༄༅། །ཕྱི་ལོ་ ༢༠༢༢ ཟླ་བ་ ༠༤ ཚེས་ ༢༤ རེས་གཟའ་ཉི་མ་ཉིན་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་འཁྲུངས་སྐར་ཉིན་རྒྱ་གར་བོད་དོན་རྒྱབ་སྐྱོར་ཚོགས་པས་ (Bharat Tibbat Sahyog Manch) རྒྱལ་སྤྱིའི་རང་བཞིན་ལྡན་པའི་དྲ་ཐོག་ཚོགས་འདུ་ཞིག་གོ་སྒྲིག་གནང་ཡོད་པ་དང་། རྒྱ་གར་བོད་དོན་རྒྱབ་སྐྱོར་ཚོགས་པ་ (Bharat Tibbat Sahyog Manch) ཡིས་འདས་པའི་ལོ་ངོ་ ༢༣ རིང་རྒྱ་གར་རྒྱལ་ཡོངས་དང་བླངས་ཞབས་ཞུ་བའི་ (RSS) རྒྱལ་ཡོངས་ལས་འགུལ་བ་དང་རྒྱུན་ལས་སྐུ་ཞབས་ཨིན་དྲེཤ་ཀུ་མཱར་ལགས་ཀྱི་ལམ་སྟོན་དང་། རྒྱ་གར་བོད་དོན་རྒྱབ་སྐྱོར་ཚོགས་པའི་ (Bharat Tibbat Sahyog Manch) རྒྱལ་ཡོངས་སྤྱི་ཁྱབ་དྲུང་ཆེ་སྐུ་ཞབས་པཾཀཇ་གོ་ཡལ་ལགས་ཀྱི་འགོ་ཁྲིད་འོག་བོད་དང་གངས་རིན་པོ་རྒྱ་ནག་གི་བཙན་བཟུང་འོག་ནས་ཐར་ཐབས་སུ་ལས་འགུལ་རྒྱ་ཆེ་སྤེལ་བཞིན་ཡོད་པ་རེད། དྲ་ཐོག་ཚོགས་འདུ་དེ་བཞིན་རྒྱ་གར་བོད་དོན་རྒྱབ་སྐྱོར་ཚོགས་པ་ (Bharat Tibbat Sahyog Manch) ཡི་ཚོགས་གཞོན་སྐུ་ཞབས་སྭཱ་མཱི་དིབྱཱ་ནནྡ་མཧཱ་རཱཇ་ལགས་དབུ་བཞུགས་ཐོག་དབུ་འཛུགས་ཀྱིས་ཐོག་མར་སྐུ་ཞབས་པཾཀཇ་གོ་ཡལ་ལགས་ཀྱིས་པཎ་ཆེན་སྐུ་ཕྲེང་བཅུ་པ་མཆོག་མྱ་ངན་ལས་འདས་རྗེས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཡང་སྲིད་ངོས་འཛིན་མཛད་པའི་བརྒྱུད་རིམ་དང་། རྒྱ་ནག་གཞུང་གིས་ཡང་སྲིད་རིན་པོ་ཆེ་གར་སོང་ཆ་མེད་བཏང་བའི་ལོ་རྒྱུས་དྲན་གསོ་གནང་བཞིན་པཎ་ཆེན་སྐུ་ཕྲེང་བཅུ་གཅིག་པའི་འཁྲུངས་སྐར་ལ་འཚམས་འདྲི་ཞུས།

