༢༠༡༡ ཟླ་ ༩ ཚེས་ ༡༥ རེས་གཟའ་ཕུར་བུ།

༄༅། །ཕྱི་ལོ་ ༢༠༡༡ ཟླ་ ༩ ཚེས་ ༡༣ རེས་གཟའ་མིག་དམར་ཉིན་ཨ་རིའི་གཞུང་ནས་བཏོན་པའི་རྒྱལ་སྤྱིའི་ཆོད་དད་རང་དབང་གི་ལོ་འཁོར་སྙན་ཐོ་བཏོན་པའི་ནང་འཁོད་དོན།  སྤྱིར་མི་མང་ལ་ཆོས་དད་རང་དབང་ཡོད་པ་རྒྱ་ནག་གཞུང་གི་རྩ་ཁྲིམས་ནང་གསལ་ཡོད་ཀྱང་དོན་དངོས་ལག་ལེན་ཐོག་ཆོས་དད་རང་དབང་ལ་དམ་བསྒྲགས་བྱེད་བཞིན་ཡོད། བོད་རང་སྐྱོང་ལྗོངས་ཀྱི་ས་ཁུལ་དང་བོད་རིགས་གནས་སྡོད་བྱེད་སའི་ས་ཁུལ་ཁག་གི་ནང་ཆོས་དད་རང་དབང་གི་གནས་སྟངས་ཞན་པོར་གནས་ཡོད། ཉེ་ལམ་ཧྲང་ཧེའི་འཛམ་གླིང་རིག་དངོས་འགྲེམས་ཚོགས་ (Shanghai World Expo) དང་ཨེ་ཤི་ཡའི་རྩེད་འགྲན་ཆེན་མོའི་སྐབས་དམིགས་བསལ་དམ་བསྒྲགས་ཤུགས་ཆེ་རུ་བཏང་ཡོད་ཅེས་འཁོད་ཡོད།

དེ་བཞིན་བོད་མི་ཚོའི་ཆོས་དད་རང་དབང་ཐོག་དམ་བསྒྲགས་བྱས་ཚུལ་སྐོར་འཁོད་དོན། རྒྱ་ནག་གཞུང་གིས་བོད་པའི་དགོན་སྡེ་ཁག་གི་ནང་དམ་བསྒྲགས་ཤུགས་ཆེ་བྱས་པར་བརྟེན།  བོད་པའི་དགེ་བཙུན་རྣམས་ཀྱིས་ཉིན་རེའི་ནང་ཆོས་སློབ་ཁྲིད་དང་ཉམས་ལེན་བྱེད་རྒྱུར་ཧ་ཅང་དཀའ་ངལ་བཟོས་ཡོད་ཅེས་སོགས་འཁོད་ཡོད།  སྙན་ཐོ་དེ་བཞིན་ཕྱི་ལོ་ ༢༠༡༠ ཟླ་ ༧ ནས་ཕྱི་ལོ་ ༢༠༡༠ ཟླ་ ༡༢ བར་གྱི་རྒྱ་ནག་ནང་ཆོས་དད་རང་དབང་གི་གནས་སྟངས་ཐོག་གི་སྙན་ཐོ་ཞིག་ཡིན་པ་དང། དུས་ཡུན་དེའི་རིང་བོད་ནང་རྒྱ་ནག་གཞུང་གིས་བོད་མི་ཚོའི་ཆོས་དད་རང་དབང་ལ་དམ་བསྒྲགས་ཤུགས་ཆེ་བྱེད་བཞིན་པའི་སྐབས་ཡིན་སྐོར་སོགས་འཁོད་ཡོད།
ཕྱོགས་མཚུངས་སྙན་ཐོ་འདོན་སྤེལ་སྐབས་ཨ་རིའི་ཕྱི་སྲིད་དྲུང་ཆེ་ལྕམ་སྐུ་ཧི་ལ་རི་ཀི་ལིན་ཊོན་ (Hillary Clinton) མཆོག་ནས་རྒྱ་ནག་གཞུང་གིས་བོད་དང་ཤིང་ཅང་། དེ་བཞིན་རྒྱ་ནག་སྐམ་སའི་ནང་དུ་རྒྱ་རིགས་ཡེ་ཤུའི་ཆོས་པ་རྣམས་ལ་དམ་བསྒྲགས་བྱས་པར་བརྟེན།  རང་དབང་ཐོག་རང་གི་ཆོས་དད་ལག་བསྟར་བྱེད་རྒྱུར་དཀའ་ངལ་འཕྲད་ཡོད་ཅེས་གསུངས།