༄༅། །པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༣ ལ་ཕེབས་པའི་ཉིན་མོ་འདིར་རྒྱ་ནག་གཞུང་གིས་ཁོང་ལོ་རྒྱུས་ནས་ནག་བསུབ་གཏོང་ཐབས་བྱས་ཀྱང་། ང་ཚོས་རྒྱ་ནག་གཞུང་ལ་རྒྱལ་སྤྱིའི་མི་མང་གིས་ཁོང་དྲན་ཡུལ་ནས་བསྐྱུར་མེད་པའི་བརྡ་ལན་གཏོང་ཆེད་ལས་འགུལ་སྔར་ལྷག་སྤེལ་དགོས་པའི་དུས་ལ་བབ་ཡོད་པ་ཚོར་གྱི་ཡོད། ང་ཚོས་རྒྱ་ནག་གཞུང་ངོས་ནས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་ཁོང་གི་སྐུ་འཁོར་ནང་མི་རྣམས་རྒྱལ་སྤྱིའི་ཁྲིམས་སྒྲིག་ཁག་གི་དགོངས་དོན་བཞིན་རང་དབང་ལྡན་པའི་ངང་འཚོ་གནས་ཆོག་པའི་ཐོབ་ཐང་སྤྲོད་དགོས་པའི་འབོད་སྐུལ་ཞུ་བཞིན་ཡོད། 

ཕྱི་ལོ་ ༡༩༩༥ ཟླ་བ་ ༠༥ ཚེས་ ༡༤ ཉིན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་དགེ་འདུན་ཆོས་ཀྱི་ཉི་མ་མཆོག་པཎ་ཆེན་སྐུ་ཕྲེང་བཅུ་པའི་ཡང་སྲིད་འཁྲུལ་བྲལ་དུ་ངོས་འཛིན་གནང་ཞིང་། དེ་མ་ཐག་རྒྱ་ནག་གཞུང་གིས་ཡང་སྲིད་འཚོལ་ཞིབ་མི་སྣའི་དབུ་ཁྲིད་བྱ་བྲལ་རིན་པོ་ཆེ་མཆོག་འཛིན་བཟུང་བྱས། ཕྱི་ལོ་ ༡༩༩༥ ཟླ་བ་ ༠༥ ཚེས་ ༡༧ ཉིན་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་ཁོང་གི་ནང་མི་ཡོངས་རྫོགས་རྒྱ་གཞུང་གིས་འཛིན་བཟུང་བཀག་ཉར་བྱས་ཏེ། ཁོང་ཉིད་འཛམ་གླིང་སྟེང་གི་ཆབ་སྲིད་བཙོན་པ་དགུང་ན་ཆུང་ཤོས་སུ་གྱུར། དེ་རྗེས་རྒྱ་ནག་གཞུང་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ངོས་འཛིན་གནང་བའི་ཡང་སྲིད་རིན་པོ་ཆེ་སྣང་མེད་བཏང་ནས་རང་མོས་ཀྱི་ཡང་སྲིད་བདམས་ཏེ། ཕྱི་ལོ་ ༡༩༩༥ ཟླ་བ་ ༡༡ ཚེས་ ༡༡ ཉིན་རྒྱ་ནག་དམར་ཤོག་ཚོགས་མིའི་བུ་རྒྱལ་མཚན་ནོར་བུ་ཞེས་པ་ཞིག་པཎ་ཆེན་སྐུ་ཕྲེང་བཅུ་པའི་ཡང་སྲིད་དུ་ངོས་འཛིན་གསལ་བསྒྲགས་བྱས་ཤིང་། ཕྱི་ལོ་ ༡༩༩༥ ཟླ་བ་ ༡༢ ནང་གདན་ས་བཀྲ་ཤིས་ལྷུན་པོའི་གཡས་གཡོན་དུ་དམག་མི་ལྔ་བརྒྱ་ལྷག་བཏང་ནས་ཉེན་སྲུང་བཙན་པོའི་ངང་ཁྲི་འདོན་བྱས། 

ཕྱི་ལོ་ ༡༩༩༥ ཟླ་བ་ ༡༡ ནང་འཛམ་གླིང་མཉམ་འབྲེལ་རྒྱལ་ཚོགས་ཀྱི་བཙན་བཀས་གར་སོང་ཆ་མེད་བཏང་བར་ཞིབ་འཇུག་བྱེད་མཁན་མཐུན་ཚོགས་ཀྱིས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནས་སྟངས་ལ་ཐུགས་འཚབ་དང་སྦྲགས། རྒྱ་ནག་མི་མང་སྤྱི་མཐུན་རྒྱལ་ཁབ་ནས་ཁོང་གི་སྐོར་གནས་ཚུལ་མཁོ་སྤྲོད་གནང་དགོས་པའི་འབོད་སྐུལ་གནང་། དེ་ནས་བཟུང་འཛམ་གླིང་མཉམ་འབྲེལ་རྒྱལ་ཚོགས་ཀྱི་མནར་གཅོད་བཀག་འགོག་ཚོགས་ཆུང་དང་། བྱིས་པའི་ཐོབ་ཐང་ཚོགས་ཆུང་། ཆོས་དད་རང་དབང་ཐོག་གི་དམིགས་བསལ་སྙན་སེང་བ་སོགས་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ་ཁག་གིས་རྒྱ་ནག་གཞུང་ལ་པཎ་ཆེན་རིན་པོ་ཆེ་གང་དུ་ཡོད་མེད་གསལ་སྟོན་དགོས་པའི་འབོད་སྐུལ་གནང་། འོན་ཀྱང་ད་བར་རྒྱ་ནག་གཞུང་གིས་འབོད་སྐུལ་དེ་དག་སྣང་མེད་དུ་བཏང་ནས་མུ་མཐུད་པཎ་ཆེན་རིན་པོ་ཆེ་ནི་མི་མང་དཀྱུས་མ་ཞིག་ཡིན་པ་དང་། ཁོང་གིས་མི་མང་དཀྱུས་མའི་འཚོ་བ་སྐྱེལ་བཞིན་བཞུགས་ཡོད་སྟབས། ཐུགས་བསུན་པོ་གནང་འདོད་མི་འདུག་ཅེས་འཛམ་གླིང་མི་མང་ལ་མགོ་སྐོར་སླུ་བྲིད་གཏོང་བཞིན་ཡོད། དེས་ན། པཎ་ཆེན་རིན་པོ་ཆེ་མཆོག་གི་གནས་སྟངས་དེ་འཛམ་གླིང་ནང་བཙན་ཁྲིད་ཀྱིས་གར་སོང་ཆ་མེད་བཏང་བའི་གནས་ཚུལ་རིང་ཤོས་ཤིག་ཆགས་ཡོད། 