དེ་ནས་ལོ་རྒྱུས་སྨྲ་བ་དང་བོད་རིག་པ་བ་འབུམ་རམས་པ་ཨ་རུཎ་ཀུ་མཱར་ཤྲཱིབཱསྟབ་ལགས་ཀྱིས་རྒྱ་གཞུང་གིས་གཡོ་སྒྱུས་ངོས་འཛིན་བྱས་པའི་པཎ་ཆེན་རིན་པོ་ཆེ་ནི་དམར་ཤོག་ལྟ་བ་ཡོད་མཁན་ཞིག་ཡིན་པ་དང་། མ་འོངས་པར་རྒྱ་ནག་གཞུང་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་གནང་ཕྱོགས་ལའང་ཐེ་བྱུས་བྱ་ངེས་པར་ཐེ་ཚོམ་མེད་ཅེས་འགྲེལ་བརྗོད་གནང་། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་ཀྱིས་ཕྱི་ཟླ་ ༠༤ ཚེས་ ༢༥ ནི་དགའ་སྐྱོ་གཉིས་ལྡན་གྱི་ཉིན་མོ་ཞིག་ཡིན། ཡིད་སྐྱོ་དགོས་དོན་ནི་ང་ཚོའི་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་ད་ལྟའང་རྒྱ་ནག་གི་བཙན་བཟུང་བཀག་ཉར་འོག་བཞུགས་ཡོད། སེམས་དགའ་དགོས་པའི་རྒྱུ་མཚན་ནི་རྒྱ་གར་གྱིས་བོད་ཀྱི་རང་དབང་འཐབ་རྩོད་དང་པཎ་ཆེན་རིན་པོ་ཆེ་མཆོག་གློད་བཀྲོལ་ཆེད་འབོད་སྒྲ་ཤུགས་ཆེ་སྒྲོག་བཞིན་ཡོད་ཅེས་སོགས་གསུངས།

དེ་རྗེས་ཚོགས་འདུའི་ཚོགས་གཙོ་སྐུ་ཞབས་སྭཱ་མཱི་དིབྱཱ་ནནྡ་མཧཱ་རཱཇ་ལགས་ཀྱིས་བོད་དང་གངས་རིན་པོ་ཆེ་རྒྱ་ནག་གི་བཙན་བཟུང་འོག་ནས་ཐར་ཐབས་སུ་ང་ཚོ་ཙམ་མ་ཡིན་པར་རྒྱལ་སྤྱི་ཡོངས་ནས་མགྲིན་གཅིག་ཏུ་རྒྱ་ནག་གི་རྒྱ་བསྐྱེད་སྲིད་བྱུས་ལ་མཐའ་གཅིག་ཏུ་ངོ་རྒོལ་བྱེད་ཀྱི་ཡོད་ཅེས་གསུངས་རྗེས་མཐར་རྒྱ་གར་བོད་དོན་རྒྱབ་སྐྱོར་ཚོགས་པ་ (Bharat Tibbat Sahyog Manch) ཡི་རྒྱལ་ཡོངས་དྲུང་ཆེ་སྐུ་ཞབས་བི་ཇཡ་ཤརྨ་ལགས་ཀྱིས་མཉམ་ཞུགས་པ་ཡོངས་ལ་ཐུགས་རྗེ་ལེགས་འབུལ་ཞུ་བཞིན་ང་ཚོས་རྒྱ་ནག་གི་ཐོན་རྫས་བེད་སྤྱོད་བྱེད་མཚམས་བཞག་ན་མ་གཏོགས་ང་ཚོའི་དམིགས་ཡུལ་གྲུབ་མི་ཐུབ། རྒྱ་ནག་གིས་འཛམ་གླིང་སྤྱི་ཡོངས་ལ་དཀའ་ངལ་ཆེན་པོ་བཟོས་ཡོད་ཅེས་གསུངས་ཏེ་ཚོགས་འདུ་གྲོལ། 

ཐེངས་འདིའི་དྲ་ཐོག་ཚོགས་འདུའི་དམིགས་ཡུལ་གཙོ་བོ་ནི་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་འཕྲལ་དུ་གློད་བཀྲོལ་ཡོང་སླད་རྒྱལ་སྤྱིའི་མི་མང་གི་རྒྱབ་སྐྱོར་སྲ་བརྟན་གཏོང་ཆེད་ཡིན་པ་རེད་འདུག་པ་བཅས།།