༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༢ ཚེས་ ༡༦ ཕྱི་དྲོ་ཐའེ་ཝན་བོད་ཀྱི་སྐུ་ཚབ་དོན་གཅོད་འབའ་པ་སྐལ་བཟང་རྒྱལ་མཚན་ལགས་ཀྱིས་ཐའེ་ཝན་རིག་གཞུང་ལྷན་ཁང་གི་བློན་ཆེན་སྐུ་ཞབས་ལིའི་ཡུང་ཏཱ་ལགས་མཇལ་འཕྲད་ཞུས་ཡོད་པ་རེད། ཐེངས་འདིའི་མཇལ་འཕྲད་སྐབས་ཐའེ་ཝན་རིག་གཞུང་ལྷན་ཁང་བོད་སོག་རིག་གཞུང་བསྟི་གནས་ཁང་གི་འགན་འཛིན་གསར་རྙིང་གཉིས་དང་། ཐའེ་ཝན་དོན་ཁང་གི་དྲུང་ཆེ། གངས་ལྗོངས་དཔེ་སྐྲུན་ཁང་གི་འགན་འཛིན་བཅས་མཉམ་ཞུགས་གནང་ཡོད་པ་རེད།
ཐོག་མར་སྐུ་ཚབ་དོན་གཅོད་སྐལ་བཟང་རྒྱལ་མཚན་ལགས་ཀྱིས་བོད་ལུགས་དཀར་གཙང་མཇལ་དར་ཕུལ་བ་དང་སྦྲགས་གསུང་དོན། བོད་སོག་ལས་ཁུངས་སྒོ་བརྒྱབ་པའི་རྗེས་རིག་གཞུང་ལྷན་ཁང་གི་འོག་ཏུ་བོད་སོག་རིག་གཞུང་བསྟི་གནས་ཁང་གསར་དུ་བཙུགས་རྗེས། དོན་གཅོད་ལས་ཁུངས་དང་ཐད་ཀར་འབྲེལ་བ་གསར་པ་འགོ་བཙུགས་པ་མ་ཟད་འབྲེལ་ཡོད་དཔོན་རིགས་ཐེངས་དང་པོར་གཞུང་འབྲེལ་ཐོག་བཞུགས་སྒར་རྡ་རམ་ས་ལར་ཕེབས་ཐུབ་བྱུང་ཡོད་པ་དང་། རིག་གཞུང་ལྷན་ཁང་ནས་བོད་ཀྱི་རིག་གཞུང་དང་འབྲེལ་བའི་ལས་འགུལ་གང་མང་སྤེལ་གྱི་ཡོད་པས། ལས་འགུལ་ཁག་གསུམ་ཙམ་ནང་དངོས་སུ་མཉམ་ཞུགས་ཞུ་རྒྱུ་བྱུང་། མ་འོངས་པར་ལས་འགུལ་དེ་རིགས་སྤེལ་བའི་གྲ་སྒྲིག་སྐབས་དོན་གཅོད་ལས་ཁུངས་དང་མཉམ་འབྲེལ་གནང་ཐུབ་ན། བོད་ཀྱི་རིག་གཞུང་ངོ་མ་གང་ཡིན་འབུར་དུ་ཐོན་ཐུབ་པས། ཁ་སྔོན་བོད་སོག་རིག་གཞུང་བསྟི་གནས་ཁང་གི་འགན་འཛིན་གསར་རྙིང་དང་འབྲེལ་ཡོད་ལས་བྱེད་དོན་གཅོད་ལས་ཁུངས་སུ་ཕེབས་སྐབས་ཞིབ་ཕྲའི་བསམ་འཆར་ཕུལ་བ་ཡིན་པས་ཁོང་རྣམ་པས་མོས་མཐུན་གནང་གི་འདུག་སོགས་བོད་ཀྱི་རིག་གཞུང་ཁྱབ་སྤེལ་དང་འབྲེལ་བའི་སྐོར་གསུངས་རྗེས། དོན་གཅོད་ལས་ཁུངས་ཀྱི་ལས་དོན་དང་། གངས་ལྗོངས་དཔེ་སྐྲུན་ཁང་གི་ལས་དོན་སོགས་ངོ་སྤྲོད་གནང་།བློན་ཆེན་སྐུ་ཞབས་ལིའི་ཡུང་ཏཱ་ལགས་ཀྱིས་གཙོ་བོ་གསུང་དོན། བོད་ནི་མཛེས་སྡུག་ལྡན་པ་ཞིག་ཡིན་པ་དང་། བོད་ཀྱི་རིག་གཞུང་ཕུན་སུམ་ཚོགས་པོ་ཡོད་པ་ངོ་སྤྲོད་བྱ་རྒྱུ་གལ་ཆེན་པོ་རེད། བོད་དུ་ཐེངས་གཅིག་བསྐྱོད་ཐུབ་རྒྱུ་ངོས་ཀྱི་བཟའ་ཟླའི་མི་ཚེའི་རྨི་ལམ་ཡིན་ཡང་ད་ལྟའི་གནས་སྐབས་སུ་རེ་བ་ཡེ་ནས་མི་འདུག