༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོ
དེ་ཡང་ཉིན་རྒྱབ་ཚོུད་ ༣།༣༠ སྟེང་རིན་པོ་ཆེ་མཆོག་དང་སྐུའི་གསུང་བསྒྱུར། དེ་བཞིན་ཐའེ་ཝན་ཇོ་ནང་རྟག་བརྟན་གླིང་ནང་པའི་ཆོས་ཚོགས་ཀྱི་ཚོགས་གཙོ་བཅས་དོན་གཅོད་ལས་ཁུངས་ཀྱི་ཁང་འོག་ཏུ་ཕེབས་སྐབས་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཆེད་དུ་ཕེབས་བསུར་བཅར་བ་དང་། དེ་ནས་ལས་ཁུངས་ཕེབས་རྗེས་ཕན་ཚུན་མཇལ་དར་ཕུལ་རེས་དང་འབྲེལ། རིན་པོ་ཆེ་མཆོག་གིས་དཔལ་རྒྱལ་བ་ཇོ་ནང་པའི་སྲོལ་འབྱེད་པ་རྗེ་བཙུན་ཏཱ་ར་ན་ཐའི་སྐུ་བརྙན་རིན་པོ་ཆེ་དང་། ཀུན་མཁྱེན་དོལ་སངས་རྒྱས་ཀྱི་སྐུ་བརྙན་ང་འདྲ་མ་གཉིས་དོན་ཁང་ལ་ཕུལ།
དེ་ནས་རིན་པོ་ཆེ་མཆོག་གིས་༸གོང་ས་༸ལྷ་མིའི་རྣམ་འདྲེན་མཆོག་གི་ཐུགས་བསྐྱེད་བླ་མེད་ཀྱི་མཛད་འཕྲིན་འོག་རང་ཅག་གངས་ཅན་པའི་ཆོས་སྲིད་ཀྱི་བྱ་བའི་འགན་འཁྲིད་སྐུ་ཚབ་དོན་གཅོད་ཀྱིས་རྟག་ཏུ་བཞེས་ཏེ་ཕྱག་ལས་རྒྱ་ཆེ་གནང་བཞིན་པར་རྗེས་སུ་ཡི་རང་དང་ཐུགས་རྗེ་བླ་མེད་དུ་ཆེ་ཞུ་བ་དང་ཆབས་ཅིག གངས་ལྗོངས་རྒྱལ་བསྟན་སྤྱི་དང་དཔལ་རྒྱལ་བ་ཇོ་ནང་པའི་ངེས་དོན་གྱི་བསྟན་པ་འདི་ཉིད་མི་ཉམས་འཛིན་སྐྱོང་སྤེལ་བར་འགལ་རྐྱེན་ཕྱི་ནང་མང་པོས་དཀའ་ངལ་ཧ་ཅང་ཆེ་ཡང་། ང་ཚོའི་ངོས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བརྩེ་གཟིགས་པ་ཆེན་པོས་བཀའ་སློབ་ལམ་སྟོན་གྱི་སྐྱབས་འོག་ཁོ་ནས་སེམས་ཤུགས་མ་ཆག་པར་བསྟན་པ་འདི་ཉིད་ལ་རང་ནུས་གང་ཡོད་ཀྱིས་བྱ་བ་བསྒྲུབ་ཁུལ་བགྱིས་བཞིན་ལགས་ན། སྐུ་ཚབ་དོན་གཅོད་ཀྱིས་ཀྱང་བོད་ཀྱི་ཆོས་བརྒྱུད་སྤྱི་མཚུངས་ལྟར་དུས་ནས་དུས་སུ་ཇོ་ནང་པའི་མཚན་འབོད་སོགས་ཐུགས་བརྩེ་བའི་གཟིགས་སྐྱོང་མི་འདོར་ཞེས་ཡིག་ངག་གཉིས་ཐོག་ནས་གསུངས་པ་མ་ཟད། རིན་པོ་ཆེ་མཆོག་ཐའེ་ཝན་དུ་བཞུགས་རིང་གི་གནས་ཚུལ་དང་། ཕྱི་ཟླ་ ༥ པའི་ཟླ་མཇུག་ཏུ་ཕྱིར་རྒྱ་གར་དུ་ལོག་རྒྱུ་སོགས་ཀྱི་གནས་ཚུལ་ཞིབ་ཕྲ་གསུངས།
སྐུ་ཚབ་དོན་གཅོད་སྐལ་བཟང་རྒྱལ་མཚན་ལགས་ཀྱིས་ཐའེ་ཝན་དུ་རིན་པོ་ཆེའི་སྐུ་གཟུགས་ཀྱི་འཕྲོད་བཞེས་དང་། ཆོས་ཚོགས་ཀྱི་གནས་སྟངས་སོགས་ཞིབ་ཕྲ་རྒྱུན་ལོན་ཞུས་པ་མ་ཟད། དོན་གཅོད་ལས་ཁུངས་ཀྱི་ལས་དོན་དང་མ་འོངས་བྱེད་འཆར་སོགས་ཞིབ་ཕྲ་ངོ་སྤྲོད་དང་འབྲེལ་དོན་ཁང་གི་ཆོས་ཁང་དང་ནང་ཆོས་འཛིན་གྲྭར་ཆེད་དུ་གདན་འདྲེན་ཆོས་མཇལ་ཞུས་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་ཁྲི་བྱིན་ཅན་དང་། སྐུ་པར་མཐོང་གྲོལ་རིན་པོ་ཆེར་མཇལ་དར་ཕུལ་བ་དང་འབྲེལ་ཕན་ཚུན་དྲན་རྟེན་གྱི་སྐུ་པར་སྒྲོན་རྗེས་ཁང་འོག་བར་དུ་ཕེབས་བསྐྱེལ་ཞུས་ཡོད།
གཞན་ཡང་ན་ནིང་ཕྱི་ཟླ་ ༡༢ ཚེས་ ༡༢ ཉིན་ཐའེ་ཝན་ཀྲང་ཧཱ་རྫོང་དུ་ཇོ་ནང་བསྟན་པའི་གསལ་བྱེད་ཀུན་མཁྱེན་དོལ་པོ་པ་ཤེས་རབ་རྒྱལ་མཚན་མཆོག་སྐུ་གཤེགས་ནས་མི་ལོ་ ༦༦༠ འཁོར་བའི་དྲུག་མཆོད་མཛད་སྒོ་ཞིག་འཚོགས་པར་སྐུ་ཚབ་དོན་གཅོད་ཆེད་དུ་བཅར་ཡོད་པ་བཅས། །