་ཉིད་ཀྱི་སྐུ་ཟླ་ཨ་རིའི་གྲོས་ཚོགས་གོང་མའི་འཐུས་མི་ལྕམ་སྐུ་ཌི་ཡེན་ཕ་ཡིན་སི་ཊེན་ (Diane Feinstein) མཆོག་གིས་གཙོས་ཨ་རིའི་གྲོས་ཚོགས་གོང་འོག་གཉིས་ཀྱི་འཐུས་མི་རྣམ་པས་བོད་དོན་དོན་སླད་རྒྱབ་སྐྱོར་གནང་དང་གནང་བཞིན་པ་སོགས་སྐོར་གསུངས་ཡོད།སྐུ་ཞབས་རི་ཅར་ཌི་བྷི་ལུམ་ལགས་དམ་པ་དེ་ཉིད་ཀྱི་བུ་མོ་ཧེ་ཌི་བྷི་ལུམ་ (Heidi Blum) ལགས་ཀྱིས་ཁོང་གི་ཡབ་དམ་པའི་མཛད་རྗེས་མུ་མཐུད་རྒྱུན་སྐྱོང་གནང་སྟེ་བོད་མིའི་ཆོས་དང་རིག་གཞུང་། སྐད་ཡིག་བཅས་ཀྱི་ཆེད་དུ་རྒྱབ་སྐྱོར་གནང་རྒྱུའི་ཆོད་སེམས་བརྟན་པོ་ཡོད་པ་དང་། ལྕམ་སྐུ་ཌི་ཡེན་ཕ་ཡིན་སི་ཊེན་མཆོག་གིས་རོགས་སྐྱོར་འོག་ཁོང་གི་ཡབ་དམ་པས་བོད་དོན་སླད་ཕྱག་ལས་གནང་རྒྱུར་དམིགས་ཏེ་ཨ་རིའི་ཧི་མ་ལ་ཡའི་ཐེབས་རྩ་ (American Himalayan Foundation) ཞེས་པ་བཙུགས་ཡོད་པ་སོགས་ཀྱི་སྐོར་གསུང་བཤད་གནང་ཡོད་པ་བཅས།།