རིག་གཞུང་ལྷན་ཁང་བོད་སོག་རིག་གཞུང་བསྟི་གནས་ཁང་ནས་བོད་ཀྱི་རིག་གཞུང་ངོ་སྤྲོད་ཀྱི་ལས་འགུལ་གང་འཚམས་སྤེལ་ཟིན་པ་རེད། ང་རང་ཡང་དངོས་སུ་མཉམ་ཞུགས་ཞུས་ཡོད། གོང་དུ་དོན་གཅོད་ནས་གསུང་པ་ལྟར་མ་འོངས་པར་བོད་ཀྱི་རིག་གཞུང་ངོ་སྤྲོད་ཀྱི་ལས་འགུལ་སྤེལ་སྐབས་དོན་གཅོད་ལས་ཁུངས་དང་མཉམ་འབྲེལ་བྱེད་ཐུབ་པ་ཡིན་ན། ནུས་པ་མཉམ་སྤུངས་ཀྱིས་ཧ་ཅང་ཡག་པོ་ཡོང་གི་རེད་སོགས་གསུངས་ནས་གཤམ་འོག་ལས་བྱེད་ལ་ཐད་ཀར་བཀའ་མངགས་གནང་། དོན་གཅོད་ནས་ཐའེ་བོད་དབར་འབྲེལ་ལམ་ཡག་ཏུ་འགྲོ་བཞིན་པའི་བརྒྱུད་རིམ་ཁྲོད་བཙན་བྱོལ་བོད་མི་ལག་དེབ་སེར་པོ་འཁྱེར་མཁན་རྣམས་ཐའེ་ཝན་དུ་སློབ་སྦྱོང་དང་། ནང་ཆོས་སྤེལ་བ། ལས་ཀ་བྱ་ཆོག་པའི་མཐོང་མཆན་ཞུ་ཕྱོགས་སྐོར་གྱི་དཀའ་ངལ་སེལ་ཐབས་སོགས་ཞུས་པར། བློན་ཆེན་མཆོག་ནས་འབྲེལ་ཡོད་ལས་བྱེད་ལ་ཚོགས་འདུ་ཁག་གི་སྐབས་དེ་དོན་རྒྱབ་སྐྱོར་དགོས་པའི་བཀོད་མངགས་དང་། སྲིད་འཛིན་མཆོག་གི་དགོངས་པ་ཇི་ཡོད་སོགས་ཀྱང་གསུངས།
ཆུ་ཚོད་གཅིག་ཙམ་རིང་ཕན་ཚུན་བཀའ་མོལ་ལྷུག་པོ་བྱུང་བ་དང་། མཐའ་མ་དོོན་ཁང་གི་དྲུང་ཆེ་བསོད་ནམས་རྡོ་རྗེ་ལགས་ཀྱིས་དོན་ཚན་གཉིས་ཞུས་དོན། བློན་ཆེན་མཆོག་ཀའོ་ཞུང་གྲོང་ཁྱེར་སྤྱི་ཁྱབ་གཞོན་པའི་ཐུགས་འགན་བཞེས་སྐབས། ཕྱི་ལོ་ ༢༠༠༩ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཐའེ་ཝན་ལྷོ་ཕྱོགས་གྲོང་ཁྱེར་ཆེ་ཁག་བདུན་ནས་གློ་བུར་གྱི་གདན་ཞུ་ཕུལ་བ་ལྟར་ཆིབས་སྒྱུར་གནང་སྐབས། གྲ་སྒྲིག་བྱེད་པའི་དུས་ཡུན་ཉིན་གྲངས་གསུམ་ལས་མེད་ཀྱང་སྐུ་ཉིད་ཀྱིས་༸གོང་ས་མཆོག་ལྷོ་ཕྱོགས་ཁུལ་གྱི་མཛད་རིམ་གོ་སྒྲིག་དང་། སྐུ་ཕྱྭའི་བདེ་འཇགས་ཀྱི་གཙོ་བོའི་ཐུགས་འགན་བཞེས་པས་སྐབས་དེའི་ཆིབས་སྒྱུར་ལེགས་