༄༅། །བོད་ཀྱི་སྐད་ཡིག་སློབ་གསོའི་ཐོབ་ཐང་རྩོད་ལེན་པ་བཀྲ་ཤིས་དབང་ཕྱུག་ལགས་ཡུལ་ཤུལ་ནས་ཟི་ལིང་དུ་འགྲོ་སྐྱོད་ཀྱི་ལམ་བར་དུ་མགོ་ལོག་དང་རེབ་གོང་། རྨ་ལྷོ་སོགས་སུ་བོད་པའི་སློབ་གྲྭ་ཁག་ཏུ་ཆེད་བསྐྱོད་ཀྱིས་ཁུལ་དེའི་སློབ་གྲྭ་ཁག་ཏུ་བོད་ཀྱི་སྐད་ཡིག་གི་སློབ་ཚན་ཚང་མ་རྒྱ་ཡིག་ཏུ་བསྒྱུར་ཡོད་པ་སོགས་ཀྱི་པར་རིས་དང་གནས་ཚུལ་ (Weibo) ཞེས་པའི་དྲ་བར་ཆེད་བཀོད་བྱས་པ་དང་། ཁོང་རེབ་གོང་རྫོང་དང་རྨ་ལྷོ་ཁུལ་དུ་མགྲོན་ཁང་ནང་སྡོད་མ་བཅུག་པར་ཕྱིར་ཕུད་བཏང་བ་སོགས་བསུན་གཙེར་གྱི་གནས་སྟངས་འོག་དཀའ་ངལ་རིམ་པ་འཕྲད་ཡོད་པ་དང་། ད་ལྟའི་ཆར་ཁོང་ས་གནས་གང་དུ་ཡོད་མེད་དང་གནས་སྟངས་ག་འདྲ་ཆགས་ཡོད་མེད་སོགས་ཀྱི་གནས་ཚུལ་ཤེས་རྟོགས་མེད་པར་གྱུར་ཡོད་འདུག
དེ་ཡང་ཨེ་ཤི་ཡ་རང་དབང་རླུང་འཕྲིན་ཁང་གིས་གནས་ཚུལ་སྤེལ་གསལ་ལྟར་ན། བཀྲ་ཤིས་དབང་ཕྱུག་ལགས་ཟི་ལིང་ལ་འགྲུལ་བསྐྱོད་དང་འབྲེལ་སྔ་ལོར་རྒྱ་ནག་གཞུང་གིས་སྒོ་བརྒྱབ་པའི་སེང་འབྲུག་སྟག་རྩེ་སློབ་གྲྭ་གཙོས་པའི་མགོ་ལོག་དང་རེབ་གོང་ཕྱོགས་ཀྱི་སློབ་གྲྭ་ཁག་གཅིག་ཏུ་ལྟ་སྐོར་བྱས་ཡོད་པའི་པར་རིས་དང་བརྙན་སོགས་དྲ་བར་སྤེལ་ཡོད་པ་དང་། ཕྱི་ཚེས་ ༧ ཉིན་ཁོང་རེབ་གོང་དུ་འབྱོར་རྗེས་མགྲོན་ཁང་ཞིག་ཏུ་ཐོ་འགོད་བྱས་ཏེ་ཆུ་ཚོད་ཕྱེད་ཀ་ཙམ་ལས་མ་སོང་བར། མགྲོན་ཁང་བདག་པོས་རྫོང་ཉེན་རྟོག་པས་བཀོད་ཁྱབ་ཡིན་སྐོར་བརྗོད་ནས་ཁོང་མགྲོན་ཁང་ནས་ཕྱིར་ཕུད་བཏང་ཡོད་པ་དང་། ཁོང་གིས་སློབ་གྲྭ་ཁག་ཏུ་ལྟ་སྐོར་སྐབས་རྨ་ཆེན་རྫོང་མི་རིགས་སློབ་འབྲིང་གཉིས་པའི་ནང་གི་སློབ་ཆུང་ལོ་རིམ་དང་པོ་དང་། གཉིས་པ། གསུམ་པ། རྨ་ཆེན་རྫོང་མི་རིགས་སློབ་འབྲིང་གཉིས་པའི་སློབ་ཆུང་དང་སློབ་འབྲིང་། མགོ་ལོག་བོད་རིགས་རང་སྐྱོང་ཁུལ་མི་རིགས་མཐོ་རིམ་སློབ་འབྲིང་སོགས་ཀྱི་སློབ་གྲྭའི་བསླབ་གཞི་རྒྱ་ཡིག་ཏུ་བསྒྱུར་ཡོད་སྐོར་བཀོད་འདུག
ཕྱི་ཚེས་ ༨ དང་ ༩ གཉིས་སུ་བསྐྱར་དུ་མགྲོན་ཁང་གླས་ཀྱང་སྔར་བཞིན་ཉེན་རྟོག་པས་བཀོད་ཁྱབ་ཡིན་སྐོར་བརྗོད་ནས་ཕྱིར་ཕུད་དང་སུན་བཙེར་བྱས་ཡོད་པ་དང་། མཐར་ཁོང་གིས་གནད་དོན་དེ་སྤྱི་བདེ་ཉེན་རྟོག་ཁང་དུ་ཞུ་གཏུག་ཆེད་རྨ་ལྷོ་བོད་རིགས་རང་སྐྱོང་ཁུལ་གྱི་སྤྱི་བདེ་ལས་ཁུངས་སུ་བཅར་བར་ཞུ་གཏུག་བྱེད་སའི་མི་སྣ་མེད་སྐོར་བརྗོད་ནས་ཡོང་བཅུག་མེད་པ་དང་། ཕྱི་ཉིན་བསྐྱར་དུ་རེབ་གོང་རྫོང་སྒྲིག་ཁྲིམས་ཞིབ་དཔྱོད་ཁང་དུ་ཞུ་གཏུག་ཆེད་སོང་བར་ཞིབ་དཔྱོད་ཁང་དེ་སྒོ་བརྒྱབ་ཡོད་པས་ཞུ་གཏུག་ཐུབ་མེད་པ་རེད།
ཕྱི་ཚེས་ ༡༠ ཉིན་ནས་བཟུང་རྒྱ་ནག་གཞུང་གིས་ཁོང་གི་ཝེ་པོ་དྲ་རྒྱའི་སྟེང་སྤེལ་བཞིན་པའི་གནས་ཚུལ་དང་བཅས་ཁོང་གི་དྲ་བྱང་ཡོངས་སུ་ནག་བསུབ་བཏང་ཡོད་སྟབས། ད་ལྟའི་ཆར་ཁོང་གི་གནས་སྟངས་ཐད་གསལ་ཁ་མེད་པ་ཆགས་ཡོད་པ་རེད།
