༢༠༡༡ ཟླ་ ༩ ཚེས་ ༢༤ རེས་གཟའ་སྤེན་པ།
༄༅། །ཕྱི་ལོ་ ༢༠༡༡ ཟླ་ ༩ ཚེས་ ༢༤ རེས་གཟའ་སྤེན་པའི་ཕྱེད་ཡོལ་ཆུ་ཚོད་ ༣།༤༠ ཐོག་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་དང་བཅས་པའི་དབུ་ཁྲིད་བླ་ཆེན་དབུས་བླ་སྤྲུལ་མཁན་པོ་དང་སྐུ་ཚབ་འདུས་པའི་ཆོས་ཚོགས་ཐེངས་བཅུ་གཅིག་པའི་ཉིན་མཐའ་མའི་མཇུག་བསྡོམས་སྐབས་གསར་འགོད་གསལ་བསྒྲགས་སྤེལ་ཡོད། གསར་འགོད་གསལ་བསྒྲགས་དེའི་སྐབས་ས་སྐྱ་གོང་མ་བདག་ཁྲི་རིན་པོ་ཆེ་མཆོག་དང་སྨན་རི་ཁྲི་འཛིན་མཆོག ཤར་བྱང་ཆོས་རྗེ་རྣམ་གཉིས། ཞེ་ཆེན་རབ་འབྱམས་རིན་པོ་ཆེ་མཆོག སྟག་ལུང་མ་སྤྲུལ་རིན་པོ་ཆེ་མཆོག མཚོ་སྣ་རིན་པོ་ཆེ་མཆོག ལོ་ཆེན་རིན་པོ་ཆེ་མཆོག བཀའ་ཁྲི་ཟུར་པ་གཟམ་གདོང་རིན་པོ་ཆེ་མཆོག ཆོས་རིག་བཀའ་བློན་མཆོག རྣམ་གྲྭ་མཁན་རིན་པོ་ཆེ་མཆོག སྤྱི་འཐུས་ཚོགས་གཞོན་མཆོག  ཆོས་བརྒྱུད་སྤྱི་འཐུས་རྣམ་པ་བཅས་ལྷན་འཛོམས་ཐོག་བཀའ་ཁྲི་ཟུར་པ་ཟམ་གདོང་རིན་པོ་ཆེ་མཆོག་གིས་གསར་འགོད་གསལ་བསྒྲགས་ཤིག་སྤེལ་བའི་ནང་གསུང་དོན།
ད་རིང་གི་གསར་འགོད་གསལ་བསྒྲགས་འདི་བཞིན་དམིགས་བསལ་བ་ཞིག་ཆགས་ཡོད། གང་ཡིན་བརྗོད་ན་བོད་ཀྱི་ཆོས་བརྒྱུད་ཁག་གི་བླ་ཆེན་རྣམ་པ་དང་བླ་ཆེན་རྣམ་པའི་སྐུ་ཚབ་ཁག་གཅིག་འདུས་པའི་ཆོས་ཚོགས་ཐེངས་བཅུ་གཅིག་པ་དེ་བཞིན་ལེགས་གྲུབ་ཟིན་ཡོད། ཚོགས་འདུ་དེའི་རིང་གནད་དོན་མང་པོ་ཞིག་གི་ཐོག་ཉིན་གསུམ་རིང་བགྲོ་གླེང་དང་གོ་བསྡུར་ཐོག་གྲོས་གཞི་གྲོས་ཆོད་ཁག་གཅིག་ཐག་ཆོད་ཀྱིས་གཏན་འབེབས་བྱུང་ཡོད། དེ་བཞིན་ཚོགས་འདུའི་སྐབས་༸གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་གིས་ཆོས་བརྒྱུད་ཁག་གི་བླ་ཆེན་རྣམ་དང་ལྷན་ཐུགས་དགྱེས་ཚོར་ཆེན་པོས་འབྱུང་འགྱུར་༸གོང་ས་མཆོག་གི་ཡང་སྲིད་དང་ཏཱ་ལའི་བླ་མའི་བླ་བྲང་དེ་བཞིན་མུ་མཐུད་གནས་མིན་ཐད་༉༸གོང་ས་མཆོག་གིས་ཕྱི་ལོ་ ༡༩༦༩ ལོ་ཙམ་ནས་འབྱུང་འགྱུར་༸གོང་ས་མཆོག་གི་ཡང་སྤྲུལ་བྱུང་མིན་ནི་བོད་མི་ཚོས་ཐག་ཆོད་བྱེད་རྒྱུ་ཞིག་རེད་ཅེས་བཀའ་སྩལ་བའི་གནས་སྟངས་དེ་བཞིན་དུས་ད་ལྟའང་འགྱུར་བ་མེད་པར་གནས་ཡོད། བར་སྐབས་སུ་༸གོང་ས་མཆོག་གི་ཡང་སྤྲུལ་ཐད་དྲི་བ་གཏོང་མཁན་མང་པོ་ཡོང་བཞིན་ཡོད། ལྷག་པར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་དོ་སྣང་དང་ལས་འགུལ་རྩམ་བཞིན་པ་དང་ཕྱོགས་མཚུངས་གསར་འགོད་པས་ཡ་མཚན་ཆེན་པོས་དོགས་དྲི་མང་པོ་ཡོང་བཞིན་ཡོད།
༸གོང་ས་མཆོག་ས་གནས་གང་དུ་ཆིབས་སྒྱུར་བསྐྱངས་ནའང་གསར་འགོད་པ་ཚོས་༸གོང་ས་མཆོག་གི་ཡང་སྤྲུལ་ངོས་འཛིན་ཇི་ལྟར་མཛད་རྒྱུའི་སྐོར་དྲི་བ་མང་ཤོས་འབུལ་བཞིན་ཡོད། དྲི་བ་དེ་དག་དང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ངན་གཡོ་དེ་དག་ལ་ལན་འདེབས་ཁ་གསལ་ཞིག་ཡོང་ཆེད་༸གོང་ས་མཆོག་གིས་ལམ་སྟོན་དང་གསལ་བསྒྲགས་ཟབ་རྒྱས་འགོད་གནང་མཛད་པའི་ནང་དོན་ཚན་དང་པོ། དུས་ཡུན་གང་ཙམ་རྗེས་༸གོང་ས་མཆོག་གིས་སླར་ཡང་ཆོས་བརྒྱུད་རྣམ་པའི་བླ་ཆེན་རྣམས་དང་བོད་མི་ཚོར་གོ་བསྡུར་མཛད་དེ་འབྱུང་འགྱུར་༸གོང་ས་མཆོག་གི་ཡང་སྤྲུལ་མུ་མཐུད་བྱུང་དགོས་མིན་ཐད་ཐག་གཅོད་མཛད་རྒྱུ་དང། གཉིས་པ། གལ་ཏེ་༸གོང་ས་མཆོག་གི་ཡང་སྤྲུལ་མུ་མཐུད་རྒྱུའི་ཐག་གཅོད་བྱུང་བ་ཡིན་ན། ཡང་སྤྲུལ་མཆོག་བརྩད་གཅོད་ཇི་ལྟར་བྱེད་མིན་དང་སུས་བདག་སྤྲོད་གནང་མིན་ཐོག་ཡིག་ཆ་ཁ་གསལ་འདི་བཞིན་ད་ལྟ་ཁྱེད་རྣམས་ཀྱི་ཕྱག་ལ་ཡོད། བསྒྲགས་གཏམ་ཡིག་ཆ་འདི་བླ་ཆེན་རྣམས་དང་ལྷན་གོ་བསྡུར་མཐིལ་ཕྱིན་གནང་རྗེས་ཡིག་ཐོག་ཏུ་ཕབ་པ་ཞིག་ཡིན་ཞེས་སོགས་ཀྱི་གསར་འགོད་གསལ་བསྒྲགས་སྤེལ།