གྲུབ་བྱུང་ཡོད་པར་ཐུགས་རྗེ་ཆེ་ཞུ་རྒྱུ་ཡིན། གཞན་ཡང་ནད་ཡམས་མེད་པའི་སྐབས་ཐའེ་ཝན་ནང་ལོ་ལྟར་རྒྱལ་སྤྱིའི་དཔེ་དེབ་འགྲེམས་སྟོན་ཆེན་མོ་ཞིག་གོ་སྒྲིག་གནང་གི་ཡོད་པ་དང་། རིག་གཞུང་ལྷན་ཁང་ནས་འགྲོ་སོང་བཏང་བ་དང་ས་ཆ་གཡར་ཏེ་གཞུང་ཁོངས་མིན་པའི་ཚོགས་པ་ཁག་རྒྱལ་སྤྱིའི་འགྲེམས་སྟོན་ནང་མཉམ་ཞུགས་ཐུབ་པའི་གོ་སྐབས་གནང་གི་ཡོད་པས། དེའི་ནང་གངས་ལྗོངས་དཔེ་སྐྲུན་ཁང་ཡང་ལོ་ལྟར་མཉམ་ཞུགས་ཐུབ་ཀྱི་ཡོད། མུ་མཐུད་མཐུན་འགྱུར་རྒྱབ་སྐྱོར་ཡོང་བ་ཞུས་སྐབས། བློན་ཆེན་མཆོག་ནས་༸གོང་ས་མཆོག་གདན་འདྲེན་ཞུ་ཕྱོགས་ཀྱི་བརྒྱུད་རིམ་ངོ་སྤྲོད་གནང་བ་མ་ཟད། རྒྱལ་སྤྱིའི་དཔེ་དེབ་འགྲེམས་སྟོན་སྐབས་ངེས་པར་དུ་རྒྱབ་སྐྱོར་ཞུ་ཆོག་པའི་ཞལ་བཞེས་ཀྱང་གནང་།
དེ་ནས་སྐུ་ཚབ་དོན་གཅོད་ནས་ཐའེ་ཝན་དད་ལྡན་མང་ཚོགས་ནང་༸གོང་ས་མཆོག་སླར་ཡང་ཐའེ་ཝན་དུ་ཆིབས་སྒྱུར་ཐེངས་གཅིག་གནང་ཐུབ་རྒྱུའི་རེ་བ་ཆེན་པོ་གནང་བའི་གནས་ཚུལ་དང་། བློན་ཆེན་མཆོག་ཀྱང་བཞུགས་སྒར་དུ་རིག་གཞུང་འཚམས་གཟིགས་ལ་ཕེབས་ཐུབ་པའི་རེ་བ་དང་བཅས་ཕན་ཚུན་མཛའ་བརྩེའི་ངང་བཀའ་མོལ་ལྷུག་པོ་ཞུས། མཇལ་མོལ་སྐབས་བློན་ཆེན་མཆོག་ལ་གངས་ལྗོངས་དཔེ་སྐྲུན་ཁང་ནས་པར་སྐྲུན་ཞུས་པའི་ལོ་རྒྱུས་ཐོག་བོད་རྒྱ་ཁོངས་མིན་པའི་དཔང་རྟགས་ཀྱི་འབྲེལ་ཡོད་དཔེ་དེབ་ཁག་གཅིག་ཕྱག་རྟགས་སུ་ཕུལ་བར་དགྱེས་ཚོར་ཆེན་པོའི་ངང་སློབ་སྦྱོང་བྱ་རྒྱུ་ཡིན་ཞེས་གསུངས་པ་དང་། མཇལ་མོལ་རྗེས་བློན་ཆེན་སྐུ་འཁོར་དང་བཅས་འགྱོག་འབེབ་ཀྱི་མཚམས་བར་ཕེབས་སྐྱེལ་ལ་ཕེབས་ཡོད།
གཞན་ཡང་། ཕྱི་ཚེས་ ༡༥ ཉིན་ཐའེ་ཝན་བོད་ཀྱི་སྐུ་ཚབ་དོན་གཅོད་དང་དྲུང་ཆེ་གཉིས་ནས་ཐའེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ (Freddy Lim) ལགས་བསྐྱར་དུ་མཇལ་འཕྲད་ཞུས་ཏེ་གསུམ་བཅུའི་དུས་དྲན་གྱི་ལས་འགུལ་དང་། རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་འདུའི་སྐོར་སོགས་ལ་བཀའ་མོལ་ཞུས་ཡོད་པ་བཅས། །