རྒྱ་ནག་གཞུང་གིས་པཎ་ཆེན་རིན་པོ་ཆེའི་ཡང་སྲིད་རྩད་གཅོད་དང་གར་སོང་ཆ་མེད་གཏོང་བར་ཐེ་གཏོགས་བྱ་རྒྱུའི་ཞེ་ཕུགས་ཀྱི་དམིགས་ཡུལ་ནི་བོད་ལ་དབང་བསྒྱུར་བྱ་རྒྱུ་དང་། ཡོང་འགྱུར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་བྱེད་ཕྱོགས་ལ་གཡོ་བྱུས་བཤམ་རྒྱུའི་གཞི་རྟེན་འཛུགས་ཆེད་ཡིན། པཎ་ཆེན་སྐུ་ཕྲེང་ན་རིམ་ནི་བོད་ཀྱི་ཆོས་སྲིད་གཉིས་ཀྱི་མཛད་འགན་ཆེ་བའི་དབུ་ཁྲིད་ཅིག་ཡིན་གཤིས། ཁོང་ལ་ཆབ་སྲིད་ཀྱི་ཤུགས་རྐྱེན་བྲལ་བའི་ཆོས་ཕྱོགས་ཀྱི་སློབ་གཉེར་གནང་རྒྱུའི་གོ་སྐབས་བསྐྲུན་རྒྱུ་ནི་ཤིན་ཏུ་གལ་འགངས་ཆེ། 

ང་ཚོས་སླར་ཡང་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོ་འགྲོ་བ་མིའི་ཐོབ་ཐང་ལྷན་ཚོགས་ཀྱི་འགན་འཛིན་མ་ཧི་ཀལ་བྷེ་ཅེ་ལཊ་ལགས་ལོ་འདིའི་ཟླ་བ་ལྔ་པའི་ནང་ཤར་ཏུར་ཀིསྟན་དུ་ཕེབས་སྐབས་བོད་ནང་གི་འགྲོ་བ་མིའི་ཐོབ་ཐང་གནས་སྟངས་གཟིགས་ཞིབ་གནང་རྒྱུ་སྤྱི་དང་། ཡང་སྒོས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་ཁོང་གི་སྐུ་འཁོར་ནང་མིའི་ད་ལྟའི་གནས་སྟངས་དང་གང་དུ་ཡོད་མེད་ཀྱི་གནས་ཚུལ་ཕྱིར་བསྒྲགས་ཡོང་ཆེད་རྒྱ་ནག་གཞུང་ལ་གནོན་ཤུགས་སྤྲད་རྒྱུའི་ཆེད་བོད་ལའང་ཕེབས་དགོས་པའི་ནན་སྐུལ་ཞུ་རྒྱུ་ཡིན། 

ཇི་སྲིད་རྒྱ་ནག་གཞུང་གིས་བཤད་པ་བཞིན་པཎ་ཆེན་རིན་པོ་ཆེ་དང་ཁོང་གི་སྐུ་འཁོར་ནང་མིའི་གནས་སྟངས་གསལ་སྟོན་བྱེད་པའི་དངོས་ཡོད་ཁུངས་ལྡན་དཔང་རྟགས་མ་བཏོན་པར་དེ་སྲིད་ང་ཚོས་རྒྱལ་སྤྱིའི་སྲིད་གཞུང་དང་། གྲོས་ཚོགས། གཞུང་ཁོངས་མིན་པའི་ཚོགས་པ། འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་སོགས་ནས་པཎ་ཆེན་རིན་པོ་ཆེ་གློད་བཀྲོལ་དང་ཁོང་ཉིད་རང་དབང་བདེ་སྐྱིད་ལྡན་པའི་སྐུ་ཚེ་སྐྱེལ་ཆེད་མུ་མཐུད་རྒྱ་ནག་གཞུང་ལ་རྒྱལ་སྤྱིའི་ཁྲིམས་ལ་བརྩི་བཀུར་ཞུ་དགོས་པའི་གནོན་ཤུགས་སྤྲོད་རོགས་ཞེས་འབོད་སྐུལ་ཞུ་རྒྱུ་ཡིན།།