༄༅། །ཕྱི་ལོ་ ༢༠༢༢ ཟླ་ ༠༤ ཚེས་ ༢༣ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཇར་མ་ནཱིའི་གྲོང་ཁྱེར་ཕེ་རེངྐ་ཕོཌ་ཁུལ་གྱི་བོད་རིགས་རྣམས་ལ་གསུང་བཤད་དང་དྲི་བར་ལན་འདེབས་གནང་ཡོད།
དེ་ཡང་མཛད་རིམ་དབུ་འཛུགས་ཀྱིས་ཐོག་མར་ཇར་འཁོད་བོད་རིགས་ཚོགས་པའི་ཚོགས་གཙོ་བསྟན་འཛིན་ཡེ་ཤེས་ལགས་ཀྱིས་ཕེབས་བསུའི་གསུང་བཤད་གནང་རྗེས་སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་གསུང་བཤད་གནང་།
དེ་ནས་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན། ང་ཚོའི་ལས་གཞི་གསར་པ་ཞིག་ནི་བོད་དོན་དང་བླངས་ཞུ་གཏུག་ལས་འགུལ་རེད། ང་ཚོས་གདོང་ལེན་བྱེད་དགོས་པ་མང་པོ་ཡོད། གཞིས་ཆགས་ཁག་གི་ནང་མི་ཉུང་དུ་འགྲོ་བཞིན་ཡོད་པ་དང་། ཕྱི་རྒྱལ་ཡུལ་གྲུ་ཁག་གི་ནང་བོད་མི་མང་དུ་འགྲོ་བཞིན་ཡོད། ང་ཚོས་གདོང་ལེན་བྱེད་དགོས་པ་དེ་དག་གོ་སྐབས་ལ་བསྒྱུར་ནས་ལས་ཀ་ཇི་ལྟར་བྱེད་དགོས་ཀྱི་འདུག་དེའི་སྐོར་བསམ་བློ་གཏོང་དགོས་རྒྱུ་གལ་ཆེན་པོ་རེད། དཀའ་ངལ་རེད་འདུག་ཅེས་བརྗོད་པ་ཙམ་གྱིས་ཕན་ཐོགས་མེད། དེ་འདྲའི་གོ་སྐབས་ལེན་རྒྱུའི་སླད་བོད་དོན་དང་བླངས་ཞུ་གཏུག་ལས་འགུལ་ཞེས་འགོ་བཙུགས་ཡོད།
གོ་ཐོས་ལ་ཕེ་རེངྐ་ཕོཌ་ནས་བོད་རིགས་ཁ་ཤས་ཀྱིས་ཐོ་བརྒྱབ་ཡོད་འདུག དེ་དག་གང་མང་ཡོང་ཐབས་གནང་དགོས། ལྷག་པར་བོད་རིགས་གཞོན་སྐྱེས་ཚོས་སྣེ་ཁྲིད་ཐུབ་པ་ཡིན་ན། བོད་མིའི་སྒྲིག་འཛུགས་ནས་བསྐོ་མི་དགོས་པར་བོད་རིགས་ནང་ཁུལ་ནས་འགོ་ཁྲིད་འཐོན་ཐུབ་པ་དང་། འགོ་ཁྲིད་དེ་དག་གིས་མ་འོངས་པར་རྒྱལ་སྤྱིའི་ངོ་བོ་ཐོག་ནས་ཚོགས་འདུ་རྒྱ་ཆེ་བ་དེ་འདྲ་འཚོགས་དགོས། གཞོན་སྐྱེས་དེ་དག་རིག་པ་ཧ་ཅང་བཟང་པོ་ཡོད། ང་ཚོའི་དམིགས་ཡུལ་བསྒྲུབ་རྒྱུར་གཞོན་སྐྱེས་ཚོར་ཐབས་ཤེས་མི་འདྲ་བ་ཏན་ཏན་ཡོད་པ་རེད་བསམ་གྱི་ཡོད། དེར་བརྟེན་བོད་དོན་དང་བླངས་ཞུ་གཏུག་ནང་བོད་མི་གང་མང་མཉམ་ཞུགས་གནང་སྟེ་ལུང་པ་རེ་རེ་ནས་ཤུགས་བརྒྱབ་ཐུབ་པ་དང་། ཤུགས་རྒྱག་སྟངས་དེ་རྒྱུན་ལྡན་ནང་བཞིན་ཡོད་ཚད་ཚང་མར་བསྙབ་རྒྱུའི་ཐབས་ཤེས་མ་ཡིན་པར་བོད་དོན་དང་འབྲེལ་བའི་ཐོག་ནས་སུ་གནད་འགག་ཅན་ཆགས་ཀྱི་འདུག ནུས་པ་ཕྲན་བུ་ཡོད་པ་དེ་སྤུང་ས་ཞིག་ལ་སྤྲུངས་དགོས། ཞེས་སོགས་ཀྱི་གསུང་བཤད་གནང་། །
